Read Northern Rengma Naga JEREMIYA 51 Bible Online

JEREMIYA 51 - Northern Rengma Naga bible

JEREMIYA 51

¹Apvüwa na khiben, “Hi keyasa meghü sengho Babilon nu ma nyithu miwi chiden.

²Hi asangthu kesun pi ameghü na amatsi mo pi bvü keten ti Babylonia yasa thsüaden . Keyasa tsathang tsüwa na kegho wi mathu na alen tsüdi wina gho ayyiwa tsü ssikaghashen nu mangla nmila thsüaden .

³Ma süpahithu tsü alakusü pi ga nu aghighe kepvü matsü pi ncüla. Anyi kepvünyithu tsü nheila! Süpahizi maben yasalo!

⁴Mathu na mathu nyunuti lentontithu wi mesa-mena nu shüaben.

⁵Hi Apvüwa Anyiza Kekhang ntsawa, Israel nu Judah manyi na sami pi hi Israel Nyiza Kemethawa shun lela manyi nteshi.

⁶Babylonia wina bvü yalo! Nthu kahang ghena bvü yalo! Babylonia kesami ghena nthu pathi thsü nsala! Hi khili ijukhi yaben nu ma kepvü qo wi ma meten cüben.

⁷ Babylonia na ikwen wi keben suna hyi ayyi maben na jjüpi adina thsü kesawa tsüti le. Mizzatentithu na ma kisengtssü jjüya nu mathu leben nmetsala.

⁸Babylonia na zuli qancadu nu yasadha! Tsü ghena anongülo! Ma yisü ghena dawa yayalo, isathu mehaiyala nchü.

⁹ Asang ciwi kahangthu na khi, ‘Ithu na Babylonia kiqale kiden, isala tsüna minu mtsü le. Ithu na teshi nu ajjen wi wha neng na. Anyiza na ma kekhang tsüdi pi Babylonia meten nu tsü yasadha.’ ”

¹⁰Apvüwa na khiben, “Ithu na jisha, ‘Apvüwa na ithu na sati sayaben le kesa pi ccüca chidha. Ithu na Jerusalem wi wa nu anyithu wi Apvüwa ithu Nyiza na mangwa sachidha khe pi kiza na!’

¹¹Apvüwa na Babylonia yasa le kesalina ma Media kadimithu kechü chidha. Tsütinu ma ma Kekinyijjenwa tsü keyasa ghena ajukhi yaben. Ssikaghashen keben kedithu na ahza khuchi, “Nthu lakusüthu dhizeng yalo! Nthu tsonhithu kiden yalo!

¹²Zensu sachi nu Babilon khweti vüya thsülo! Aghikehiethu satezüchi! Anyithu pi aghiceng benya thsülo!” Apvüwa na Babylonia miwi mangwa saaben le khitheng khe ma tsü sadha.

¹³ Diyyiwa tsü aghakuthu nu keben kemehai kejon na keben, isala tsü tsüwa na cendha, nu ma kahangli dedidha.

¹⁴Apvüwa Kekhang ntsawa na ma ketanla kishentheng, ma anyi ashiqa tenti ti kesa kesü ssigho Babilon ssikaghashen, nu mathu na khangkeya wi jishaben.

¹⁵Apvüwa na ma kekhang wina ayyi sachi; ma kemetsa wi ayyi maben sahangchi atssanthu zankechuchi.

¹⁶Ma jühkhukechi wi akulu miwi atssü na ghamo; ma ayyi kenten wi akulukeshü sengho. Ma atsankegho non wi atsancwe sachi, nu ma keben kethengpen wina ameghü kesunshi chiden.

¹⁷Ha tuwi anyi na jüphon pi mangla nkechü ti saden; atsikezhü sa ketenthu na chükivvüa, kepaghenanye mathu sa keten cenpvüthu tsüna atsentsa nye, nu kahangli nmi.

¹⁸Tsüthu tsüna ma men nmi tsalina pi mangla nkenye sadha; Apvüwa na tsüthu ghena ajühkaghaten kegho wi yasa cüben.

¹⁹Jakob Nyizawa tsüna tsüthu ti nye; ma pala tsüdila sakechiwa, nu ma Israel kessi pi ma ji ntsawa saya. Apvüwa Kekhang ntsawa tsüna ma nyan.

²⁰Apvüwa na khiben, Babylonia, no iji kejenji, nu ighighe. Hi no sen nu mizzatentithu nu kadiyyithu pacha,

²¹Goru nu tsüthu miwi kebenthu pacha, gorugarithu nu tsüthu kessithu pacha,

²²npvüza nu nzathu pathi, keqhai nu kenpvünyithu süthi, pvüza nu ghalathu pathi,

²³Anenikehiethu nu mathu nenithu süthi, allikeca nu mathu llikeca mesüthu süthi, kekhang kesenthu nu kedi kemehaithu pacha le.’

