Read Northern Rengma Naga JEREMIYA 43 Bible Online

JEREMIYA 43 - Northern Rengma Naga bible

JEREMIYA 43

¹Hi Apvüwa mathu Nyiza na pi mathu kizalo hi kesun kechi tsüdila pi anyithu kizakhia.

²Tsaseng wi Hoshaiya tsa Azariya, Kareya tsa Johanan nu kepa wi ammikesa nyi tsüdi hi wi khi, “No milimesaben, Apvüwa ithu Nyiza na ithu wala Ejipt wi nhang lalo kesa no nkesun chile.

³Neriya tsawa Baruk na no kechü pi ithu matang thsüle, isanu Babilon nyithu ya ithu miwi khangya nu ithu pathi nyelela ssinu Babylonia wi wa thsüale kesalina.”

⁴Tsalina Johanan, süpahizi kedithu kesüla nyelela anyithu thola Apvüwa jühkhukechi kina nu Judah yyi wi nbenla.

⁵Tsaseng wi Johanan nu süpahizi kedithu tsüdila Judah wi teshi kethengthu nu jügüzighe pi nu mizzatentithu wina kheneng kegho anyithu tsüdi gweghe ssinu Ejipt wi wa:

⁶tsüthu na npvüza, nza, ghanyithu nu kadingathu. Mathu na benchüwa Nebuzaradan na pi Gedaliya na nonccalo pi dhenchi kethengthu tsüdi pi Baruk nu hi wwala ssiya.

⁷Mathu na Apvüwa jühkhukechi nkinala Ejipt yyi wi Tahpanhe kecu wi wa.

⁸Ciwi Apvüwa na hi kiza,

⁹“Alon keti pahan khuya nu pi anyunuti hawa wi kidhan jjen kedulen tuwa akhemikedha cakhu wi chhüvhülo, isanu Israel nyithu pahan ya no tsüti sa keben tsü muya thsülo.

¹⁰Tsaseng wi mathu wi hi Apvüwa Kekhang ntsawa, Israel Nyiza na imaghawa Babylonia Kadimi Nebukhadnezzar ssigho apen ha wi chiaben, nu ma ma kadipen pi no alon pi chhüvhü kethengthu miwi sa nu ma kadi nithsüjjen pi ma miwi shigheden kizalo.

¹¹Nebukhadnezzar na gho Ejipt chayaden. Anyi kesakinaa wi shülo sakeathu na kesakinaa wi shü, ssinu atssüzü sa walo sakeathu ssinu atssüzü sa wa, nu aghikesa wi pathilo sakeathu na aghikesa wi pathiaben.

¹²Hi anni pi Ejipt cenpvü kekinyijjen mecangchi, nu Babylonia kadimi na mathu cenpvüthu mecangchia nyelethu pvü bvüaben. Anenikehiewa na ma thsü wi ayyi sametha keten tsüti Babylonia kadimiwa la Ejipt yyi satemetha nu anyanthang ntsa sen nu bvüaden .

¹³Ma Ejipt yyi wi Heliopoli wi kemetha lonkeshengthu tsü yasa nu Ejipt nyi cenpvüthu kekinyijjen mecang chiaben.”