Read Northern Rengma Naga JEREMIYA 52 Bible Online

JEREMIYA 52 - Northern Rengma Naga bible

JEREMIYA 52

¹Zedekiya na Judah kadimi sakeya tsüna ma amapi nkwe nu kesü sadha, nu ma Jerusalem wi amapi taghakhen kekhangsen. Ma jja nyan na Hamutal, Libnah nyunutiwa wi hang keghowa Jeremiya nga.

²Kadimi Zedekiya na Kadimi Jehoiakim kekuli ti Apvüwa tuwi sami.

³Apvüwa na Jerusalem nu Judah nyithu miwi ma lebentsu ntsa sa nu ma tuwi na mathu jügü pi bvü thsüa. Zedekiya na Babilon Kadimi Nebukhadnezzar jüh hhaghe nu ma matang,

⁴tsalina Nebukhadnezzar na Zedekiya kekhang senkeya amapi tuguwa asha taghawa tagha ghanan wi ma süpahizi tsüdi ssigho Jerusalem ssikaghashen. Mathu na anyunutiwa na meiwa kemnanpen sa, nkayale akhweti zhü pi tsü vüya,

⁵nu tsü vü sen wa Zedekiya na kekhangsen keya amapi taghakhenwa cu.

⁶Tsü mapi asha mejüwa tugu ghanan wi azeng sa ntsa nu anyithu na mangla dsa keya nmila kesa wi

⁷anyunutiwa khweti pakhhi dugho, Babilon nyithu na anyunutiwa vüben lela süpahithu tsüdila aghaja wina bvüa. Mathu na kadimi sanku len wiwa na shu akhweti keni zanghu ketheng jenka wina Jordan Yyiketijü kepeghe wiwa bvüa.

⁸Isala Babilon süpahizi na Kadimi Zedekiya jügü wa Jerikho kete deshentijü wi ma ghanya, nu ma süpahi tsüdila ma teshia.

⁹Zedekiya ssinu Kadimi Nebukhadnezzar na Hamath yyi wi Ribla nyunutiwa wi keben pi ma cüa, nu ciwi Nebukhadnezzar na kemeten pi ma miwi chi cüa.

¹⁰Ribla wi Zedekiya na ghang keben wi matsathu pathi nu Judah kedithu pi shü thsüa.

¹¹ Tsaseng wi ma Zedekiya nyon keni kuhoshia nu amighe ssüli pi hu sen nu Babylonia wi wa. Zedekiya na Babylonia wi atssüzüjjen wi ben wa ma keshü cu.

¹²Kadimi Nebukhadnezzar na Babilon wi kekhang senkeya amapi tagha nu tuguwa asha mangawa tagha ghanan wi Nebuzaradan, kadimi lenketsütsonwa nu ma süpahi benchüwa na Jerusalem wi duya.

¹³ Ma Kekinyijjen, kadijjen, nu Jerusalem wi anyi kemechan jjenthu tsüdi mecangchia;

¹⁴nu ma süpahithu na anyunutiwa khwetithu pheghe.

¹⁵Tsaseng wi Nebuzaradan na anyunutiwa wi teshi ketheng anyithu, ciwi keben sapichüthu, nu Babilon nyithu wiwa sakeathu tsüdi ssinu Babylonia wi wa.

¹⁶Isala ma anyi kahhatu ntsathu, mangla nkemithu pahan teshi pi Judah wi kemeshentsse llithu ca wa thsüa.

¹⁷Babilon nyithu na Kekinyijjen wi lezza donbvüthu nu garithu tsüpi taghagu ketiwa tsü wwala whengchazighe nu mathu na lezza tsüdi pvü nu Babylonia wi wa.

¹⁸Mathu na kekhwe khu, kekinyipen wi kemecangkhala kechiji, ahulathu satekemetha ji, ahhansha kesa wi ajjü kechi khuthu, hankedemvu kemecang wi senketen khu, nu Kekinyijjen wi kesen tsanqai lezza pi kesa tsüdi khusen bvüa.

¹⁹Mathu na suna nu rükatssü pi kesa tsanqai tsüdi khuya: akhuzzathu, annimihi kechiji, ahhansha kesa wi ajjü kechi khu, apfüthu, ahula kedonpenthu, hankedemvu kechiji nu kisengtssü pi kekinyi wi kesen khuthu tsüdila khusen bvüa.

²⁰Lezza tsanqai Kadimi Solomon na Kekinyijjen ghena kecü — donbvü keni, garithu, taghagu ketiwa, nu amesü süpon tsikezhü taghakeni na tsü tsüki kebenthu — tsüna whunan le kesa ghena kiyan mtsüa.

²¹Adonbvü keni tsüna mechanshu: kesüsü kemisi na meter 8 nu ma keti na meter 5.3. Tsü keni na apanpang kepvü, nu tsü mighe kisha na milimeter 75. Adonbvü shoni wi kesüsü ma kisha na meter 2.2 na ben, tsü kevü tsüdi wi ahhibvü zhüpi ma tsisa, tsüthu tsüdila lezza pi cütheng.

²³Adonbvü kesü wi ahhibvü maben saghu meza kesü na ben, nu ayyi wi ben nu achentugu nu tugho tsü muben.

²⁴Tsü miwila benchüwa Nebuzaradan na keqhaikediwa Seraiya, tsü shi keqhaikedi sa kebenwa Zefaniya, nu kepa la Kekinyijjen wi kedi kemechan meshu kecheng ghan sen atssüzü sa wa.

²⁵Anyunuti wi süpahi khang kepapa miwi benchü kesawa, kadi lenketsütson meshu tagü anyunutiwa wi kebenthu, benchü kekiqawa, süpahi cüki kezhü kesenwa, nu anyi kemechan achentugho ssiya.

²⁶Nebuzaradan na tsüthu ssinu Babylonia Kadimiwa na

²⁷Hamath yyi wi Ribla nyunutiwa wi keben wi wa. Ciwi kadimi na mathu kiccü nu pathi thsüa. Tsüti Judah nyithu tsü mathu yyi wina ssinu kushiyyi wi bvü thsüa.

²⁸Hawa hana Nebukhadnezzar na anyithu ssinu atssüzüthu sa bvükea cüki kezhü: ma kadimiwa sakeya amapi tagüwa wi meshu 3,023;

²⁹tagha nu tazen mapi wi meshu 832, hathu ha Jerusalem wina;

³⁰nu ma kadikesa nkwe nu kechengwa mapi wi 745 — Nebuzaradan na ghansen bvüa. Tsüdi saghu meshu 46,000 ssinu bvüa.

³¹Evilmerodakh na Babilon kadimi sakeya mapi wi ma atssüzüjjen wina Judah Kadimi Jehoiakim lisha chi nu nanketizen pi ma ccüca chia. Tsüna Jehoiakim na atssüzü sa kewa amapi changha nu tagüwa asha taghakeni wi nkwe nu manga ghanan.

³²Evilmerodakh na cca nu ma ssinu kuli, nu ma gweghe Babylonia yyi wi kushinyi sa kewa kadimi kepathu miwi la kenyuwakü pen pi ma cü.

³³Tsütinu Jehoiakim yala atssüzüthu thsümeni kemiliya thsü nu ma hangkeben chu kadimi miz wi dsajjü wa thsüa.

³⁴Ma hangkeben chu ghanan kaghapengla ma nsenthu keyishü tsüdi pi ma cü.