Read Northern Rengma Naga JEREMIYA 36 Bible Online

JEREMIYA 36 - Northern Rengma Naga bible

JEREMIYA 36

¹ Josiya tsa Jehoiakim na Judah Kadimi saya nu amapi mejüwa wi Apvüwa na hi wi khi,

²“Kezhüllu kesü khuya nu Judah nu Israel, nu mizzatentithu tsüdi cüki pi no kekiza tsüdi pi tsü miwi zhüya. Josiya na kadimi sa keben wina gho khili kecu hi no ccüneng kegho tsüdi zhüya.

³Judah nyithu na hi sen nu mathu miwi ghole keben kededithu cüki tsüdi zaya nu mathu kekuli nkemehai wina kheneng sen nu hi wi gho nashe, isathu hi mathu gheshighena kekuli nu kesamithu teshi cüaden .”

⁴Tsalina hi Neriya tsawa Baruk cichi nu Apvüwa na hi wi khi kechi jüh tsüdila pi ma kiza. Nu Baruk na tsü maben pi kezhüllu kesü wi zhüya.

⁵Tsaseng wi kecükegwe hathu ha pi Baruk cü: “Hi ya Kekinyijjen wi ndu thsü ladha.

⁶Isala hi no ya hasengwa anyithu na kezi sa keben wi ciwi wa thsü mvuben. No kezhüllu tsü misikhhali si chiben, isanu mathu ya Apvüwa na hi wi khi nu hi khipi no ya zhükeya thsü tsüdila zaya thsüle kesalina. Tsüti sa nu anyi kesüsü tsüdi nu Judah nyithu mathu nyutithu wina gho kebenthu tsüdila mehaitsü zashiya kemehai salo.

⁷Mathu na Apvüwa wi khie nu mathu kekuli nkemehai wina kheneng ghoyala mehai le, kepaghenanye Apvüwa na ma leben ketsu nu keminu pi anyi hathu pateqhe theng.”

⁸Tsalina Baruk na hi ma salo kekiza ti Kekinyijjen wi Apvüwa jüh tsü sichi.

⁹Jehoiakim na Judah kadimi sa keya amapi mangawa asha tuguwa wi anyithu na Apvüwa kenen muya le kesa ghena kezi sa. Jerusalem wi kahangthu nu Judah nyutithu wina keghothu tsüdila kezi tsü sa.

¹⁰Tsaseng wi anyithu tsüdila kina keben wi Baruk na kezhüllu wi hi khi kechi tsüdila sichi. Ma Kekinyijjen wi Shafan tsawa Gemariya ajühkekaghaten wi kezhüwa jjenkeshondhi wina ha si. Ma jjenkeshondhi na ajüh kekaghatenpen tangwa wi Kekinyijjen khweti-jenka Ketheüwa kete witsü.

¹¹Shafan tsawa Gemariya tsa Mikaiya na Baruk na kezhülluwa wi Apvüwa na kekhi jüh sikechi tsü zaya.

¹²Tsaseng wi ma kadijjen wi ajüh kekaghaten wi kezhüwa jjenkeshondhi wi kedithu tsüdila keccünengli keben wi du. Elishama, ajüh kekaghaten wi kezhüwa, Shemaiya tsa Delaiya, Akhbor tsa Elnathan, Shafan tsa Gemariya, Hananiya tsa Zedekiya, nu kedi kepathu la ciwi ben.

¹³Baruk na pi anyithu wi sikechi Mikaiya na zakeya tsü tsüdi pi mathu kiza.

¹⁴Tsaseng wi kedithu tsüna Jehudi (Kushi tsawa Shelemiya tsawa Nethaniya tsa) kesun pi wala Baruk na pi anyithu wi sikechi kezhülluwa tsü sen nu gholo kiza thsü. Baruk na kezhüllu tsü sen wa mathu cüa.

¹⁵Mathu khi, “Donki nu kezhülluwa tsü sipi ithu kizalo.” Tsalina Baruk na tsü si.

