Read Northern Rengma Naga JEREMIYA 25 Bible Online

JEREMIYA 25 - Northern Rengma Naga bible

JEREMIYA 25

¹ Josiya tsa Jehoiakim na Judah kadimi sa keya mejüwa mapi wi hi Apvüwa wi Judah nyithu tsüdi ghena ketsijüh kesü muya. (Tsüna Nebukhadnezzar na Babylonia kadimi sa keya mapi atuwa wi.)

²Hi Judah nu Jerusalem nyithu tsüdi wi khi,

³“Amon tsawa Josiya na Judah kadimi sa keya tagha nu kechengwa wina gho nansü ha kecu amapi ngwe nu kecheng ha Apvüwa na hi ccüneng gho, nu hi khiela ma hi kekiza jüh pi nthu nkizala nsa. Isala nthu na nmeshenchila.

⁴Apvüwa na ma magha atusenjüh-kechüthu kesunchi kinie ben lela nthu na nkina nyelela nmeshenchi.

⁵Mathu na nthu ya gheshighena kahang nu kekuli nkemehai wi nthu na sa keten wi tsü kheneng yalo, isathu nthu na Apvüwa na pi nthu nu nthu bamyithu na pi anuphanla mathu ji sayalo pi kecü ayyiwa witsü hangya benle kesa nthu kiza.

⁶Mathu na nthu acenpvü kepa wi kinyi nu tsüthu kekuli nsala nu nthu kwen pi sa keya atsikezhüthu tsü kinyi nu Apvüwa lebenketsu ncüssi lalo kiza. Keujüla nthu na Apvüwa jühkina lethu ma nthu meten cü nkesa.

⁷Isala Apvüwa na ma ketanla kekhi na nthu na ma jüh kekhi nkina ladha le. Tsüti kesawa nyela nthu na atsikezhü pi ma leben ketsu cüssi nu nthu ketanla kemeten sengho nthu miwi chiyadha.

⁸“Tsalina nthu na ma jüh nkinala kesalina Kekhang ntsawa Apvüwa na khi,

⁹‘Hi anyi tsüdi nu imagha ghena aghawa Babylonia Kadimiwa Nebukhadnezzar kesunchi tendha. Hi mathu ssigho Judah nu ciwi kahangthu nu ma jenphon mizzatentithu tsüdi shunla ssikaghashen den. Hi mizzatenti hawa ha nu ma jenphonthu yasa nu anuphan dedi pi nyu ya ghang pi qhethiketen kesa kesü sa thsüaden . Hi Apvüwa, hi khidha.

¹⁰Hi mathu na anonkeghe nu kenong sala kemagha nu keshanyi kemishu wi anonkeghe hhaithu nmi thsü laden. Mathu na mathu hulathu ghena annitssü nmila, nu kedsakejjü mangla nmilaben.

¹¹ Ayyi hawa tsüdila yasa nu teshiaben, nu nyu na ghang pi qhethiketen kesü saaben. Nu ma jenphon mizzatentithu na amapi achentagü Babilon kadimiwa kekuli saaben.

¹²Tsaseng wi hi Babylonia nu ma kadimiwa kesami ghena meten cüben. Hi diyyi tsüwa yasa pi anuphan dedi thsüaden .

¹³Hi atusenjüh-kechüwa Jeremiya miwi ben nu ajühkhi nu kededi sengho mizzatentithu cüle kitsankechi tsüdi pi Babylonia meten cüaden -— kededi pi lesüshen hawa wi zhüketheng tsüdi.

¹⁴Hi Babilon nyithu na kuli ketheng tsü sengho mathu cü neng den, nu mizzatenti nu kadimi kedithu kejon na mathu pi nssümagha sa thsüaben.’ ”

¹⁵Apvüwa, Israel nyithu Nyiza na hi wi khi, “Kisengtssü hyi wi ileben ketsu pi pong ketheng na ben. Tsü khusen nu hi no kesunchi keben mizzatentithu tsüdi wi wa nu pi mathu jjüya thsülo.

¹⁶Mathu na tsü jjü keya wi hi aghi kesun pi mathu matang kebenwa tsü ghena mathu leben nmetsala nu kenenkhukhu waben.”

¹⁷Tsalina hi Apvüwa kwen wi ahyiwa tsü khuya nu pi Apvüwa na hi kesun pi chi keben mizzatenti tsüdi cü, nu mathu na tsü jjüya thsüa.

