Read Northern Rengma Naga JEREMIYA 41 Bible Online

JEREMIYA 41 - Northern Rengma Naga bible

JEREMIYA 41

¹Tsü mapi asha tagüwa wi Elishama tsawa Nathaniya tsa Ishmael, kaditheghi wi meshu kesü nu kadimi kedi ntsawa na meshu tagha ssinu Mizpah wi Ahng Gedaliya ghangchi le wa. Mathu tsüdi gweghe kedsakejjü sen keben wi

²Ishmael nu meshu tagha ma gweghe ketenthu na njünnu hanshi pi Gedaliya süthia.

³Ishmael na Mizpah wi Gedaliya gweghe keben Israel nyithu tsüdila nu Babylonia süpahithu ciwi kebenthu la pathia.

⁴Ghanenwa wi thola Gedaliya kepathi cüki npi chükeya wi

⁵anyi achentazen na Shekhem, Shilo, nu Samaria wina gho. Mathu na akhenkhen kenye whia, mathu thsümeni mezüqhe, nu mathu ketanla agwo handhi. Mathu na asu nu hankedemvu pi Kekinyijjen wi kinyile senden.

⁶Tsalina Ishmael na Mizpah wi mathu metule shu, ma qaila wa. Ma mathu wi gho nu khi, “Dugho nu Gedaliya ghangchilo.”

⁷Mathu na anyunutiwa non wi dughoya meyi Ishmael nu ma nyithu na tsüthu pathia nu akamangthu pi atssükhang kesü non wi khala chia.

⁸Isala tsü jawi meshu tagha na Ishmael wi khi, “Tizenthu ikhang npathi lalo! Ikhang na awhengsu, achentha, oliv deli, nu anikholi pi alli wi kuthi theng le!” Tsalina ma mathu heisha cüa.

⁹Ishmael na anyithu pathi nu akamangthu pi khala chikea atssükhang tsüna di ntsa; Kadimi Asa na Israel Kadimi Basha na ma ssikaghashen kegho tsüwi chhü kesa. Ishmael na akamangthu pi atssükhang tsü pong.

¹⁰Tsaseng wi kadingathu nu Mizpah wi kebenthu anyithu tsüdila benchüwa Nebuzaradan na pi Gedaliya ya nonccalo dhenchi kethengthu tsüpi atssüzü sa thsüa. Ishmael na tsüthu pi atssüzü sala ssinu Ammon yyi kejentanwa wa.

¹¹Johanan nu ma gweghe keten süpahizi ccülikesathu tsüdila Ishmael na sazzikea kekuli cüki tsü zaya.

¹²Tsalina mathu na mathu nyi ssinu ma sen piwa Gibeon wi aghajü keti kete wi ma tudhiya.

¹³Khathansha wi Ishmael tssüzüthu na Johanan nu ma süpahizi ccülikesathu muya khe mathu nongheya,

¹⁴nu khapeghe mathu wiwa bvügho.

¹⁵Isala Ishmael nu ma nyi meshu tazen na Johanan wina bvü sen Ammon yyi wi wa.

¹⁶Tsaseng wi Johanan nu ma gweghe keten süpahizi ccülikesathu na Ishmael na Gedaliya süthi nu Mizpah wi keben anyithu ssinu atssüzüthu sa wa keten süpahithu, nzathu, ghanyithu, nu ajjenkehie kedithu miwi benya.

¹⁷Mathu na Babilon nyithu messi kepaghenanye Ishmael na Babilon Kadimiwa na pi ayyi tsüwa wi ahng sa thsü kethengwa Gedaliya pathi kesalina. Tsalina mathu na Babilon nyithu tubvü sen nu Ejipt wi wale lentsen chia. Mathu na alenca wi Bethlehem kete Khimham wi ngan wa.