Read Northern Rengma Naga JEREMIYA 22 Bible Online

JEREMIYA 22 - Northern Rengma Naga bible

JEREMIYA 22

¹Apvüwa na hi David shicübvügha, Judah kadijjen wi wa nu ciwi kadimiwa nu ma kekhu wi kedithu, nu Jerusalem nyithu wi Apvüwa na kekhi jüh kinalo kizalo kesa hi kiza:

³“Hi Apvüwa, hi nthu na atsentsa nu kemeshonwa salo nthu kiza. Nyu mechu ketenwa kwen wina nyu ma mechu kebenwa khweya. Asangthu, magha-maghangthu, nu denyi-demathu nkhichi nsala, nu kemetha pen hawi kesami nkemithu npathila.

⁴Keujüla nthu na ntsakhiwa hi ajüh pi nthu kecü tsü saben lethu, David shicübvüghathu na kadimi saben yaben. Nu mathu na mathu kekhu wi kedithu, nu mathu nyithu gweghe goru nu gorugarithu miwi na kadipen khweti-jenka wi cüshu ben.

⁵ Isala keujüla nthu na ijüh khukechi tsü nkina lethu, kadipen hawa ha yasa benle kesa hi nthu tuwi kishen ben. Hi Apvüwa, hi khidha.

⁶“Ituwi tsü Judah kadijjen tsüna Gilead yyi nu Lebanon yikhathu tsikemehai ti le; isala hi tsüpi kiyisha pen kesü sa nu thola ciwi nhang thsü laden.

⁷Hi tsü yasalo kesa anyi kesun chiben. Mathu tsüdila ampvü sengho sedar donbvü tsikemehai tsü shüchi nu pi anni wi khala chiaben.

⁸“Tsaseng wi asang kejon na ha pvüdhi waden nu hi Apvüwa, mangkesa na anyunuti ketiwa ha miwi hati sa nu kesa khokho wi kekeüliben.

⁹Ciwi mathu na hawa ha nthu na nthu Nyiza, hi ssinu cenkethenjüh sa kethengwa tsü teshi nu acenpvü kepathu kinyi nu tsüthu kekuli sa wa kesa ghena le, isa luneng ben.”

¹⁰Judah nyithu, kadimi Josiya ghena nqai lalo; ma keshü ghena anongü nsala. Isala ma tsawa Joahaz ghena qai ntsa salo; mathu na ma ya khiela nghoneng thsüle kesa ssibvü tendha. ma ma kepvügha yyi tsü nmu neng dha.

¹¹Apvüwa na Josiya tsawa Joahaz ghena khiben, “Ma hewi na bvü nu nghoneng dha.

¹²Ma nyu ma ssinu bvü kesathu yyi wi shüaben, nu ma khiela ayyi hawa mu neng nbendha.”

¹³Anyi thowa na nketsatan wina pi ma jjen sa, nu atsentsa nkenye wi pi tsü sapi tipfü, ma diyyi nyithu wi mangla pi ncüla kuli thsü, nu mathu kutimen pi cü nten khe anyi tsüna dedi tendha.

¹⁴Anyi hati khi ketenwa na dedi tendha, “Hi hi ketanla ajjen keti kesü sa, nu ashha tangwa wi keshondhi mezaqo sayaden.” Tsüti ma jjen wi jjenkubhithu saya nu sedar chan pi matsisa, nu kenmie pi tsü nyenya.

¹⁵No sedar chan pi nyu kepa miwi ajjen kemehaithu sa keya ghena no sapi kadimi mehai kayi saya kwe? Nba na ma kahang mehai cenya. Ma keshüthangla meshon nu metha, nu ma kekuli tsüdila mehai kayiya.

¹⁶Ma ketha-uthu jüh mehaitsü kaghaten cü, nu pala tsüdila ma ghena mehaitsü sa, Apvüwa chüben le kesa jjügi na tsüti kesa le.

¹⁷Isala no tsü npvü-kemene kenmvu ketan muden; no kesami nkemi nyi pathi, nu yasayala wi n-nyithu pasha. Apvüwa na khidha.

¹⁸ Tsalina Apvüwa na Josiya tsawa Jehoiakim, Judah kadimiwa ghena khi: “Thola ma ghena anonkegü nsala nyelela hati nkhila, ‘Khatila qhethidha nu, ipvüshangwa, Khatila qhethidha nu!’ Anyi thola ma ghena qai nyelela magha nu ‘Ipvüwa! hi kadimiwa! nsala.

¹⁹Gada kesü pi kevhü wi kenyuwa pi kecü cu ma zan sen wa Jerusalem khweti-jenka na ameiwa khala ben.’ ”

²⁰Jerusalem nyithu, Lebanon wi wa jishalo, Bashan yyi wi wa qailo; Moab yikhathu wi ben nu cichilo, npfüthu tsüdila pashadha.

²¹No mehai kayi keben wi Apvüwa na no kiza, isala nthu na nkina mvula. No kahang tsüdi wi tsüti sa; no khiela Apvüwa jüh kina le nsa.

²²Nccülikesathu tsü ameghü na mo pi bvüaden, npfüthu tsü aghi tssüzü sala zansen bvüaden, nu n-nyunutiwa na kimenni nu kejüghe yaden, no kekuli nkemehai sa ketheng tsüdi ghena.

²³No Lebanon wi pvükegho sedar chan jawi yazishu ben; isala nza na kepvügha wi kinaa ti kesa na nmiwi kegho wi khatila no tizen dha nu.

²⁴ Apvüwa na Judah kadimiwa Jehoiakim tsawa Kadimi Jehoiakhin wi khi, “Hi ntsakhiwa hangkeben Anyiza ghena no ikwen ajewa zanzza keqhan saben lela hi no khushiaben,

²⁵nu no pi no messi keten anyithu no pathi mvu keben nyithu cüaden . Hi no pi Babylonia kadimiwa Nebukhadnezzar nu ma süpahizithu cüaden .

²⁶Hi mataghang no nu njja kesun pi kushiyyi wi chiaben . No no nkepvügha yyi wi wa nu nshinyi qho ciwi shüaben.

²⁷No diyyi hawa ha mu neng mvuthi saaben, isala no kheneng gho nbendha.”

²⁸Hi keü, “Kadimi Jehoiakhin tsüna ayyipfü pacha pi khala nu thola meya mvula kesa tsüti sadha kwe? Tsü ghena ma nu ma tsangathu ssinu mathu na nchütha kesa yyi wi bvüdha kwe?”

²⁹O ayyi, ayyi, ayyi! Apvüwa na khi keben jüh tsü kina chilo:

³⁰“Anyi hawa ha meshensa pi ma tsangathu dedi, nu khiela haicenya thsü nbendha. Ma Judah wi David sengwi kekhang kesenthu ti kesa ashicüthu nmi laben. Hi Apvüwa, hi khidha.”