Read Northern Rengma Naga JEREMIYA 50 Bible Online

JEREMIYA 50 - Northern Rengma Naga bible

JEREMIYA 50

¹ Hawa ha Apvüwa na Babilon nyunutiwa nu ma nyithu cüki ghena ketsijüh pi kecü:

²“Jühtheü pi mizzatentithu kizalo! Pi thangchilo! Kemechan sa nu jühtheü pi thangchilo! Tsüpi nkuthila! Babilon na qancadha! Ma cenpvü Marduk pachadha! Babilon tsikezhüthu pi kejügheya thsüdha; ma tsikezhü nankiqananthu tsüpi pachadha!

³Aghawa mizzatenti kesü na Babylonia ssikaghashen le ghodha nu tsü sapi ayyikeshü kesü sa thsüaden . Anyi nu asahangthu tsüdila bvü nu thola ciwi hang nbendha.’

⁴Apvüwa na khiben, “Matsü na kegho wi Israel nu Judah nyithu na qai nu mathu Nyiza hi bha ghoben.

⁵Mathu na Zion wi kewa len keü nu tsü kejentan wi waben. Mathu na hi ssinu anuphan ghena cenkethenjüh sa nu khiela tsü pakhhi nbendha.

⁶“Inyithu na anenikehiewa na ma khaghanenithu teshi pi ayikhathu wi bhatagha thsü kesa ti le. Mathu na khaghanenithu na ayikha kesü wina kepawa wi kegoedeja bvü nu mathu jjen mali kesa ti le.

⁷Mathu kemuthu tsüdi mathu ssikaghashen. Mathu ghinyithu na khiben, ‘Mathu na sami pi Apvüwa shun, tsalina ithu na kuli kesa ha nsazzi le. Mathu bamyithu na Apvüwa nondi, nu mathu lela ma wi ajühtsentsa sa keben-ule.’

⁸ “Israel nyithu, Babylonia wina bvülo! Diyyiwa tsü teshilo! Atuwa sala bvüya!

⁹Hi aghawa mizzatentithu kechü sengho Babylonia ssikaghashen le saben. Mathu na kesennie sengho diyyiwa ssinu aghisa nu tsü nkayaden. Mathu na asakejügü chü ntsa nu alakusü pi kega wi mangla gazzi nketenthu.

¹⁰Babylonia tsanqaithu shuya, nu tsüthu shukeyathu na mathu keya mvu tsüdi khuyaben. Hi Apvüwa, hi khidha.”

¹¹Apvüwa na khiben, “Babilon nyithu, nthu na imizzatenti tsanqai shu. Nthu na anonkeghe nu kenong sala amesü kesü na asu ghaceng nyelela goru kesü na jigü wa keten ti,

¹²isala nthu nyunuti ketiwa tsüna keminni nu kejügheyaden. Babylonia na mizzatenti tsüdi jawi anyankethang kezeng ntsa sa, tsüna ayyi keqha nu atssü nkemi yyikeshü kesü saaben.

¹³Ileben ketsu ghena anyi kesüla Babilon wi nhangla; tsü yasa pi teshi nu ciwi pvüdhi kewa tsüdila keqhethi nu amansaben.

¹⁴“Alamugho kepiethu, Babilon shunla aghisale kesalina kesennie nu tsü vüyalo. Nthu lakusü tsüdi pi Babilon galo, kepaghenanye tsüna sami pi hi, Apvüwa shundha.

¹⁵Aghikhwi sa sen nu anyunuti tsüdi vüyalo! Babilon na khilitsü nyu kwen wi dudha. Ma khwetithu pakhhi nu qancazighedha. Hi Babilon nyithu miwi ajukhiyaben. Tsalina mathu miwi nthu jukhiyalo, nu mathu na nyu kepa miwi kuli kechi ti mathu miwi kuli chilo.

¹⁶Amacü pi diyyi tsüwa wi nvvü thsüla nyelela allikewwithu ya nwwi thsü lalo. asang ciwi hang kebenthu tsüdila süpahizi na ssikaghashen gho keten messi nu ajjen wi wha neng shaben.”

¹⁷Apvüwa na khiben, “Israel nyi na khaghanenithu, ssensitemithu na jügüzighe pi bvü thsü kesa tsüti le. Atuwa Assiriya kadimi na mathu ssikaghashen, tsaseng wi Babylonia Kadimi Nebukhadnezzar na mathu gü pacha.

¹⁸Ha ghena hi Apvüwa Kekhang ntsawa Israel Nyizawa, hi Assiriya kadimiwa meten kecü ti Kadimi Nebukhadnezzar nu ma diyyiwa la meten cüden.

¹⁹Hi Israel nyithu ssigho mathu yyi wi chi neng cüaben. Mathu na Karmel Yikha miwi nu Bashan yegu wi shigü keya kedsakejjü tsü dsaden, nu mathu na Efraim nu Gilead yyithu wi shigü keyathu tsü mathu kedsa mvu tsüdi dsaben.

²⁰Tsü matsü na kegho wi Israel wi kesami kesüla mu nben, nu Judah wi gheshighena na ben nben, kepaghenanye hi kahangli heisha kecüthu tsüdi kesami teshi pi cüaden . Hi Apvüwa, hi khidha.”

²¹Apvüwa na khiben, “Merathaim nu Pekod nyithu ssisalo! Mathu pathi nu yasalo. Hi nthu wi ahza khukechi tsüdi salo. Hi Apvüwa, hi khidha.

²²Ayyiwa wi aghikesa hhai zaben, nu ciwi keyasa keti na bendha.

²³Babylonia na ayyiwa maben whengcha zighedha, nu khili kewhengji tsü pachadha le! Mizzatenti tsüdila diyyi tsüwa miwi sakea tsü mu pi qhethidha.

