Read Northern Rengma Naga JEREMIYA 39 Bible Online

JEREMIYA 39 - Northern Rengma Naga bible

JEREMIYA 39

¹Zedekiya na Judah Kadimi sa keya amapi tuguwa asha taghawa wi Babilon Kadimi Nebukhadnezzar na ma süpahizi ssigho Jerusalem ssikaghashen.

²Zedekiya na kadimi saya nu amapi taghakhen asha mejüwa tugu ghanan wi anyunutiwa khweti na pakhhizighea.

³(Jerusalem nkaya, [5] Babilon kadimiwa kekhu wi kedithu tsüdila ghola Anonwa Khweti-jenka pi Nergal Sarezer, Samgar Nebo, Sarsekhim, nu Nergal Sarezer kepawa saghula yapi mathu pen saya.)

⁴Kadimi Zedekiya nu ma süpahizi tsüdila mangwa saben khe mukeya wi mathu na aghaja wi anyunutiwa tsü teshiale kiden. Mathu na kadi sanku teshi nu ajjen-keshon keni zanghu ketheng khweti-jenka wi wa nu Jordan Yyiketijü kepeghe wiwa bvüya.

⁵Isala Babilon süpahizi na mathu jügü sen wa Jerikho deshentijü kete wi Zedekiya ghanya. Nu mathu na ma ssinu Kadimi Nebukhadnezzar na Hamath yyi wi Ribla nyunuti wi keben wi wa, nu Nebukhadnezzar na ma miwi ajühkaghaten.

⁶Ribla wi Zedekiya na ghang keben wi ma Zedekiya tsathu pathia, nu Judah kedithu la pathia.

⁷Tsaseng wi ma Zedekiya nyon kuhoshia nu ssinu Babilon wi wale kesa ghena amighe ssüli pi huya.

⁸Tsüti sa keben tsüwi Babilon nyithu na kadijjen nu anyithu jjen mecang nu Jerusalem khwetithu pakhhia.

⁹Asakhenwa wi Nebuzaradan, benchüwa na anyunutiwa wi teshi kesa anyithu pi ma wiwa sa kesathu saghu ssisen Babilon wi atssüzüthu sa wa.

¹⁰Ma anyithu jawi mangla nkemi hhaketu ntsa pahan pi Judah yyi wi teshia nu ma kemeshentsse lli nu allithu pi mathu cüa.

¹¹Isala Kadimi Nebukhadnezzar na benchüwa Nebuzaradan ya ahza hathu pi cülo khichi:

¹²“Wala Jeremiya bhaya nu ma noncca kemehai sayalo. Ma pa ntenaala isala ma kenenwa sapi cülo.”

¹³Tsalina Nebuzaradan pi kedi kemisithu Nebushazban nu Nergal Sarezer nu Babilon kadimiwa kedi kepathu tsüdila gweghe

¹⁴hi ssinu kadijjen ccühha wi gho. Mathu na hi pi Shafan tsawa Ahikam tsa Gedaliya kekhu wi hi noncca thsüa, ma hi kemehai sa wala ajjen cukeya tsü ghang thsü. Tsalina hi ciwi anyithu jawi ben wa .

¹⁵Hi kadijjen ccühha wi atssüzü sa keben wi Apvüwa na hi kizala

¹⁶Sudan nyiwa Ebedmelek wi Apvüwa Kekhang ntsawa, Israel Nyiza na kekhi tsüpi kizalo khi, “Hi sale khi ketheng ti, hi kededi nu mehai neng nkeya sengho anyunuti hawa miwi chiaben . Nu khathansha wi hathu sa khe no ciwi ben nu tsü muden.

¹⁷Isala hi Apvüwa na no khweyaben, nu no pi no messi keben anyithu kwen wi chia nben.

¹⁸Hi no nonccaya nu no pi shü thsü nben. No kenondi pi imiwi kechi ghena hi no kahang heisha nu bvü yaben. Hi Apvüwa, hi khidha.”