Read Northern Rengma Naga JEREMIYA 38 Bible Online

JEREMIYA 38 - Northern Rengma Naga bible

JEREMIYA 38

¹Mattan tsa Shafatiya, Pashhur tsa Kedaliya, Shelemiya tsa Jehukal, nu Milkhiya tsa Pashhur, hathu na hi anyithu wi

²Apvüwa na kekhi jüh pi kiza keben zaya, “Anyi kesü le kesü lela anyunuti hawa wi ben wa kesawa na aghikesa, kekhhwenthi nyelela kesakinaa ghei wi shüaben. Isala thowa na shu nu Babilon nyithu kwen wi du khe shü nben, nu ma kahang hangsha yaben.”

³Hi mathu wi Apvüwa na kekhi jüh la pi kizaben, “Hi anyunutiwa ha pi Babilon süpahizi cüale saben, nu mathu na tsü yayaben.”

⁴Tsaseng wi kedithu na kadimiwa wi wa nu khi, “Anyi hawa ha pi shü thsü nsathu yishü. Ma hati kekhi wina anyunutiwa wi süpahithu na lebenzza ben, nu ma hati kesa pi anyunutiwa wi kebenthu tsüdi kizaben. Ma anyithu kiqale sa nben; ma mathu patenale sa keben ketan le.”

⁵Kadimi Zedekiya na luneng, “Mantsadha, isathu nthu na ma pi mangwa nsathu yishü khe saya yilo, hi nthu khenya nten na.”

⁶Tsalina mathu na hi ssiya nu ali pi hi hu pi kadijjen khemi wi Kaditsa Malkhiya tssükhang wi chia. Atssükhang tsüwa wi atssü nmila anisha ketan, nu hi anisha non wi dua.

⁷Isala Sudan nyiwa Ebedmelek, kadijjen wi kuli keten kedi kesü na mathu na hi pi atssükhang wi chidhale kesa zaya. Tsü tsüwi kadimiwa na Benjamin Khwetijenka wi ajühkaghaten ben.

⁸Tsalina Ebedmelek na ciwi wala kadimiwa kiza,

⁹“Njenkebenwa, anyi hathu na sa ketheng ha sazzi benle. Mathu na Jeremiya pi atssükhang wi chidha, nu ma ciwi khhwenthi metsi, kepaghenanye anyunutiwa wi kedsakejjü nmiladha.”

¹⁰Tsaseng wi kadimiwa na Ebedmelek na meshu kecheng pi ma wwaya nu hi npi keshü wi atssükhang wina hi zanshi yalo ahza khuchia.

¹¹Tsalina Ebedmelek na mathu ssiya nu wan kadijjen tsanqai ketheng pen wi athsüqae pahan khusengho ali pi mesüten nu pi hi wi changchi cü.

¹²Ma ali ya hi han ntena thsüle kesalina tsüpi ihhagu keshi yalo kiza. Tsalina hi tsüti saya.

¹³Isanu mathu na atssükhang wina hi zanshiya. Tsaseng wi hi pi kadijjen ccühha wi theng.

¹⁴Matsü kepa wi kesü Kadimi Zedekiya na hi ssinu Kekinyijjen kedulen kechengwa wi ma wi gho thsü nu ma khi, “Hi pala kesü pi no keü mvuben.”

¹⁵Hi ma luneng, “Keujüla hi atsentsawa pi no kiza lethu no hi pi shü thsüaben, nu hi no sansichi lela no mangla sa nu tsü kina nben.”

¹⁶Tsalina Kadimi Zedekiya na kuthila hi wi khishi chi, “Hi hangkebenwa Anyiza, kahang pi ithu cü ketenwa Anyiza nyan wina hi no pi shü thsü nben nyelela pi no pathi mvu kebenthu kwen wi chi nbenle kesa kishenben.”

¹⁷Tsaseng wi hi Apvüwa Kekhang ntsawa, Israel Nyizawa na kekhi pi Zedekiya kiza, “No Babylonia kedithu kwen wi du lethu no kahang heisha yaben, nu anyunutiwa ha la mecang nben. No nu ntheghi na hang yaben.

¹⁸Isala no mathu kwen wi ndu lethu anyunuti hawa pi Babilon nyithu cü nu mathu na tsü mecang thsüaben, nu no mathu tubvüya nben.”

¹⁹Isala kadimiwa na luneng, “Hi ithu nyithu na Babilon nyithu wiwa sa wa kesathu messiben, hi pi mathu kwen wi chi nu hi metenmesha thsüya mehai.”

²⁰Hi khi, “No pi mathu kwen wi chia nben. Hi no Apvüwa ketsijüh kinalo khieben, isathu nghena tsüdila mehai yaben, nu no kahang heisha yaben.

²¹Isala no mathu kwen wi ndu mvu lethu khati saaben khe Apvüwa na kemanthi kesü pi hi ccücadha.

²²Ciwi hi Judah kadijjen wi teshi ketheng nzathu tsüdila ssi sen nu Babilon nyi kedithu wi wa keten mule. Mathu na wa keten len wi mangwale khi khe kinalo: ‘Kadimiwa pvüshang kemehai ntsathu na ma len tsütson sadha, mathu na ma miwi kekhang senyadha. Nu khili ma ccü na anisha wi dudha, ma pvüshangthu na ma teshidha.’ ”

²³Tsaseng wi hi khineng, “N-nyi nza nu ghanyithu tsüdi ssinu Babilon nyithu wi wa, nu no lela mathu tubvüya nben. Babylonia kadimiwa na no ghan pi atssüzü saya, nu anyunuti hawa mecang shaben.”

²⁴Zedekiya na khineng, “Thola keccünengli cüki hawa ha nchü thsü lalo, isathu no kahang wi kemessi mangla nmi.

²⁵Keujüla kedithu na hi no ccüneng le kesa za lethu, mathu na gho no wi ishinyi na mangwa khi khe keüben. No pala tsüdi pi mathu kiza lethu mathu na no pi shü thsü nbenle kesa khiben.

²⁶Hi no kesun pi atssüzüjjen wi chi neng nu ciwi nshü thsü lalo kesa khiele mathu wi kizalo.”

²⁷Tsaseng wi kedithu tsüdi gho hi wi keü, nu hi kadimiwa na hi khilo kekiza tsüti pi mathu kiza. Mathu na tsü miwi mangla sa meyala, kepaghenanye thola keccünengli hhai tsü nza.

²⁸ Nu Jerusalem tsü nka keya tsathang npi kecu chu hi pi kadijjen wi ben thsüa.