Read Northern Rengma Naga JEREMIYA 29 Bible Online

JEREMIYA 29 - Northern Rengma Naga bible

JEREMIYA 29

¹ Hi lesü kesü zhüpi keqhaikedithu, atusenjüh-kechüthu, nu accülikesathu, nu Nebukhadnezzar na Jerusalem wina ghan sen nu Babylonia wi atssüzü sa bvü keathu tsüdi cü.

²Hi tsü kezhü tsüna kadimiwa Jehoiakhin, ma jja, kadijjen kehiethu, Judah nu Jerusalem ccülikesathu, kecüchüthu, sapichüthu ssinu atssüzü sa bvükea sengwi sadha.

³Hi lesü kezhü tsüpi Shafan tsawa Elasa nu Hilkiya tsawa Gemariya manyi cü nu Judah Kadimiwa Zedekiya na tsüpi Babylonia Kadimiwa Nebukhadnezzar wi kesunchi. Ciwi kezhü tsüna hati khi:

⁴“Apvüwa Kekhang ntsawa, Israel Nyizawa na ma Nebukhadnezzar ya Jerusalem wina ssinu Babylonia wi atssüzü sa bvü thsü kesa anyithu tsüdi wi khiben:

⁵‘Ajjenthu sa nu ciwi hang walo. Asankuthu sa nu pala pi yang dsalo.

⁶Shanyi kewa sa nu atsangathu benya. Nthu tsangathu la ya shanyi yathsü, isanu mathu la atsangathu benya thsülo. Nthu ji kayi waya nu zeng neng wa yishü.

⁷Hi nthu pi atssüzü sa thsü keben nyunutithu ghena kemehaiwa kulilo. Mathu kuti wina hi wi khielo, kepaghenanye mathu na mehai kayi lethu nthu la mehai kayi yaden.

⁸Hi Apvüwa, Israel Nyiza na nthu jawi atusenjüh-kechüthu nyelela kesü le kesü lela ma tucüki khiten le kesathu tsü ya nthu nmechu thsü lalo. Mathu man tsü n-nondila.

⁹Mathu na inyan wina milimesa pi nthu kizaden. Hi mathu nkesun chi le. Hi Apvüwa, hi khidha.’

¹⁰ “Apvüwa na khiben, ‘Babylonia wi amapi achentagü cen lethu, hi nthu cüki meshen keten pi nthu ccüca nu nthu ssinu ajen wi ghoneng le khi ketheng tsü saaden.

¹¹Hi ketan hi nthu ghena kiden kethengwa tsü chüben, tsüna kededi nyela mehai kayi keya, nthu na ghaketen wi nondi kebenwa tsü sacen kecü senghoaden.

¹²Tsaseng wi nthu gho hi ciben. Nthu na gho hi wi kekhie sa, nu hi nthu kekhie luneng chiben.

¹³ Nthu na hi bha nu hi muyaben. Kepaghenanye nthu na leben tsüdi pi hi bhaben.

¹⁴Anle, hi khiben nthu na hi muya ben le, nu hi nthu ssigho nthu yyi wi chi neng cüaben. Hi nthu jügüzighe pi chikea mizzatentithu wina nthu saghu yaden, nu nthu ssi neng gho hi nthu kesunshikea yyiwa wi chiaben . Hi Apvüwa, hi khidha.’

¹⁵“Nthu na Apvüwa na Babylonia yyi wi atusenjüh-kechüthu pi nthu cüle khiben.

¹⁶Apvüwa na hatu wi David na kekhang sen kegho kadiyyi sen kebenwa nu anyunuti hawa wi kahang nyi nthu shilithu nthu gweghe atssüzü sa nwala kesathu cüki khi keben ha kina chilo.

¹⁷Apvüwa Kekhang ntsawa na khiben, ‘Hi aghikesa, kekhhwenthi, nu kesakinaa sengho mathu miwi chiaben . nu hi mathu ya khhaghabvü bi bighetha sa nu dsaya nketen tsüti sa thsüaden .