²⁴Apvüwa na khiben, “Nthu na hi Babylonia nu ma nyithu na Jerusalem miwi nkemehai kulikechi tsüdi pi mathu kecü neng muyaben.

²⁵Babylonia, no ayyi maben yasa keten ayikha kesü tsüti kesale, isala hi Apvüwa, hi nghinyi. Hi no ghan pi ayyi wi dha nu pi ayyiwen wi teshiaben .

²⁶No keyasa wi tsü alonthu kesüla pi ajjensa neng nbendha. No anuphanla ayyikeshü kesü ti sa ben den. Hi Apvüwa, hi khidha.

²⁷“Zensu khuchi nu kaghashen thsülo! Tutuwa khouchi nu mizzatentithu ya zaya thsülo! Mizzatentithu kiden pi Babylonia ssinu aghisa thsülo! Ararat, Minni, Ashkenaz kadiyyithu kiza nu kaghashen thsü. Kedi nyi kesü kessi pi kaghashen keten ssi thsü. Goruthu ashiqa tenti ti kesa ssi gholo.

²⁸Mizzatentithu kiden pi Babylonia ssinu aghisa thsülo! Media kadimithu, mathu ccülikesathu nu kedithu, nu mathu kekhu wi keben diyyithu wi süpahizithu cichi thsülo.

²⁹Ayyi na kuli nu kedheggü, kepaghenanye Apvüwa na ma Babylonia pi ayyikeshü kesü thola nkahang pen sa thsüale keben tsü ghena kuli shhugho bendha.

³⁰Babylonia süpahithu na nkesalila mathu khweti wi ngan wadha. Mathu kempvüza nmila nu nza ti sadha. Anyunutiwa khweti-jenka na kalacadha, nu ajjenthu mecang chidha.

³¹Nyilothu na kesenniela bvü wa Babylonia nyunutiwa wi apen tsüdila pvüghedu bendha le kesa pi kadimiwa kizale saben.

³²Aghinyi na aghakughu tsü nkaya nu anni pi akhwetikevü tsü mecang chidha. Babilon süpahithu na messidha.

³³Aghinyi na wan mathu pathi nu pi aniegi wi asu kaghaceng ti cüten shaben. Hi Apvüwa Kekhang ntsa Israel Nyizawa na khidha.”

³⁴Babylonia kadimiwa na Jerusalem pathi pi dsa. Ma anyunutiwa tsü ghacang pi akhüti kesü ti sa; ma ghassübvü kesü ti tsü meyia. Ma ma keya mvuthu tsü khuya nu kepathu pi khala.

³⁵Zion nyithu ya hati khi thsülo, “Babylonia ya ithu miwi yasayala kekuli khhi tsü kepvüwa salo!” Jerusalem nyithu ya hati khi thsülo, “Babylonia ya ithu ketizenkesa khi tsü kepvüwa salo.”

³⁶Tsalina Apvüwa na Jerusalem nyithu wi khi, “Hi nthu sheipiya nu nthu ghinyithu ya mathu na nthu miwi sakechi tsü dhineng thsüaden . Hi Babylonia tssükebvüpen nu aghakuthu sapi qha thsüaden .

³⁷Diyyi tsüwa na yasa pi nbonki ketheng kesü sa nu aghangsathu kahang pen saaben. Tsüna ghang kemessi kesü saaden; thola ciwi nhangla nu tsü kemuthu tsüdi qhethiaben.

³⁸Babilon nyithu tsüdila ssensitemithu ti ghamo nu ma zzathu ti ghapvü ben.

³⁹Mathu na apvümene benla? Hi mathu ghena kemishu kesü kiden chi nu mathu adina nu anonkeghe sa thsüaden . Mathu na jen wa nu khiela shagha neng nbendha.

⁴⁰Hi mathu pi khaghaneni zzathu, anenithu, nu aneni süponthu ti süthiaben . Hi Apvüwa, hi khidha.”

⁴¹Apvüwa na Babilon cüki khiben, “Anyunutiwa ayyi mabenla ma seng ketenwa tsü nkayadha! Babilon na mizzatentithu tuwi khatila ghang kemessi sadha nu!

⁴²Atssükedone na Babilon miwi llepongca nu ma kaghamo kellu na pongdha.

⁴³Anyutithu na ghang kemessi sa nu atssü nkemi yyikeshü kesü sapi ciwi thola nhang nyelela kijünyi nkewa pen sa.