²⁴Babilon nyithu, nthu na hi ssinu kesali, nu nthu na hi aca pi nthu die ketheng tsü nchüla ciwi yayadha.

²⁵Hi ighitsanqai ketheng pen tsü shadha, nu ileben keminu wi hi tsüthu khushiyadha, kepaghenanye hi Kemisi ntsa Apvüwa Kekhangwa na Babylonia wi hi kekuli na ben.

²⁶Ma kevü tsüdi ssikesali nu asu pi tsanqai ketheng penthu tsü paqhelo! Shukeya tsanqaithu pi asu ti nbonki yalo! Diyyiwa tsü yasa nu mangla nheila!

²⁷Mathu süpahithu tsüdi pathilo! Mathu süthilo! Babilon nyithu na dedidha! Mathu metenya keten tsüwa na ghodha.”

²⁸(Kushinyithu na Babylonia wina Jerusalem wi gho, nu mathu na Apvüwa ithu Nyiza na Babilon nyithu na ma Kekinyijjen miwi mangwa sachi khe tsü ghena ajukhi keya cüki khipi kiza.)

²⁹ “Alamugho kepiethu Babilon ssisalo kiza. Alamugho pie nu alakusü gachü kebenthu tsüdi kesunshi chilo. Anyunutiwa tsü vüya nu thola nbvü thsü lalo. Ma sakechi kekulithu tsüdi sapi cü nenglo, nu ma nyu kepa miwi kuli kechi tsüti ma miwi kulichi, kepaghenanye ma kapvü nu hi, Israel Kemethawa ha shunden.

³⁰Tsalina ma nyi kepvünyithu pi anyunuti lentontiwa wi süthi nu tsü ghanan wi ma süpahithu yasa ben. Hi Apvüwa, hi khidha.

³¹“Babilon, no awikesa pi no pong pvüben, tsalina hi Kemisintsa Apvüwa Kekhang ntsawa na no shunben le! Hi no meten cü keten tsüwa na ghodha.

³²No kekapvü mizzatentiwa na accümeshü nu khuliaben, nu thola no pieki cü nben. Hi anni pi anyunutithu mecang nu tsü kevü wi keben pala tsüdi yasa cüden.”

³³Apvüwa Kekhang ntsawa na khiben, “Nyu na Israel nu Judah nyithu matang. Mathu ghanya kesathu tsüdila mathu ghihiepen nu pi bvü thsü nben.

³⁴Isala mathu kekasha keyawa tsüna khang ntsa, ma nyan na Apvüwa Kekhang ntsawa. Ma ma ketanla mathu cüki meshenya nu kecca sen nu ayyi wi ghoben, isala Babylonia nyithu miwi tsü agükeccü benden.”

³⁵Apvüwa na khiben, “Babilon wi keshü na gholo! Keshü na ma nyithu, ma kekhang kesenthu, ma nyi kemetsathu miwi gholo!

³⁶Keshü ya milikemesa atusenjüh-kechüthu miwi gholo — mathu na khatila jüphon nu! Keshü ya süpahithu miwi gholo — mathu na khatila qhethidha nu!

³⁷Ma goruthu nu gorugarithu yasalo! Keshü ya mellisen keten süpahithu miwi gholo — mathu na khatila nzüladha nu! Ma kebenthu tsü yasalo; yasa nu shhu yalo.

³⁸Kimegi sengho ma yyi miwi chi, nu ma ghakuthu qha thsülo. Babilon qhethiketen tsikezhüthu yyi tsüna anyi sapi jüphon thsüdha.

³⁹ “Tsalina atsaghangthu nu nkemehai ghamuthu, nu awa nkemethathu na Babilon pong shaben. Khiela anyithu na ciwi hang neng nbendha, ghaketen tsü tsüdi wi lela.

⁴⁰Hi Sodom nu Gomorrah manyi nu akete wi anyunutithu kededi sakechi tsüti Babilon miwi la saaben. Thola ciwi hang neng nbendha. Hi Apvüwa, hi khidha.”

⁴¹“Aghawa diyyi kesü wi, kelensie mizzatenti kekhang kesü wi anyithu na ghoden, kadimi kejon na aghi ghena kidenben.

⁴²Mathu na alamugho nu njünnuthu khuyadha; mathu na daggü nu nanketizen nmi. Mathu na goruthu miwi kewa hhai na atssükedone kaghamo hhai ti. Mathu na Babilon ssisale aghi kidenyadha.

⁴³Babylonia kadimi na jühtheü tsü zaya, nu ma kwen zanki meyala. Nza kesü na kepvügha wi kinaa ti kesa leben gükeccü na gho ma ghantenya.

⁴⁴“Ssensitemi kesü ayinong wina shhugho Jordan khaghe sen amou kemejjü wi kewa ti, hi Apvüwa na zuli gho Babilon nyithu sapi mathu nyunuti wina bvü thsüaden . Tsaseng wi hi ma kessi keya ccülikesawa na mizzatenti tsü senden. Thowa pi hi ghapeya mehai; thowa na leben-jjan nu hi nniya mehai nu? Mangwa kekhang kesen na hi matangya mehai nu?

⁴⁵Tsalina hi Babilon nyunutiwa shunle acho kiden ketheng nu ma nyithu miwi mangwa sale ben khe kina chilo. Mathu tsangathu lela zanshi, nu anyi tsüdila qhethiketen saaben.

⁴⁶Khathansha wi Babilon na qanca khe ahhai sa ntsa nu ayyi mabenla pakuliaben, nu kemessi kiqai hhai na mizzatenti kepathu la zaben.”