¹⁶Ma tsü sikechi sengwi mathu messila khokho kaghangli nu Baruk wi khi, “Ithu na ha pi Kadimiwa nkizathu yishü le.”

¹⁷Tsaseng wi mathu na ma wi keü, “No khatinu hathu ha tsüdi zhüya khe pi ithu kiza ma? Jeremiya na khi nu no zhüyala?”

¹⁸Baruk na luneng, “Jeremiya na ajüh tsüthu kesüsü na khi, nu hi tsüpi kezhüllu hawa miwi zhüya le.”

¹⁹Tsaseng wi mathu na ma wi khi, “No nu Jeremiya nshinyi kuthiwa nsathu yishü. Thola nshinyi khiewi ben khe nchü thsüla.”

²⁰Kedithu na kezhüllu tsüpi ajüh kekaghaten wi kezhüwa Elishama jjenkeshondhi wi chi nu kadimiwa pen wi du nu mathu na tsüdi khi pi kadimiwa kiza.

²¹Tsaseng wi kadimiwa na kezhülluwa tsü sen gholo kesa Jehudi kesun chia. Ma wa Elishama jjenkeshondhi wi tsü khuya nu pi kadimiwa nu ma vüla ngan keben kedithu tsüdi wi sichi.

²²Tsüna pathsü wi, tsalina kadimiwa na pathsü kadijjen tuwi anni kete wi donkiben.

²³Jehudi na kezhüdhi kecheng mejü sisha meyi kadimiwa na annuza kesü pi tsü handhi pi annibhon wi cüchia. Ma kezhüllu maben pi npi kemechankhi chu tsüti sa.

²⁴Isala kadimiwa nu ma kekhu wi kedithu ha tsüdi zakeyathu lela thola nmessi nyelela hathakina zensu mangla nsa.

²⁵Elnathan, Delaiya, nu Gemariya hathu na kadimiwa wi kezhüllu tsü nmechang lalo khie lela ma mathu jüh nkina.

²⁶Tsaseng wi ma ahza pi Kaditsa Jerameel cü nu Azriel tsa Seraiya nu Abdeel tsa Shelemiya gweghe nu hi nu kezhüwa Baruk ishinyi ghan yalo sa. Isala Apvüwa na ishinyi pi kuthi cüa.

²⁷Kadimi Jehoiakim na hi khipi Baruk kiza nu zhükeya kezhüllu tsüpi kemecang sengwi Apvüwa na hi kizala,

²⁸kezhüllu kepa wi khuya nu atuwa miwi zhüketheng tsüdi pi tsü miwi zhüpfü yalo khi.

²⁹Apvüwa na hi kadimiwa wi khilo kiza, “No kezhülluwa tsüpi mecangdha, nu no Jeremiya wi mangkesa na Babylonia kadimiwa na gho ayyi ha yasa nu ma nyithu nu asahangthu pathia benle kesa pi zhütheng nu kesa keü.

³⁰Tsalina hi Apvüwa, hi khili no, Kadimiwa Jehoiakim kizaben, nshicübvügha kesütanla David Kadiyyi miwi kekhang senya nbendha. Nkamang pi khala nu aghanan wi thsü nu aghaja wi akejan caki isaben.

³¹Hi no nu nshicübvüghathu, nu no kekhu wi kedithu meten cüaden . nthu tsüdi kesami kesa ghena. No nyelela Jerusalem nu Judah nyithu na hi nthu kekitsanthu tsü nkhichi, tsalina hi khiteqhe ketheng ti wan kededi sengho nthu tsüdi miwi chiaben .”

³²Tsaseng wi hi kezhüllu kepa wi khuya nu pi ighena kezhüwa Baruk cü, nu ma hi kekhi tsüdi zhüya. Ma kezhüllu atuwa wi keben nu ketsijüh tsüti kesa hi khipi ma kekiza tsüdila zhüya.