¹⁸Hi aghikesa, kekhhwenthi, nu kesakinaa pi mathu jügüden, nu ayyi wi mizzatentithu tsüdila mathu mupi qhethiketen saaden. Hi mathu jügüzighe pi chikea pen kahe wi lela anyithu na mathu miwi kuli kechi tsü mu nu qhethiketen saaben. Anyithu na mathu nankeqhe nu mathu nyan pi kishen-keshi kesü khi waben.

¹⁹Ha mathu miwi saaben, kepaghenanye mathu na hi imagha, nu atusenjüh-kechüthu wina ketsijüh kesun pi mathu wi chi lela tsü nkina la. Mathu na tsü nkina mvula.

²⁰Hi nthu kesun pi Babylonia wi chikeathu tsüdila hi, Apvüwa na khi kebenwa ha kinalo.’ ”

²¹Apvüwa Kekhang ntsawa, Israel Nyiza na Kolaiya tsawa Ahab nu Maaseiya tsawa Zedekiya manyi na ma nyan wina milikemesa pi nthu kiza keben tsü keni cüki khitheng. Ma kekhi na manyi pi Babylonia Kadimiwa Nebukhadnezzar kekhang kwen wi chi nu nthu nyon kemu wina manyi pathiaben .

²²Nu Jerusalem wina ghan sen nu atssüzü sa bvü keathu na kishen-keshi sengho anyi pahan miwi chi mvu lethu mathu na “Apvüwa ya nthu pi Babylonia Kadimiwa na Zedekiya nu Ahab manyi kahang pi mecang kesa ti kesawa salo! isa khiben.

²³Manyi na tsü metuben, kepaghenanye manyi na keqheza kekuli sanu Apvüwa nyan wina milikemesa qhethiketen kesami sadha. Tsüwa tsüna Apvüwa kenen keshun kekuli, ma mathu na mangwa sadha khe chüben, ma chüza kesü sa nu mathu shunden. Hi Apvüwa, hi khidha.”

²⁴Apvüwa Kekhang ntsawa, Israel Nyiza na Nehelam nyiwa Shemaiya ma ketanla ma nyan wina lesüzhü pi Jerusalem nyi tsüdi nu Maaseiya tsa keqhai- kediwa Zefaniya nu keqhaikedi kepa tsüdi kecü tsü ghena ketsijüh kesü pi hi cü. Lesükezhü hawa hana Shemaiya na hati zhü pi Zefaniya cü:

²⁶“Apvüwa na no sapi Jehoiada kuti wi keqhaikedi kesü sa thsüdha, nu no khili Kekinyijjen wi kedi ntsa sadha. No amighe ssüli pi anyi kedeja atusenjüh-kechü ghe sa keten tsü sun hupi thenglo kesa tsüna ndulu sadha.

²⁷No mangkesa tsüti Anathoth nyiwa Jeremiya atusenjüh-kechü kesü ti sala anyithu wi ajühkhi kebenwa miwi kuli nchi nu?

²⁸Ma khen meyathu yishü, kepaghenanye ma Babylonia wi kahangthu wi mathu na ciwi matsü kesie atssüzü sa wa ben na ajjenthu sa nu hang, asanku sa nu mathu na shigü keyathu tsü dsalo kesa mathu kiza.”

²⁹Zefaniya na lesükezhü tsü sipi hi kiza,

³⁰nu tsaseng wi Apvüwa na hi kizala

³¹Shemaiya cüki ketsijüh ha kesun pi Babilon wi atssüzüthu tsüdi wi chilo: “Hi Apvüwa, hi kemeten pi Shemaiya nu ma shicübvüghathu tsüdi cüaden . Hi ma kesun nchi, isala ma atusenjüh-kechü ghe sala nthu ccüneng, nu nthu ya milikemesa nondi thsü. Nthu jawi ma shicübvügha kesütanla ben nben. Ma hang wa hi inyithu ghena pala kemehai kulile keben tsü muya nben, kepaghenanye ma mathu na hi shunlo kiza. Hi Apvüwa, hi khidha.”