¹⁸Jerusalem nu Judah nyutithu tsüdi pi mathu kadimithu nu ccülikesathu gweghe tsü jjü thsü, nu mathu tsüdi ayyikeshü, ghang pi messi nu qhethiketen sa thsüale kesalina, isanu anyithu khili lela sa keben ti mathu nyan sen nu kishen-keshi kesü sa wa.

¹⁹Hawa ha anyi kepathu ahyiwa tsü jjü keyathu nyan tsüdi kezhü: Ejipt kadimiwa nu ma cakhu wi kedithu nu ccülikesathu; Ejipt nyithu tsüdi nu asang Ejipt wi kebenthu tsüdi; Uz yyi wi kadimithu tsüdi; Filistin nyunuti hathu wi kadimithu tsüdi Ashkelon, Gaza, Ekron, nu Ashdod wi hang kebenthu; Edom, Moab, nu Ammon nyithu tsüdi; Tur nu Sidon wi kadimithu tsüdi; Mediterranean yyi tsüdi wi kadimithu tsüdi; Dedan, Tema, nu Buz nyunutithu; Anyi alissen cah pi milute pvü ketenthu tsüdi; Arabia kadimithu tsüdi; Ayyikeshü wi mizza tsüdi kadimithu; Zimri, Elam, nu Media kadimithu tsüdi; Aghawa kelensie nu akete wi kesüsü kadimithu tsüdi; Ayyi miwi keben mizzatenti tsüdila tsü njjüthu yishü. Asakhen ntsawa Babilon kadimiwa na tsü jjüben.

²⁷Isanu Apvüwa na hi wi khi, “Anyithu wi kizalo, hi Apvüwa Kekhang ntsawa, Israel Nyiza na mathu na tsü jjü pi adina nu npi keduwe chu, hi aghi kesun pi mathu matang keben ghena mathu na khulidu nu npi shagha nkeya chu tsü jjüben le khiben.

²⁸Nu keujüla mathu na nkwen wi ahyiwa tsü khupi njjü mvu lethu, mathu wi Apvüwa Kekhang ntsawa na mathu tsü jjüben le kesa khidha le kizalo.

²⁹Hi inyunutiwa wina keyasa kekuliwa tsü sa shhuaden. Mathu tsü kemeten nmula benya benshe meshenten kwe? Nyele, mathu meten cüaben, kepaghenanye hi aghi kesun pi ayyi wi anyi tsüdi miwi chiden. Hi Apvüwa, Kekhang ntsawa na khidha.

³⁰“Jeremiya, no hi kekhi jüh tsüdi pi nthangchithu yishü. No anyi hathu wi hati kizalo, ‘Apvüwa na tang wina nu atssan kemisi ntsa wina ghamo chiden. Ma magha pi ma nyithu matang; ma anyi kesü na kemeshentsse ghaceng keben ti jishaben. Ayyi wi anyi tsüdila ma hhai zaben,

³¹nu ahhaiwa tsüna ayyi kenten wi la kehiki waden. Apvüwa na mizzatentithu kematang kaghatenjüh kesü ben. Ma anyi tsüdi keü ketenpen wi gho nu gheshighenathu pi shü thsüaden . Apvüwa na khidha.’ ”

³²Apvüwa Kekhang ntsawa kekhi na kededi na mizzatenti kesüsü tsüdi miwi ghoden, nu caghamo keti na kelensie wi ayyi kenten wina ghoden.

³³Tsü ghanan wi Apvüwa na pathi ketheng kamangthu tsüna ayyi kenten kesü wina wa kepawa kecu vvüzighe benden. Thola mathu ghena anongü, nu mathu pie wa vhü nben. Tsüthu tsüna acenya pi nponki ketheng ti saaben.

³⁴Qaiyalo, accülikesathu, nthu inyithu kehiethu, magha qailo! Ayyinikhu wi kuweng nu anongülo. Nthu süthi keten tsüwa na ghodha, nu nthu pi aneni süpon ti pathia ben.

³⁵Nthu na bvüya le kesa alen mangla nmi laben.

³⁶Nthu na agükeccü ghena ahathana nu qaiben, kepaghenanye Apvüwa na ma leben ketsu wina nthu mizzatentiwa tsü yasa nu nthu diyyi cca kebenwa tsü yasa pi thengdha.

³⁸Apvüwa na ssensitemi kesü na ma ku teshikea ti ma nyithu teshidha. Aghi kemessi nu Apvüwa leben- ketsu nkemehai na diyyiwa kemili pi ayyikeshü kesü cengdha.