Read Northern Rengma Naga JEREMIYA 5 Bible Online

JEREMIYA 5 - Northern Rengma Naga bible

JEREMIYA 5

¹Jerusalem nyithu, nthu lentontithu wi bvü walo! ghang kevüli chi! Nthu ketanla nthu ghena ghang chi! Asenkesapenthu wi bhalo! Nthu na anyi kesütanla kemeshonwa sa, nu Anyiza wi jühtsentsa sale keten muya mehai kwe? Keujüla nthu na muya mehai lethu, Apvüwa na Jerusalem kesami teshi pi cüaben.

²Nthu na Apvüwa kinyile khiten lela, nthu na mangwa khi khe tsüti sa nten.

³Ntsakhiwa Apvüwa na jühtsentsa kesen tsü ghangden. Ma nthu kihhe cü, isala nthu tsü nkhichi; ma nthu pacha cü, isala nthu chü meya mvula. Nthu na leben-dhu nu nthu kesami wina kheneng meya mvula.

⁴Tsaseng wi hi meshenya, “Hathu ha kethathau mangla nkechü nyi lale. Mathu na kejüphonthu ti saden; nu mathu Nyiza kenenwa, Apvüwa na mathu sa thsü mvu kebenwa tsü la nchü.

⁵Hi kekhang sen keten nyi wi wa, nu mathu ssinu keccünengli den. Mathu na mathu Nyiza kenenwa, Apvüwa na mathu sa thsü mvu kebenwa tsü chübenla metsi.” Isala mathu tsüdila Apvüwa kekhang meya mvu, nu ma jüh nkina mvu laden.

⁶Tsalina ayinong wina ssensitemithu na gho mathu ghan; ayyikeshü wina adennithu na gho mathu zandhi-zanghe, nu shenkitemithu na mathu nyutithu wi kegoeden. Keujüla anyi hathu na akhemi wi shhu lethu, mathu zandhi-zangheaben, kepaghenanye mathu kesami na ji ntsa, nu mathu na matsü kejon wila Anyiza wina bvüa.

⁷Apvüwa na keü, “Hi mangkesa ghena inyithu kesami teshi pi cü nu? Mathu na hi teshi theng nu atsentsa nkenye cenpvüthu kinyi wadha na. Hi inyithu, mathu pvü npi nmakeya chu ghanja cü, isala mathu na keqheza sa, nu qheza menkedsathu ssinu matsü dedi.

⁸Mathu na goru ghanja kemehai sapi jigü mvu keben tsüti, kesüsü tsüdila ajenphonwa wubvü bhaden.

⁹Hi hathu ghena kemeten pi mathu ncüla, nu mizzatenti hati kesa miwi ajukhi meyala kesau kwe?

¹⁰Hi ghinyithu kesun chi nu inyithu kemeshentsse yasa thsüaden, isala tsüthu yasatha sa thsü nten. Hi mathu na ma cünathu ketsenlo kizaden, kepaghenanye ma cüna tsüthu tsüna iji nye.

¹¹Israel nu Judah nyithu na hi matsa ntsa sadha. Hi Apvüwa, hi khidha.”

¹²Apvüwa nyithu na ma meya mvula nu hati khi, “Ma ntsakhiwa mangla sa nben; Ithu na matsü sa keteshi mangla mu nben; ithu na aghi nyelela azeng la ben nben.”

¹³Mathu kekhi na atusenjüh-kechüthu na ameghü ku ti khe mangla nye nu mathu na Apvüwa wi ketsijüh mangla nmi. Apvüwa Kekhang ntsawa Anyiza na hi wi khi, “Jeremiya, anyithu na tsüti khi keten ghena hi ijüh pi npang wi anni ti sa cüden. Anyithu pi achan ti sa nu anni na mathu mecang thsüaden.”

¹⁵Israel nyithu, Apvüwa na kelensie wina mizzatenti kesü ssigho nthu ssikaghashen den. Tsüwa tsüna kheni wina kezü mizzatenti sa kegho kesü, nthu na mathu jühjja nkechü mizzatenti kesü.

¹⁶Mathu lamugho kepiethu na süpahi kekhangthu nyu nanketizen nmila pathiden.

¹⁷Mathu na nthu su nu kedsakejjü sa tagha ben; mathu na nthu tsangathu pathiaben. Mathu na nthu nenithu nu amesüsithu süthi, nthu kemeshentsse nu khhaghabvü tonthu yasa ben. Mathu süpahizi na nthu nondi keten khwetivüketheng nyunutithu tsü yasaben.

¹⁸Apvüwa na khiben, “Isala hi tsü tsüwi lela inyithu dedikhia nben.

¹⁹Mathu na khathansha wi hi mangkesa na hathu ha sa nu keü lethu, Jeremiya, mathu wi kizala, mathu na mathu yyi wi hi wina khapeghe wa asang cenpvü kekuli sa wa kesalina mathu na mathu yyi nkenye wi kijünyi thu kekuli saaben le kizalo.”

²⁰Apvüwa na khiben “Jakob shicübvüghathu nu Judah nyithu wi kizalo:

²¹ Kekaketsü salo; nthu kejima nu kejüphon nyithu, anyon pvüten lela mu nkeya, nu akhuna pvü ten lela zaya nketen nyithu.

²²Hi Apvüwa le; nthu na Mangkesa na hi nmessi nu? Nthu na mangkesa na ituwi kenenkhukhu nsa nu? Hi ahachan pi atssükedone na pvüdhiya nketen anuphan ggü kesü sa cü. Atssükedone na kuli lela tsü miwi waya nten; atssükullu na ghamo lela tsü pashaya nten.

²³Isala nthu anyithu tsü! Nthu na leben-dhu nu hhaghe den; nthu na hi teshi nu bvüdha.

²⁴Hi leghe nu mapeghe tsangho chicü nu amapi kaghapengla allikewwi tsü khuchi cüten lela, nthu na khiela hi kinyiküle meshen chi nten.

²⁵Tsüti kesawa nye, nthu kesami na pala kemehai hathu wina nthu ghüdhiben.

²⁶“Anyi nkemehaithu na inyithu jawi hang; anyithu na awathu ghanyale die ketheng ti mathu na kaghanthsü shighe pi hieben, isala mathu na anyi ghanyale aca pi lla theng.

²⁷Awa-kedie nyi kesü na awa pi ajula pong pvü keten ti mathu na nyu tsanqai shupi mathu jjen pong yadha. Tsalina mathu na keban sa nu kekhang ben,

²⁸nu mehaitsü ghanja pi kunon yadha. Ciwi mathu kekuli nkemehai na asakhen nmi. Mathu na magha-maghangthu kemeshon nyelela atsentsa pi nyu mathu pasha ketenthu cü nten.

²⁹“Isala, hi Apvüwa, hi hathu ghena kemeten pi mathu cüden; hi mizzatenti hawa miwi ajukhi yaden.

³⁰Pala qhethiketen nu amankesa na ayyi hawa wi sadha:

³¹atusenjüh-kechüthu na milikemesa khe mangla nkhi; keqhaikedithu na atusenjüh-kechüthu ti kekhang sen nu ajühkhuchi, nu inyithu na nmale nkhi. Isala khathansha wi tsüdila asakhen sagho khe mathu na mangwa saaben nu?”