Read Northern Rengma Naga JEREMIYA 31 Bible Online

JEREMIYA 31 - Northern Rengma Naga bible

JEREMIYA 31

¹Apvüwa na khi, “Matsü kesü na ghoden, tsü tsüwi hi Israel mizza Nyiza sa, nu mathu na inyithu saaden

²Ayyikeshü wi hi nanketizen pi keshü ghü keyathu ccüca chi. Israel nyithu na khathansha wi keccawa tsü nmvu shagha khe,

³hi kelensie wina mathu ya hi muya thsüaden . Israel nyithu hi keshüthangla nthu ghali ghole, tsüti hi nthu ghaliki ketenwa tsüpi nthu ccüca ben waden.

⁴Hi kheneng kuti nthu sapfü cüden. Kheneng kuti nthu na tamborinthu khou nu anonghethi sala nashü thsüden.

⁵Nthu kheneng kuti Samaria yyishiphon thu miwi kemeshentsse sheng den, nu tsü kishengthu na kemeshentsse lli na mangwa bün cü khe tsü dsaden.

⁶Anle, matsü kesü na ghoden, ciwi ghikehiethu na Efraim yyishiphon thu miwi hati jishaben, ‘Ithu na Zion wi ithu Nyiza Apvüwa wi shu na.’ ”

⁷Apvüwa na khiben, “Mizzatentithu jawi keti ntsawa Israel ghena anonghe nu akhwisalo. Nthu kesengkhwi tsü salo, Apvüwa na ma nyithu hangsha cüdha; ma teshi kethengthu tsüdila kekashayadha!

⁸Hi aghawa na mathu ssigho, nu ayyi kenten wina mathu saghu yaden. Anyon nkemu nu accü nkemehaithu na mathu gweghe ghoden, nu nza atsa-npvü nu pvüghale kebenthu la. Mathu na mizzatenti keti kesü sale ghoneng den.

⁹Inyithu na hi mathu ssinu gho keten wi qai nu kekhie sala ghoaben . Hi mathu ssinu atssü keben akuzathu wi, alen kemehai wi wha nu mathu na ciwi accümeshü nben. Hi Israel ba kesü ti sa, nu Efraim na itsa tssütsewa.”

¹⁰Apvüwa na khiben, “Mizzatentithu, ijüh kinalo, nu ijühthu pi aghüsa kelensie wi thangchilo. Hi inyithu jügüzighea, isala hi mathu saghu neng yaden. nu anenikehiewa na ma nenithu hieya keten ti hi mathu hie yaden.

¹¹Hi Israel nyithu lisha chi cüdha, nu mizzatenti kekhang kesü wina mathu hangsha yadha.

¹²Mathu gho nu anonkeghe ghena Zion Yikha miwi ben nu akhwisa nu ijuthu— asu, kisengtssü nu oliv deli, khaghaneni nu amesüsithu sen nu mathu kenen saaben. Mathu na atssü ten keben sanku kesü ti saaben; mathu nsenthu keyishü tsüdila ben yaben.

¹³Tsaseng wi ghalathu na nashü nu anonghe, nu shenpfü, pvüza nu keqhaithu na anonkeghe saben. Hi mathu lebenkagha sa cü, nu mathu nonke-ü pi anonkeghe sa, nu mathu hathakina pi kenong sa cüaben.

¹⁴Hi kedsakejjü kemehai ntsa pi keqhaikedithu pong cü, nu inyithu na nsenthu keyishü tsüdi pi anonkekwen sayaden. Hi Apvüwa, hi khidha.”

¹⁵ Apvüwa na khiben, “Rama wi ahhai kesü zaben, tsüna qaishüca kesa hhai kesü. Rachel na ma tsangathu ghena qaiben; mathu na nmidha, nu ma nyu ma leben saketecca meya mvu.

¹⁶No nqai layi, nu n-nyontssü nyenpilo. No ntsangathu ghena sakechi tsüdi akutimen nkemu sa nben; mathu na ghinyithu yyi wina kheneng ghoaben .

¹⁷Ghaketen wi ghena no kahang bendha; ntsangathu na ajjen wi ghoneng shaben. Hi Apvüwa, hi khidha.

¹⁸‘Hi Israel nyithu na leben güccü nu kekhie hhai za, “Apvüwa, ithu na nkesansi ghangsa kesü ti keten, isala no ithu sansi pi ajühya thsüa. Ithu ssineng gholo; Apvüwa ithu Nyiza, ithu na no wi kheneng ghoale kiden yadha.

¹⁹Ithu na no wina bvüle, isala ithu na wan ghoneng mvu sa. No ithu meten cü kesa sengwi ithu na hathakina wi ali pvü ncüggüwa. Ithu kimenni nu kejügheya kepaghenanye ithu na ghanyi keben wina sami le.”

