Read Northern Rengma Naga JEREMIYA 24 Bible Online

JEREMIYA 24 - Northern Rengma Naga bible

JEREMIYA 24

¹Apvüwa na khhaghabvü bi ashijü keni pi Kekinyijjen na atuwa wi chi ketheng pi hi ccüca. (Tsüwa tsüna Babilon wi Kadimi Nebukhadnezzar na Jehoiakim tsawa Jehoiakhin, Judah kadimiwa, nu Judah wi ccülikesathu, kecüchüthu, nu sapichüthu ghanghu sen nu Jerusalem wina Babilon wi atssüzü sa kewa sengwi.)

²Ashijü atuwa na khhaghabvü bi kemehai nyün tegü ketan; kepawa na mabi nmehaitha pi dsa meya.

³Tsaseng wi Apvüwa na hi wi khi, “Jeremiya, no mangwa muben nu?” Hi ma luneng, “Khhaghabvü le! Kemehaithu na mehai ntsa, nu nkemehaithu na nmehaitha pi dsa meya.”

⁴Tsalina Apvüwa na hi wi khi,

⁵“Hi Apvüwa, Israel Nyizawa na anyithu ghan sen nu Babilon wi wa kesathu tsüpi khhaghabvü bi kemehai ntsathu tsüle kesa meshenden, tsalina hi keccaketssü pi mathu cüaden .

⁶Hi mathu hieden nu mathu ssineng gho mathu yyi hawa wi chiaben. Hi mathu pieki cü nu yasa nben; hi mathu sheng chi nu pfüa nben.

⁷Hi mathu ya hi Apvüwa le kesa chüya mvuthi kesa pi cüaden . Tsaseng wi mathu na inyithu sayaben, nu hi mathu Nyiza saaben, kepaghenanye mathu na aleben tsüdi sen nu hi wi kheneng ghoaben .

⁸“Judah kadimiwa Zedekiya, kaditsa ma vü kebenthu, nu Jerusalem nyi kepathu, ayyi hawa wi kebenthu le apen ketsen sen Ejipt wi bvü keathu ghena lela, hi Apvüwa, hi mathu pi khhaghabvü bi nmehaitha pi dsa nkeyathu tsüti sa thsüaden .

⁹Hi wan kededi sengho mathu miwi chi nu ayyi wi mizzatentithu tsüdila qhethiketen saaben. Anyithu na mathu nankeqheben, mathu pi keponsa saaben, mathu nkhichi sa, nu kahe wi lela hi mathu jügüzighe pi chikea pen wi nyu mathu nyan khipi kishen- keshü ti saaben.

¹⁰Hi aghikesa, kekhhwen, nu kesakinaa ghei sengho mathu miwi chi, nu mathu kesüla hi ayyi pi mathu nu mathu bamyithu kecü wi keben chu tsüti saaden.”