⁴⁴Hi Babylonia cenpvü Bel meten cü nu ma sapi ghanfükeya tsanqaithu teshi thsüa, nu mizzatentithu na ma nkinyi nengla ben.” Babilon khweti na qancadha.

⁴⁵Israel nyithu, ciwi na bvüyilo! Ileben ketsu wi nthu kahang ghena bvü yalo!

⁴⁶Nthu na nyu jühjüwa zakeya ghena nthu lebenzza nyelela nmessi lalo. Amapi keshu ayyi hewi yasayala kekuli nu kadimi kesü na kepawa ssikesali cüki jühjüwa kepapa zayaden.

⁴⁷Tsalina hi Babylonia tsikezhüthu ssinu kuli keten tsüwa na gho tendha. Diyyiwa mabenla kejügheya nu ma nyithu tsüdi pathiaben.

⁴⁸ Babylonia na aghawa wina ma yasale kedugho nyithu tuwi qanca lethu ayyi miwi nu atssan wi pala tsüdila anonkeghe ghena jishaben.

⁴⁹Babylonia na ayyi tsüdi wi keshü pfüsichi, nu khilitsü Babylonia na Israel nyithu kejon pi shü thsü kesa ghena khulia tendha. Hi Apvüwa, hi khidha.

⁵⁰Apvüwa na ma nyi Babylonia wi kebenthu wi khiben, “Nthu na keshü ghüyadha! Khili n-nganla bvü yilo! Nthu ajjen ssinu temeja wi ben lela hi nthu Pvüwa nu Jerusalem tsü meshen chilo.

⁵¹Nthu na hati khiben, ‘Ithu na kimenni nu kejügheyadha; asangthu na Kekinyijjen wi kemetha penthu khuya kesalina ithu na kekiqa nmitha sadha le.’

⁵²Tsalina hi khiben, hi Babylonia tsikezhüthu ssinu kekuli tsüwa tsüna gho tendha. nu diyyiwa maben wi mesa-mena keyathu na ghadhiben.

⁵³Keujüla Babilon na atssan miwi ki ciwi akhweti kezü kesü saben lela hi anyi kesun pi tsü yasa thsüa kesa le. Hi Apvüwa, hi khidha.”

⁵⁴Apvüwa na khiben, “Babilon yyi wi keyasa ghena anonkegü kemagha hhai tsü kinachilo.

⁵⁵Hi Babilon yasa bendha tsüna ccen sa thsüaden . Süpahizithu na atssükedone kellu hhai ti ahhai sa ntsanu kaghashen.

⁵⁶Mathu na Babilon yasale ghodha; ma süpahithu ghanyadha, nu mathu lamughothu pashüdha. Hi nkemehai tsü meten cü ketenwa Nyiza, nu hi Babilon na keyaqo qe pi cüden.

⁵⁷Hi ma kekhang kesen kemetsa nyithu, accülikesathu, nu süpahithu pi adina thsüaden . Mathu na jen wa nu khiela shagha neng nbendha. Hi kadimiwa, hi khidha; Hi Apvüwa Kekhang ntsawa.

⁵⁸Babilon khweti kekhangthu tsüpi ayyi wi khalachia, nu ma khweti-jenka kemisithu tsü mecangchia. Mizzatentithu kekuli tsüdila mangla nyedha; mathu kekuli tsüna mecangdha. Hi Apvüwa Kekhang ntsawa, hi khidha.”

⁵⁹Kadimi Zedekiya ketsikinawa na Maseiya tsawa Neriya tsa Seraiya. Zedekiya na Judah kadimi sakeya mejüwa mapi wi Saraiya na ma nie sen Babilon wi waden, nu hi kecükegwe pahan pi ma cü.

⁶⁰Hi lesüshen kesü wi keyasa na Babylonia miwi gho keten tsüdi nu Babylonia cüki kepathu tsüdi pi zhütheng.

⁶¹Hi Seraiya wi kiza, kiden no wa Babilon cuya lethu hawi zhü ketheng tsüdi pi anyithu wi misikhhali sichi metsilo.

⁶²Tsaseng wi hati kekhie salo, ‘Apvüwa, no apen hawa ha yasa, nu ciwi anyi le aghangsa lela kahangli kesütanla ben thsü nben, nu tsüpi anuphanla ayyikeshü kesü saaben khitheng.’

⁶³ Seraiya, no lesüshen hawa sipi anyithu kiza cen lethu tsüpi alon kesü wi bhenkiya nu pi Eufrat Ghaku wi cüchia,

⁶⁴nu hati khi, ‘Hatinu Babilon miwi kuliben — tsüna manon wi du nu khiela shagha neng nbendha, kepaghenanye Apvüwa na keyasa sengho tsü miwi chia tendha.’ ” Jeremiya jühthu na ha asakhen sadha.