²⁰“Israel, no hi kaghali ntsawa itsa, hi ghali ntsa keten ghanyiwa. Hi khathansha wi n-nyan tengchi khe hi kaghali pi no meshen yaden. Hi ileben wi no meshenya; hi nantizen ntsa sa cüden.

²¹Zensuthu pieki chi nu alen kemechan saya; no teshikesa lenwa tsü bha nengya ghoneng lo, Israel nyithu, nthu na teshikesa anyutithu jjen wi kheneng gholo.

²²‘Nthu na khathu kesütu ben ten nu, kenondi nkemi nyithu? Hi pala pahan ketheü nu makepa kesa sachidha, nza kesü na npvüza kesü khwe keben makepa kesa tsüti.’

²³Apvüwa Kekhang ntsawa Israel Nyiza na khi, “Hi khathansha wi anyithu ssigho mathu yyi wi chi nengya khe mathu na Judah yyi anyithu nu ma nyutithu na ajüh ha khineng ben,” “Apvüwa na sawegü pi Jerusalem yyishiphon kemethawa[4] ma hangketen kemetha benwa tsü kecüwa salo.

²⁴Anyithu na Judah yyi nu tsü nyutithu tsüdi wi hangden, nu ciwi allikecathu nu anenikehiethu na mathu nenithu ssinu benden.

²⁵Hi nkhangla kebenthu sapi hhanhashu sa, nu kedsakejjü pi ghama nu nkhangla kebenthu tsüdi anonkwenya thsüaden .

²⁶Tsalina anyithu na khiben, ‘Hi jenwa nan hhanhashu shaghaya le.’ ”

²⁷“Hi Apvüwa, hi anyithu nu aghangsathu pi Israel nu Judah yyi pong cü keten matsü na gho tendha kesa khiben.

²⁸Nu hi mathu pfüpia, zansha, pi khala, yasa, nu pheghe cüle hie kesa tsüti hi mathu pi sheng, nu mathu pieki cüle hieden.

²⁹ Khathansha wi tsüwa tsüna gho khe anyithu na hati khineng nbendha.” “Abajjathu na kemeshentsse bi kesse dsa, isala atsangathu na ayha nqan.”

³⁰Tsüti kesawa nye, anyi thowa na kemeshentsse bi kesse dsa khe ma ketan ma yha nqan ben; nu anyi kesüsü ma ketanla ma kesami ghena shüben.’

³¹ Apvüwa na khiben, “Matsü na ghoden, ciwi hi Israel nu Judah ssinu cenkethenjüh ketheü kesü saaden.

³²Tsüwa tsüna hi mathu bamyithu kwen zan sen nu Ejipt wina keshhugho wi mathu ssinu cenkethenjüh kesa kaghawenwa tsüti nye. Hi mathu wuba kesü ti sagho lela mathu na cenkethenjüh tsüwa tsü n-niela.

³³Hi Israel nyithu ssinu cenkethenjüh ketheüwa sa keten tsüna ha: Hi iyen pi mathu non wi chi nu pi mathu leben wi zhüki cüaden . Hi mathu Nyiza sa nu mathu na inyithu saaden.

³⁴Mathu thola ma pvüshangwa wi Apvüwa chüyalo kesa pi sansi nbendha, kepaghenanye kizza ntsawa na wala kedi ntsawa kecu tsüdila hi chüyaben. Hi mathu kesami teshi cü, nu hi mathu kesazzithu meshen nbendha. Hi Apvüwa, hi khidha.”

³⁵Apvüwa na aghani sapi aghanan wi wegü, asha, ghotsithu pi aghaja wi wegü thsü. Ma atssükedone pakethu chi nu tsü ya ghamo thsü; ma nyan na Apvüwa Kekhang ntsawa.

³⁶Ma sahangkechithu na keben chu, Israel na mizzatenti kesü saben ben kesa ma khishi chitheng.

³⁷Keujüla ghanan kesü atssan kedegüya, nu ayyi giketegüthu bhashiya lethu, ciwi ccüna ma Israel nyithu teshiaben mathu kekuli tsüdi ghena. Hi Apvüwa, hi khidha.

³⁸Apvüwa na khiben, “Matsü na ghoden, ciwi Jerusalem tsüdi sapfü pi inyunuti saaben, tsüna Hananmel Ducükezhü niduwa na wala Accügwen khweti-jenka kecu.

³⁹Nu aggü na ciwi na sasen wa niduwa Gareb yyishiphon wi nu Goa kecu vüben.

⁴⁰Keshü pi vhü nu acenya pi khala keten yyiketijü maben, nu Kidron Kuza meiwa alli tsüdi na wa Goru khweti-jenka na wa nishuwa kecu tsüna ituwi metha ben. Anyunutiwa tsüna khiela gishüzighe nyelela dedi nbendha.”