Read Northern Rengma Naga JEREMIYA 44 Bible Online

JEREMIYA 44 - Northern Rengma Naga bible

JEREMIYA 44

¹Apvüwa na Israel nyithu Ejipt yyi wi anyunuti Migdol, Tahpanhe, nu Memfi, nu diyyi ssanwa wi hang kebenthu ghena hi ccüneng.

²Apvüwa Kekhang ntsawa, Israel Nyiza na khi, “Nthu na hi keyasa sengho Jerusalem nu Judah nyunuti kepathu tsüdi miwi chikea mudha. Khili wi lela tsüthu na keyasa wi ben, nu thola ciwi hang nben,

³kepaghenanye mathu nyi na nkemehai kuli nu hi sapi aghepvü thsüle. Mathu na ahhanshathu sapi acenpvü kepathu cü nu mathu nyelela nthu baqhaithu na kinyi nkegho cenpvüthu kekuli sa.

⁴Hi imagha atusenjüh-kechüthu kesun pi nthu wi chi nu mathu na hi nanmeghü keten kekuli qhethiketen kesa ha nsa lalo nthu kiza.

⁵Isala nthu na tsü nkina nu nmeshen chidha. Nthu na ahhansha sapi acenpvü kepathu kecü kekuli nkemehai tsü nteshi mvu.

⁶Tsalina hi ileben ketsu nu keminu meyisha pi Judah nyutithu nu Jerusalem lentontithu miwi chi, nu anni pi tsüthu mechan chia. Tsüthu yasa pia nu ghang kemessi kesü sa nu tsüthu na nansü la ben.

⁷“Tsalina hi Apvüwa Kekhang ntsawa, Israel Nyiza na khili nthu wi mangkesa na nkemehai tsüti kesa na nthu miwi kuli ben nu kesa keüben. Nthu na keyasa sengho nza, npvüza, ghanyithu nu memethu miwi chi nu nthu nyi kesütanla nben thsüla le saben kwe?

⁸Mangkesa na nthu hewi Ejipt wi hangle gha keben wi ha atsikezhüthu kinyi nu ahhansha sapi acenpvü kepathu cü nu ileben sameshü ben nu? Nthu ketanla nthu yasale sa, isanu ayyi wi mizzatenti tsüdila nthu nankeqhe nu nthu nyan pi kishen-keshi kesü sa thsüle kesa ghena kuli ben kwe?

⁹Nthu na Judah nyuti nu Jerusalem lentontithu wi nthu baqhaithu, Judah kadimithu nu mathu wubvüthu, nthu nu nthu wubvüthu, na gheshighena kekuli kesa tsü malidha kwe?

¹⁰Isala nansü kecu la nthu na nthu satemeni meya. Nthu na hi kinyikü nten nyelela hi ayenthu pi nthu nu nthu baqhaithu kecü tsüdila nie nu hang meya ladha.

¹¹“Tsalina hi Apvüwa Kekhang ntsawa, Israel Nyiza na kheneng nthu matang nu Judah tsüdi yasa den.

¹²Judah nyi teshi kethengthu nu wala Ejipt wi hangle meshen kebenthu ghena lethu hi mathu tsüdi yasa cüden. Mathu kedi le kizza lela tsüdi Ejipt wi aghikesa nyethu kekhhwenthi wi shüaben. Mathu na ghang kemessi kesü saaben, anyithu na mathu nankeqhe nu mathu nyan pi kishen-keshi kesü saben.

¹³Hi aghikesa, kekhhwenthi, nu kesakinaa ghei pi Jerusalem meten kecü tsüti Ejipt wi kahangthu meten cüden.

¹⁴Judah nyi teshi kethengthu nu Ejipt wi hangle gho keathu thola bvüya nyelela hangya nben. Nthu thola kuti hang mvu keben Judah wi kheneng ghoya nben. Kushinyi kezeng-u ketan khe thola kheneng ghoya nben.”

¹⁵Tsaseng wi npvüzathu mathu wubvüthu na ahhanshathu sapi acenpvü kepathu cüle kesa kechüthu tsüdi nu nza ciwi ngan kebenthu tsüdi pi Israel nyi Ejipt cülawa kahangthu saghula anyitenti keti kesü sa nu hi wi khi,

¹⁶“Ithu na no Apvüwa nyan wina ithu kekiza tsü kina nten.

