Read Northern Rengma Naga JEREMIYA 26 Bible Online

JEREMIYA 26 - Northern Rengma Naga bible

JEREMIYA 26

¹ Josiya tsawa Jehoiakim na Judah kadimiwa saya meyi.

²Apvüwa na hi wi khi, “Kekinyijjen ccühha wi ngan nu hi pi no kecü tsüdila pi anyi Judah nyunutithu wina kinyile keghothu wi thangchilo. Mangla nteshi lalo.

³Anyithu na tsü zaya nu mathu kekuli nkemehai teshiyala nchü na. Mathu na tsüti saya lethu hi mathu kekuli nkemehai tsüdi ghena kededi pi cüle kiden keben tsü wina hi kemeshen kemili yaden.”

⁴Apvüwa na hi pi anyithu wi khilo kiza, “Hi Apvüwa, hi kesansijüh pi nthu kecü tsü kenie wina ijühkina nu nsathu yishü le khidha,

⁵nu hi imaghathu kesun pi nthu wi chi keghothu, atusenjüh-kechüthu jüh tsü mehaitsü kinalo. Nthu na mathu khi kechi jüh tsü khiela nkina ladha.

⁶ Nthu na ajüh nkeya wi benki ten lethu hi Shilo wi sa kechi ti Kekinyijjen hawa miwi la sa chiden, nu ayyi wi mizzatenti tsüdila anyunuti hawa nyan pi kishen-keshi kesü sa wa ben.”

⁷Keqhaikedithu, atusenjüh-kechüthu, nu anyi tsüdila hi Kekinyijjen wi hathu khi keben za,

⁸nu Apvüwa na hi khilo kekiza tsüdila pi khisha meyi mathu na hi ghanya nu jisha, “Ha ghena no pathi kesa-u sadha!

⁹No mangkesa na Apvüwa nyan wina ajühkhi nu Kekinyijjen hawa hana Shilo wi ti sa nu anyunuti hawa dedi nu thola ciwi nhangla benle khiten nu?” Isanu anyithu na hi vübhonya.

¹⁰Judah ccülikesathu na mangwa sadha khe zakeya wi, mathu na kadijjenwa wina kaghaji sen nu Kekinyijjen wi gho nu khweti-jenka Ketheüwa wi mathu pen saya.

¹¹Tsaseng wi keqhaikedithu nu atusenjüh-kechüthu na accülikesathu nu anyithu wi hati khi, “Anyi hawa hapi shü thsü kesa-ule, kepaghenanye ma ithu nyunutiwa keshun jüh khidha. Nthu ketanla ma jüh zayadha.”

¹²Tsaseng wi hi khi, “Apvüwa na hi kesun pi nthu na zakeya hi khipi Kekinyijjen hawa nu anyunuti hawa keshun jühthu tsüdila khi thsü.

¹³Nthu na sen nu hang keten yenthu tsü teshi nu kuli kebenthu tsü teshi nsathu yishü, nu nthu Pvüwa Anyiza jüh nkinathu yishü. Keujüla nthu na tsüti saya lethu ma keyasa sengho nthu cüle khi ketheng wina ma kemeshen kemiliaben.

¹⁴Ighena lethu hi nthu kekhang cakhu wi benle! Nthu na hi pi nthu tuwi mangwa na meshon nu mehai khe saya mehai.

¹⁵Isala ha chütiyalo: keujüla nthu na hi pathi lethu nthu nu anyunuti hawa wi kahangthu na kesami nkemi nyi kepathi ghena sami shaben, kepaghenanye hi kesun pi kekitsan jüh ha kekhi thsüwa tsüna Apvüwa le.”

¹⁶Tsaseng wi accülikesathu nu anyithu na keqhaikedithu nu atusenjüh-kechüthu wi khi, “Anyi hawa na Apvüwa ithu Nyiza nyan wina ithu wi ajühkhi, ma pi shü thsü yishü le.”

¹⁷Tsaseng wi keshenpfüthu pahan na shagha nu anyi saghu kebenthu wi khi,

¹⁸ “Hezekiya na Judah kadimi sa keben jüwi Moresheth wi atusenjüh-kechüwa Mika na anyithu tsüdi wi Apvüwa Kekhang ntsawa na hati khiben le kesa khi, ‘Zion pi alli kesü ti chhüaben, Jerusalem na yasa pi kenbonki kesü saaben, nu Kekinyijjen yyishiphon wa tsüna ayinong kesü saaben.’ ”

¹⁹Kadimi Hezekiya nu Judah nyithu na Mika pi nshü thsü. Tsüti kesawa nye Hezekiya na Apvüwa kinyikü nu ma kenenwa saya le sa. Tsalina Apvüwa na kededi sengho mathu miwi chile khi ketheng tsü ma kemeshen kemilia. Khili ithu na ithu ketanla qhethiketen sengho ithu miwi chiya zzidha.’

²⁰(Ciwi anyi kepa wi kesü Kiriath Jearim wina keghowa Shemaiya tsa Uriya na Apvüwa nyan wina Jeremiya kekhi ti ajüh khi pi anyunuti hawa nu mizzatenti shun.

²¹Kadimi Jehoiakim, ma süpahizi, nu ma kekhu wi kedithu na Uriya jüh kekhi zakeya wi kadimiwa na ma pathiale kiden. Isala Uriya na tsü cüki zaya, tsalina ma messi nu bvü sen Ejipt wi kuthi wa.

²²Kadimi Jehoiakim na ciwi lela Akbor tsawa Elnathan nu anyi kepa pahan kesun pi Ejipt wi wa Uriya ssigholo wa thsü.

²³Mathu na ma ssi neng gho Kadimi Jehoiakim cüa, nu ma ma pathi nu ma kamang pi nyu kevhüpen wi khala.)

²⁴Isala hi tsü Shafan tsawa Ahikam na isheipi keben ghena hi pi anyithu kwen wi chi nu npathi thsüla.