Read Northern Rengma Naga JEREMIYA 32 Bible Online

JEREMIYA 32 - Northern Rengma Naga bible

JEREMIYA 32

¹ Zedekiya na Judah kadimi sa keya amapi tagha wi Apvüwa na hi kiza, tsüna Nebukhadnezzar la Babilon kadimi sa keya tagha nu tazen mapi.

²Tsü tsüwi Babylonia kadimi süpahizi na Jerusalem ssikaghashen ben, nu hi pi kadijjen ccühha wi khenten theng.

³Kadimi Zedekiya na hi pi ciwi atssüzü sa thsü nu hi Apvüwa na hati khile kesa ghena hi metsi-meni, “Hi Babylonia kadimiwa ya anyunutiwa ha yaya thsüaden,

⁴nu kadimi Zedekiya na bvüya nben. Ma ghan pi Babylonia kadimi kwen wi chiaben; nu ma ciwi ma ssinu kaghangtanli nu ma ccüneng ben.

⁵Zedekiya ssinu Babilon wi wa ben, nu hi ma wi npi kekuli chu ma ciwi benla ben. Ma Babilon nyithu ssikesali lela haicenya nben. Hi Apvüwa, hi khidha.”

⁶Apvüwa na hi kekiza,

⁷Ibiza Shallum tsawa Hanamel na gho hi Benjamin yyi wi Anathoth wi ma lli tsü sheiyalo kesa keshükene, kepaghenanye hi ma theghi ghatsan ntsa kesü, nu tsüpi iji sakeyau na ben.

⁸Tsaseng wi Apvüwa na kekhi ti Hanamel na ciwi accühha wi ghola hi ma lli tsü sheiyalo khi. Tsalina Apvüwa na atsentsa hi kizadha le kesa chüya.

⁹Hi Hananmel wi alli tsü sheiya, nu apisa whu pi ma cüa; ma men na rükatssü tagha nu tagü shhugho.

¹⁰Hi keshei-kejeü lesü wi inyan zhü nu kemechan sachi, chüza sachi, nu kuwhuchan wi apisa whu.

¹¹Nu hi sheikeya lesü keniqho khuya — ma jjügi zhü nu kemechan sakea, nu tsüti pi nyu kecü lesüwa la saya —

¹²nu tsüthu pi Maseiya tsawa Neriya tsa Baruk cüa. Hi Hananmel nu kepa wi chüza sa nu keshei-kejeü lesü wi mathu nyan zhü keyathu nu anyi accühha wi donki kebenthu tuwi na lesü keni tsüpi ma cüa.

¹³Mathu tsüdi tuwi na hi Baruk kiza,

¹⁴“Apvüwa Kekhang ntsawa, Israel Nyizawa na no keshei-kejeü lesü wi kemechan sayakea nu pi nyu kecü lesüwa ha keniqho khuya nu pi ayyipfü kesü wi chiyalo kesa ahza pi no cüben, isanu tsü ya ghaketen mapithu wi ghena noncca pi thengle kesalina.

¹⁵Apvüwa Kekhang ntsawa, Israel Nyizawa na ayyi ha wi ajjen, alli nu kemeshentsse llithu shei neng yaben kesa khitheng.”

¹⁶Hi keshei-kejeü lesü tsüpi Baruk kecü sengwi kekhie sa,

¹⁷“Kemisintsa Apvüwa, no no kekhang keti nu kezü wi atssan nu ayyi sachi; mangla nghena dhu mtsü kesa nmi.

¹⁸No nantizenki kesa pi anyi hazar hazar ccüca, isala no mathu bajjathu kesami ghena la kemeten pi anyithu cü. No di nu khang ntsa kesa Nyiza kesü le; no Apvüwa Kekhang ntsa tsü le.

¹⁹No acho kemetsa kiden nu pala ketiti kuliden; no anyithu na kuli keten tsüdila mu, nu mathu kekuli qei wina akutimen pi cüden.

²⁰Matsü kesie wakea wi no Ejipt wi amankesa kekulithu sa, nu nansü kecu Israel wi le mizzatentithu tsüdi wi lela tsüthu saben, tsalina khili apen kahe wi tsüdila no chüben.

²¹Amankesa kekulithu na ithu ghinyithu pateqhe kesa tsü wina no kekhang kesü sen nu Ejipt wina no n-nyi Israel ssinu shhugho.

²²No mathu bamyithu tuwi khishi ketheng ti ayyi kemehai kenyan ha pi mathu cü.

²³Isala mathu na ayyi hawa wi gho yaya keya sengwi mathu na no khukechi jüh nkina nyelela no pi nyu kesansijüh nie nu tsüti nhangla; mathu na no mathu salo ahza khukechithu tsü mangla nsa. Tsalina no kededi hathu sengho mathu miwi chidha.

