Read Northern Rengma Naga JEREMIYA 28 Bible Online

JEREMIYA 28 - Northern Rengma Naga bible

JEREMIYA 28

¹ Tsü mapi tsüna Zedekiya na kadimi sa keya mapi mejüwa asha mangawa wi Gebeon nyuti wi atusenjüh-kechü kesü, Azzur tsawa Hananiya na gho Kekinyijjen wi hi ccüneng. Keqhaikedithu nu anyi kepathu tuwi na ma kizala,

²Apvüwa Kekhang ntsawa, Israel Nyizawa na khi, “Hi Babylonia kadimiwa kekhang pakhhidha.

³Amapi keni jüwi hi Babylonia kadimi Nebukhadnezzar na sen nu Babylonia wi bvükea tsanqai tsüdi sengho apen hawa wi chi neng cüaden.

⁴Hi Judah kadimiwa Jehoiakim tsa Jehoiakhin nu Babylonia wi kushinyi sa bvükea Judah nyi tsüdila ssineng ghoaden. Anle, hi Babylonia kadimiwa pathiaben . Hi Apvüwa, hi khidha.”

⁵Tsaseng wi keqhaikedithu nu Kekinyijjen wi ngan keben anyithu tsüdi keben wina hi Hananiya wi khi,

⁶“Amankesa le! Apvüwa na ha sachi ben le kesa hi nondiben! Hi nondi kebenwa lethu ma ntsakhiwa no atusenjüh-kekhi ha sacen cüben nu Babylonia wina Kekinyijjen tsanqaithu nu anyithu ssinu atssüzü sa wa kesathu tsüdi ssi neng ghoaben .

⁷Isala hi no nu anyithu wi khi keben jüh ha kina chilo.

⁸Ishinyi tsü hatu wi kheni atusenjüh-kechüthu kejon na aghikesa, kekhhwenthi, nu kesakinaa na mizzatenti kejon nu kekhang ntsa kadinyuthu miwi ghoben le kesa tucüki khitheng.

⁹Isala atusenjüh-kechü thowa na tucüki kecca na ghoten le kesa khi nu tsü sacen khe, atusenjüh-kechü tsüwa pi Apvüwa na ntsakhiwa ma kesun chi le saden.”

¹⁰Tsaseng wi Hananiya na isun wi asunkeqhan tsü khushiya nu pi pakhhizighe,

¹¹nu anyi tsüdi tuwi na khi, “Apvüwa na ma hatinu Nebukhadnezzar na asunkeqhan pi mizzatentithu tsüdi miwi chi ketheng tsü pakhhiaben, nu ma amapi keni jüwi ha saaben. Isanu hi bvüa.”

¹²Haseng wi matsü pahan wi Apvüwa na hi kizala,

¹³Wa Hananiya wi khi: “Apvüwa na khi, no achan pi asunkeqhan kesawa tsü pakhhiya mehai, isala ma amighe sunkeqhan pi tsü mithon saaben.

¹⁴Apvüwa Kekhang ntsawa, Israel Nyizawa na amighe sunkeqhan pi mizzatenti hathu tsüdi miwi chiaben, nu mathu na Babylonia kadimiwa kekuli sathsü benle khidha. Apvüwa aghangsathu lela pi Nebukhadnezzar kekuli sa thsü benle khidha.”

¹⁵Tsaseng wi hi hapi Hananiya kiza nu hati khinengchi, “Kinalo, Hananiya! Apvüwa na no nkesunchi isala no anyi hathu ya no milikemesa tsü nondi thsüben.

¹⁶Tsalina Apvüwa na ma ketanla kekhi na ma no khupia tenle khiben. No anyithu ya Apvüwa matanglo kekiza ghena no amapi hawa npi kecen jüwi shüaben.”

¹⁷Tsüti Hananiya na tsü mapi asha tagüwa wi shüa.