Read Northern Rengma Naga JEREMIYA 35 Bible Online

JEREMIYA 35 - Northern Rengma Naga bible

JEREMIYA 35

¹ Josiya tsa Jehoiakim na Judah kadimi sa keben wi Apvüwa na hi wi khi,

²“Rekhab nyithu gei wi wa nu mathu ccünenglo. Tsaseng wi ssigho Kekinyijjen keshondhi kesü wi chi nu kisengtssü pahan pi mathu cülo.”

³Tsalina hi Rekhab gei maben ssiya — Jaazaniya (Habazziniya tsawa Jeremiya kepawa tsa) nu ma cünyuthu nu mathu tsathu tsüdi —

⁴ssigho Kekinyijjen wi chia. Hi mathu ssigho Igdaliya tsa Hanan atusen- jühkechüwa senkeniethu jjenkeshondhi wi chia. Ajjen-keshondhi hawa ha Shallum tsa Maaseiya, Kekinyijjen wi kedi kesü jjenkeshondhi meiwa, nu kedi kepathu jjenkeshondhi kete wi.

⁵Tsaseng wi ahyi nu akhuzzathu wi kisengtssü pongti keben tsüpi Rekhab nyithu tuwi chi nu hi mathu wi khi, “Kisengtssü pahan jjüyalo.”

⁶Isala mathu na luneng, “Ikhang na kisengtssü jjü ntenle. Ikhang baqhai Rekhab tsawa Jonadab na ithu kekiza na ithu nyelela ithu shicübvüghathu lela kisengtssü mangla njjü lalo khile.

⁷Ma ikhang kekiza na ajjenthu nsala nyelela allithu ncahla, nu kemeshentsse lli sheng nyelela tsüthu shei nsa lalo khi. Ma ikhang na keshüthangla anithsüjjen wi hanglo kesa ahza khuchi, isanu ikhang ya kijünyithu ti sa nu hang keben yyi hawa wi ben thsüle kesalina.

⁸Ikhang na Jonadab na pi ikhang kecü kecükegwethu tsüdila niegho ben. Ikhang na khiela kisengtssü jjü nten, nu ikhang wubvüthu, atsangathu, lela.

⁹Ikhang na benle kesa ghena ajjenthu sa nten — ikhang na anithsüjjen wi hangden — nu ikhang na kemeshentsse lli, alli, nyelela asu mangla nmi. Ikhang na ikhang baqhaiwa Jonadab na ahza pi ikhang kecü tsüdi kinaden.

¹¹Isala Kadimi Nebukhadnezzar na diyyiwa nka kegho wi ikhang na Babylonia nu Siriya süpahizithu tubvü sen nu Jerusalem wi ghoale kesa südheya. Tsalina ikhang na Jerusalem wi hang benle.”

¹²Tsaseng wi Apvüwa Kekhang ntsawa, Israel Nyiza na hi wala Judah nu Jerusalem nyithu wi khilo kiza, “Hi Apvüwa, nthu mangkesa na ijüh nkina nu hi kecükegwethu n-nie nu kesa keüben.

¹⁴Jonadab shicübvüghathu na ma mathu kisengtssü njjü lalo kekhi tsü niedha. nu nansü kecu mathu thola mangla njjü laben. Isala hi nthu kizakeni ben lela nthu na ijüh nkina mvu.

¹⁵Hi imagha atusenjüh-kechüthu tsüdi nhandhila kesun pi nthu wi chi, nu mathu na nthu na kekuli nkemehai tsü teshi nu mangwa meshon khe salo kesa nthu kizadha. Mathu na nthu acenpvü kepa wi kinyi nyelela tsüthu kekuli nsa lalo kitsanchi, isanu nthu na hi ayyi pi nthu nu nthu bamyithu kecü witsü hangyale kesalina. Isala nthu na ijüh nkina nyelela tsü nkhichila.

¹⁶Jonadab shicübvüghathu na mathu baqhaiwa na ayen pi mathu kecü tsü nie ghodha, isala nthu na ijüh nkina mvu.

¹⁷Tsalina hi Apvüwa, Israel Nyizawa, hi khili kededi khishi kethengthu tsüdi sengho nthu Judah nu Jerusalem nyithu miwi chi cüaden . Hi ha saaden kepaghenanye nthu na hi nthu ccüneng lela ijüh nkina, nu hi nthu ci lela nthu na n-nusha mvu.”

¹⁸Tsaseng wi Rekhab nyithu gei wi Apvüwa Kekhang ntsawa, Israel Nyizawa na kekhi pi mathu kiza, “Nthu na nthu baqhaiwa Jonadab khukechi jüh kina; nthu na ma kecükegwethu tsüdi nie, nu nthu na ma nthu wi khi kechi tsüdi sadha.

¹⁹Tsalina hi Apvüwa Kekhang ntsawa, Israel Nyizawa na khishi chiben, keshüthangla Rekhab tsa Jonadab shicübvügha npvüza kesü na hi kekuli saaben.”