Read Northern Rengma Naga JEREMIYA 34 Bible Online

JEREMIYA 34 - Northern Rengma Naga bible

JEREMIYA 34

¹ Babilon kadimi Nebukhadnezzar nu ma süpahizi kekhu wi keben mizzatentithu nu amizzathu tsüdi wi süpahithu na kiqa nu gho Jerusalem nu tsü kevü anyutithu ssikaghashen keben wi Apvüwa na hi ccüneng.

²Apvüwa, Israel Nyiza na hi wala Judah Kadimi Zedekiya kizalo khi, “Hi Apvüwa, hi anyunuti ha pi Babylonia kadimi kwen wi chi nu ma tsü mecang shaben.

³No bvüya nben; no ghanya nu pi ma kwen wi chiaben. No ma ssinu ammi kemuliden, nu no ketanla npvüwa na ma ssinu keccünengli den, tsaseng wi no ssinu Babylonia wi waben.

⁴Zedekiya, hi ncüki mangwa khiben khe kinalo. Aghi wi no pathi nben.

⁵No cca nu shüben, ntuwi nbamyithu pi kevhü wi anyithu na hankedemvu kemecang tsüti mathu na no ghena hankedemvu mecangben. Mathu na no qaiki nu khiben, ‘Ithu Kadimiwa na shüdha.’ Hi Apvüwa, hi khidha.”

⁶Hi ketsijüh ha pi Jerusalem wi Kadimi Zedekiya cü,

⁷tsüna Babylonia süpahizi na anyunutiwa ssikaghashen keben wi. Süpahiziwa na Judah nyunutithu khwetivü ketheng keni ketan sakea Lakhish nu Azekah tsü la ssisaben.

⁸Kadimi Zedekiya nu Jerusalem nyithu na ajühkecen kesü sa

⁹nu mathu Ibri nyi npvüza nu nza nssümaghathu teshichi nu thola ma Israel nyithu pi nssümagha nsa thsülale kesalina.

¹⁰Anyi tsüdi nu mathu ccülikesathu na mathu nyi nssümaghathu teshichia nu khiela mathu pi nssümaghathu nsa neng lale cenya. Mathu na tsüthu teshichia,

¹¹isala asakhen wi mathu kemeshen kemili nu tsüthu ssi neng gho, nu mathu meten pi nssümaghathu sa neng thsüa.

¹²Tsaseng wi Apvüwa,

¹³Israel Nyiza na hi anyithu wi khilo kiza, “Hi Ejipt wi nthu bamyithu kekashaya nu nssümagha kesa wi mathu lisha keya wi mathu ssinu cenkethenjüh kesü satheng. Hi mathu kizala,

¹⁴ amapi tagü kaghapeng wila Ibri nyi kesü le kesü lela amapi tugho mathu nssümagha sakea nyi teshi chilo kiza. Isala nthu bamyithu na hi mathu kekiza jüh tsü nkhichi nyelela nkinala.

¹⁵Ghanan pahan wakea wi nthu na kemeshen kemili nu hi kenen sa. Nthu tsüdi nthu pvüshang Israel nyithu teshi chiale kesa ajühcenya, nu nthu na hi kinyi keten Kekinyijjen wi ituwi na cenkethenjüh kesü saya.

¹⁶Isala tsü sengwi nthu kemeshen kemili nu hi kinyikü nsala. Nthu na samvu keten ti nthu tsüdila nthu na teshikea nssümaghathu tsü ssi nengya, nu mathu meten pi nssümagha kekuli sa neng thsüa.

¹⁷Tsalina hi Apvüwa, hi nthu na ijüh meya ladha le kesa khiben; nthu na nthu pvüshang Israel nyithu ya mathu kemeshen nsa thsü. Mantsadha, isalethu hi kemeshen saya kemehai pi nthu cü na: kemeshen sa keyawa tsüna aghikesa, kesakinaa ghei, nu kekhhwenthi wi keshü. Hi ayyi wi mizzatentithu tsüdila sapi hi nthu miwi kulikechi tsü ghena qhethiketen sa thsüaden .

¹⁸Judah nu Jerusalem wi kedithu pila kadijjen wi kedithu, keqhaikedithu, nu accülikesathu tsüdila amesü süpon kesü hakhhi keni sa nu tsü jüwi alentsenla hi ssinu cenkethenjüh kesü sa. Isala mathu na cenkethenjühthu tsü bheghe nu tsü n-niela. Tsalina hi anyi hathu miwi mathu na amesü süpon miwi kuli kechi tsü makesü sa cüden.

²⁰Hi mathu pi mathu pathiale keben ghinyithu kwen wi chiaben, nu mathu kamangthu tsü awathu nu aghangsathu na dsa ben.

²¹Hi Judah Kadimi Zedekiya nu ma kekhu wi kedithu la pi mathu pathi mvu kebenthu kwen wi chiaben . Hi mathu pi nthu ssi nkaghashen lakeathu Babylonia süpahizi kwen wi chiaben .

²²Hi ahza pi mathu cü nu mathu anyunuti hawa wi kheneng ghoaben . Mathu na tsü ssikaghashen, nu tsü yaya nu tsü mecang shaben. Hi Judah nyunutithu pi ayyikeshü wi thola hang nketen tsüti sa thsüaben. Hi Apvüwa, hi khidha.”