¹⁷Ithu na sale kekhi tsüdila saaden. Ithu na ahhansha sapi ithu cenpvü Tangwi Kadijja cüden. nu ithu bamyithu, ithu kadimithu nu ccülikesathu na Judah nyutithu nu Jerusalem lentontithu wi sa kegho ti ithu na kisengtssü meyisha pi kekinyi sapi ma cüden. Tsü tsüwi ithu na kedsakejjü minyan, ithu na mehai kayi nu agükeccü mangla nmi.

¹⁸Isala ithu na ahhansha sapi Tangwi Kadijja ncüla nu kisengtssü pi kekinyi sapi ma ncüla kesa nten na ithu na mangla nmila, nu ithu nyithu na aghikesa nu kekhhwenthi wi shü ghodha.”

¹⁹Nu nzathu na khineng, “Ithu na Tangwi Kadijja tsi ti amesa gü, ahhanshathu sapi ma cü, nu kisengtssü meyisha pi kekinyi sapi ma cü kesa wi ithu wubathu na ithu kuli keben tsü nen.”

²⁰Tsaseng wi hi npvüza nu nzathu na hati hi luneng kechithu wi khi,

²¹“Nthu nu nthu bamyithu, nthu kadimithu nu ccülikesathu, nu ayyiwa wi anyithu na Judah nyutithu nu Jerusalem lentontithu wi kekinyi tsüna nthu kemeshentsü Apvüwa na tsüthu cüki nchü nyelela ma tsüthu malidha le ben kwe?

²²Nansü tsathang ha ma nthu yyi yasa pi theng nu thola ciwi nhang. Tsüna ghang kemessi sadha, nu anyithu na tsü nyan pi kishen-keshi kesü sa kepaghenanye Apvüwa na nthu gheshighena nu nkemehai kekulithu n-ghangchala.

²³Khili kededi ha nthu miwi ghodha kepaghenanye nthu na ahhansha sapi acenpvü kepathu cü nu Apvüwa jühkhukechithu tsüdi n-niela sami pi ma matang.”

²⁴Hi anyithu tsüdi nu tsü miwila nzathu wi Apvüwa Kekhang ntsawa, Israel Nyiza na Judah nyi Ejipt wi hang kebenthu wi mangwale khiben khe pi kiza, “Nthu nu nthu wubvüthu la ajüh kemechan pi Tangwi Kadijja wi khishidha. Nthu na ahhansha sapi ma cü nu kisengtssü meyisha pi kekinyi sapi ma cü, nu nthu khishi kechithu tsü nieden. Isathu mantsadha! Nthu khishi kechithu nielo! Nthu kekishenthu tsü salo!

²⁶Isala khili hi Apvüwa inyan kekhang wina nthu Israel nyi Ejipt wi hang kebenthu tsüdi wi kekishen sa ketheng ha kina chilo: Hi khiela nthu kesüla ya inyan sen nu hati kekishen kesüla sa thsü nten, ‘Hi hang kebenwa Apvüwa Kemisintsa nyan wina kishenben!’

²⁷Isathu hi nthu ya mehai kayi wa thsü nben, isala yasa cüben. Nthu tsüdi shüaben, nthu meshu kesüla keben chu aghikesa nyelela kesakinaa ghei wi shü thsüaben.

²⁸Isala nthu kezeng-u ketan keshü ghüya nu Ejipt wina kheneng Judah wi gho yaben.

²⁹Hi Apvüwa, hi apen ha wina nthu meten cüden nu keyasa sengho nthu miwi chiaben kekhishi tsü atsentsa sacen ben kesa chüza pi nthu cüden.

³⁰ Hi Judah Kadimiwa Zedekiya pi Babylonia kadimiwa Nebukhadnezzar, ma ghinyi ma pathi mvu kebenwa kwen wi chikea tsüti Ejipt kadimiwa Hofra pi ma ghinyi ma pathi mvu kebenwa kwen wi chiaben .”