Read Northern Rengma Naga JEREMIYA 30 Bible Online

JEREMIYA 30 - Northern Rengma Naga bible

JEREMIYA 30

¹Apvüwa, Israel Nyiza na

²hi wi khi, “Hi no kekiza jüh ha tsüdi pi lesüshen kesü wi zhüyalo,

³kepaghenanye hi inyi Israel nu Judah ssi neng ghoa keten matsü na gho tendha. Hi mathu ssi neng gho hi ayyi pi mathu bamyithu kecü witsü chiaben, nu mathu na tsüwa tsüpi mathu ji sa neng yaben. Hi Apvüwa, hi khidha.”

⁴Apvüwa na Israel nu Judah nyithu wi khiben,

⁵“Hi qhethiketen kesa kiqai hhai, nu kecca nyela kemessi hhai kesü zaben.

⁶Khili ngan nu meshenchi nanlo! Npvüza kesü na atsa pvüghaya mehai kwe? Isathu mangkesa na hi npvüza tsüdila nza kesü na kepvügha naa keben ti ma pvü kevü pi keben muben nu? Mangkesa na anyi tsüdila phalagha saben nu?

⁷Qhethiketen kesa tsathang kesü na ghoden; atsathang kesüla pi tsü ghapeya nben, tsüna inyithu ghena agükeccü tsü kesü; isala mathu na hangyaben.”

⁸Apvüwa Kekhang ntsawa na khiben, “Atsathang tsüwa na gho lethu, hi asunkeqhan na mathu sun qhanpvü kebenwa tsü padhia nu amighe ssüli tsü la khuaden, nu mathu na asangthu nssümagha nsa neng dha.

⁹Tsüti kesawa nyela mathu na hi Apvüwa, mathu Nyiza na David shicübvügha kesü hi ma pi kadimi sa thsü ketenwa kekuli saaben.”

¹⁰ Inyithu, nmessi lalo; Israel nyithu, qhethiketen nsala. Hi ayyi kelensie wi tsü nthu na atssüzü sa keben pen wina nthu kekasha yaden. Nthu na ajjen wi gho neng nu cca hangwa yaben; nthu na yazishu ben yaden, nu thola nthu patemessiya nben.

¹¹Hi nthu wi gho nu nthu hangsha yaben. Hi nthu jügüzighe pi chikea mizzatentithu tsüdila yasaden, isala hi nthu tsü yasa nten. Hi nthu meten ncüla bvü thsüa nten; isala hi khathansha wi nthu meten khe hi kemeshon wina saden. Hi Apvüwa, hi khidha.’

¹²Apvüwa na ma nyithu wi khiben, “Nthu yisü na sapi mehai nkeya sadha, nthu mesa-mena yisü na maya nbendha.

¹³Thola nthu noncca keya nmidha, nthu ghena sapi mehai keya mangla nmidha.

¹⁴Nthu ssinu kinansuli ketenthu tsüdila nthu malidha; mathu na nthu n-ghangchi ladha. Hi ghinyi kesü ti nthu ssikaghashen; nthu kemeten na dhu mtsüa, kepaghenanye nthu kesami na ji mtsü, nu gheshighena na di mtsü le.

¹⁵Nthu mesa-mena ghena leben-nkaghajüh mangla nkhila yilo; nthu ghena sapi mehai keya mangla nmidha. Hi tsüti nthu meten cü, kepaghenanye nthu kesami na ji mtsü, nu gheshighena na di mtsüa.

¹⁶Isala khili tsü nyu nthu meji ketenthu tsüdila mejiaden, nu nthu ghinyithu tsüdila ghan sen nu atssüzüthu ti bvüaden . Nthu pasha ketenthu tsüdila pashaden, nu nthu ji shuya ketenthu tsüdi tsanqai shuyaden.

¹⁷Hi nthu sapi mehai neng cüaden, hi nthu yisü sapi mehaiya thsüaden . nthu ghinyithu na hati khiben lela, ‘Zion tsüna nyu ma yisha kesawa; thola ma cüki meshen nten.’ Hi Apvüwa, hi khidha.”

¹⁸Apvüwa na khiben, “Hi inyithu ssi neng gho mathu yyi wi chiaben, nu nanketizen pi atheghi tsüdi miwi chi cüaden; Jerusalem tsü sapfü cüden, nu ma kadijjen tsü sen neng waden.

¹⁹Anyi ciwi kahangthu na kesengkhwi saaden; mathu na anonkeghe ghena jisha den. Hi kesawegü ghena mathu anyi shakayi yaben; hi kesawegü na kenyuwakü sengho mathu cüaden .

²⁰Hi kheni mizzatenti kekhang tsü sengho, nu tsü pieki neng pi zü cüaden . Hi mathu pasha ketenthu tsüdi meten cüaden .

²¹Mathu kekhang kesenwa na ma ketanla mathu mizzatenti wina shhughoaden, mathu kaditsawa na mathu jawi na shhughoaden. Hi ma ci chithu ma hi tetsaki ghoben; kepaghenanye thowa na nyu ma nkeci wi leben-jjan nu ghoya mehai nu? Mathu na inyithu sa nu hi mathu Nyiza saaben. Hi Apvüwa, hi khidha.”

²³Apvüwa lebenketsu tsüna caghamo nu ameghü nkemehai ti gheshighenathu li miwi waden. Tsüwa tsüna ma saale keben tsü npi sacen keya chu gha nben. Atsathang ghaketen wi ma nyithu na ha methasi chüshi yaben.