²⁴“Babilon nyithu na anyunutiwa tsü yasale kesalina ayyi pi aghikehiepenthu zhüki pi tsü vüyadha, nu mathu na kaghashenben. Aghikesa, kekhhwenthi, nu kesakinaa ghei ghena anyunutiwa pi mathu kwen wi du thsüaden . Nthu na khi kegho jüh tsüdi sadhale kesa nthu na muya mehai.

²⁵Isala Kemisintsa Apvüwa, Babilon nyithu na anyunuti hawa ha yaya tendha lela no hi chüzathu na keben wi alliwa tsü shei yalo ahza pi hi cü.”

²⁶Tsaseng wi Apvüwa na hi wi khi,

²⁷“Hi Apvüwa, anyi tsüdi Nyiza. Mangla ighena dhu mtsü kesa nmi.

²⁸ Hi anyunuti hawa khupi Babylonia kadimi Nebukhadnezzar nu ma süpahizi cüale saben; mathu na tsü yaya

²⁹nu anni pi mecang shaben. Mathu na tsüpi anyithu na hankedemvu mecang pi Baal kinyi nu kisengtssü meyisha pi acenpvüthu kekinyi kesa wi hi ya lebentsu thsü kesa jjenthu tsü saghu pi mecang shaben.

³⁰Mathu cüki aghatsan wina kegho tsü Israel nyithu nu Judah nyithu na mathu kekulithu wi hi nkenen sa nu hi ya lebentsu thsü ghodha.

³¹Anyunuti hawa wi kahang nyithu na tsü kekuli ghanan nten na hi ya leben minu nu aghepvü thsüdha. Hi tsü dedi thsüale südheyadha.

³²Judah nu Jerusalem nyithu pi mathu kadimithu, accülikesathu, mathu jawi keqhaikedithu nu atusenjüh-kechüthu saghu nu kekuli nkemehai kesa tsüdi ghena.

³³Hi mathu sansiki ben lela mathu na hi wina khapeghe bvüa, nu mathu na kina nu chüyale sa nten.

³⁴ Mathu na atsikezhü nankiqananthu tsü lela pi hi kinyi thsüle Kekinyijjen sa kethengwa witsü kechi ghena tsü nakhidha.

³⁵ Mathu atsangathu pi acenpvü Molek kinyile kesa Hinnom Yyiketijü wi kekinyipen sapi Baal cü. Hi mathu na ha salo nkiza, nu mathu na hati sa nu Judah nyithu sapi sami thsüben kesa ileben wila ndugho.”

³⁶Apvüwa Israel Nyiza na hi kiza, “Jeremiya, anyithu na aghikesa, kekhhwenthi, nu kesakinaa ghei ghena anyunuti hawa ya Babylonia kadimi kwen wi du thsüa benle khiben. Khili hi kepa wi la mangwa khile ben khe kina chilo.

³⁷Hi ileben ketsu nu keminu wi anyithu jügüzighe pi chikea, diyyithu tsüdi wina mathu saghu yaden, nu hi mathu ssi neng gho apen hawa wi chi nu mathu ya hewi yazishu hangya thsüaden .

³⁸Isanu mathu na inyithu sa, nu hi mathu Nyiza saaden.

³⁹Hi kahang ghena ajjügi kesütan pi mathu cüden: tsüna mathu matsü tsüdi wila hi kinyikü, tsüti kesa tsüna mathu ketanla mathu ghena nu mathu shicübvüghathu ghena la kemehai.

⁴⁰Hi mathu ssinu anuphan ghena cenkethenjüh kesü saaden. Hi khiewi la mathu ghena pala kemehai nkulila sa nben, nu hi mathu ya aleben tsüdi pi hi messi thsü, isanu mathu khiela hi wina nbvü thsüle kesalina.

⁴¹Hi mathu ghena pala kemehai kekuli wi hi kenen saaben, nu hi ayyi hawi anuphan ghena mathu pieki cüaden .

⁴²“Hi kededi ha sengho anyi hathu miwi kechi tsüti hi pala kemehai khishi ketheng tsüdi pi mathu cüaden .

⁴³Anyithu na ayyi hawa ha pi ayyikeshü kesü sa nu anyi nyelela aghangsathu la hang nben, nu tsüpi Babilon nyithu kwen wi chiaben le kesa khiben. Isala ayyi hawa wi allithu kheneng kuti shei yaben.

⁴⁴Anyithu na tsüthu shü nu keshei-kejeü ghena anyan zhüpi kemechan sa, nu chüza la saaben. Hati kesa ha Benjamin yyi wi, Jerusalem kevü wi, anyunutithu wi, nu Judah nyunutithu wi nu yyishiphon diyyiwa nyunutithu wi, yyishiphon thu ccü wi, nu Judah cülawa wi saaben. Hi inyithu ssi neng gho mathu yyi wi chiaben . Hi Apvüwa, hi khidha.”