Read Northern Rengma Naga JEREMIYA 7 Bible Online

JEREMIYA 7 - Northern Rengma Naga bible

JEREMIYA 7

¹Apvüwa na hi kesun pi Kekinyijjen jenka wi Judah nyithu na kinyi keten pen wi tsü chi. Ma hi ciwi ngan nu Apvüwa Kekhang ntsawa, Israel Nyizawa na pi mathu wi kizale kebenwa tsüpi thangchilo kiza, “Nthu kahang yen nu nthu kekulithu kemililo, isathu hi nthu ya hewi hangya thsüaben.

⁴Kemechu jühthu hati kesa tsü n-nondila, ‘Ithu na keyazi wi ben! Hana Apvüwa Kekinyijjen, hana Apvüwa Kekinyijjen, hana Apvüwa Kekinyijjen le!’

⁵“Nthu kahang yen nu nthu kekulithu kemililo. Nthu khokho tuwi kemeshonwa saya.

⁶Kijünyi, magha-maghang, nu denyi-demathu miwi kekiyi nbhala yilo. Ayyi hawa wi kesami nkemithu npathila yilo. Acenpvü kepathu nkinyila yilo, kepaghenanye tsüna nthu yasaben.

⁷Keujüla nthu kahang yen kemiliya lethu, hi nthu ya hewi hi ayyi pi nthu bamyithu na anuphanla pi mathu ji salo kecü wi ha hangya thsüben.

⁸“Ae, nthu na nthu kenondi pi kemechu jühthu miwi chiden.

⁹Nthu na ghanfü, nyu pathi, qheza, kekishen wi milimesa, ahhanshathu sapi Baal cü, nu nthu na hatu wi nkechü cenpvüthu kinyiden.

¹⁰Nthu na hi n-nanmvu keten kekuli hathu sa, nu tsaseng wi hi ketenpen Nithsüjjen wi gho ngan nu hati khiden, ‘Ithu na keyazi wi ben!’

¹¹ Nthu kemeshen tsü hi Kekinyijjen tsüna nyu tengkedsa nyi ghena kekuthi pen kesü le ben kwe? Hi nthu na mangwa saben khe mudha.

¹² Shilo [1] wi walo, ciwi kinyilo kesa hi kessi keya pen atuwa witsü, nu inyi Israel na kesami ghena hi mangwa sachi khe ghangchilo.

¹³Nthu na kesami hathu tsüdi sadha, nu nthu wi kekhi sen khineng lela nthu na nkina mvula. Hi nthu ci lela nthu na n-nusha mvu.

¹⁴Tsalina hi Shilo wi mangwa sachi khe hi nthu na nondi keten Kekinyijjen hawa miwi la sachiaben . Apen hawa hi pi nthu nu nthu bamyithu kecü wi ha hi Shilo wi kesachi ti sachiaben .

¹⁵Hi ituwi na nthu theghi Israel nyithu jügü pi kesa tsüti hi nthu la jügü piaden. Hi Apvüwa, hi khidha.”

¹⁶Apvüwa na khi, “Anyi hathu ghena kekhie nsala yilo. Mathu kuti wina magha nyelela nkhie lalo; mathu shei nkhila, kepaghenanye hi njüh kina nten.

¹⁷Mathu na Judah nyunutithu nu Jerusalem lentonti wi mangwa saben khe no nmu kwe?

¹⁸ Ghanyithu na achan saghu, shenpfüthu na anni sa, nu kinyibvüthu na awheng saghu pi mathu na Tangwi Kadijja le ci keten cenpvü nzawa tsü ghena amesa güben. Mathu na hi nkenensa la kisengtssü meyisha pi acenpvü kepathu la kinyi.

¹⁹Isala mathu patena kebenwa tsüna ntsakhiwa hi kwe? Nyele, mathu ketanla mathu patena, nu kejüghe keya sengho mathu miwi chiyaben.

²⁰Tsalina hi Kemisintsa Apvüwa, ileben keminu nkemehai tsü meyisha pi Kekinyijjen hawa miwi chiaben . Hi tsü meyisha pi anyithu, asahangthu, nu achantonthu nu yangdsaketenthu tsüdi miwi lela chiaben . Ileben keminu tsüna thola patenenya nketen nni ti saaben.

²¹“Inyithu, nthu na ahhansha kesa pahan pi kekinyipen miwi mecangtha saaden, nu pahan pi nthu na dsalo khichidha. Isala hi Apvüwa, khi keben na nthu na tsüthu tsüdila dsaya mehai.

²²Hi Ejipt wina nthu bamyithu ssinu keshhugho wi mecang pi kekinyi nyelela ahhansha kesa kepa wi mangla nkhuchi.

²³Isala hi mathu Nyiza sa nu mathu ya inyi sa thsüle kesa ghena mathu ya ijüh kinalo kiza. Hi mathu kizala hi ayenkhukechithu tsü nie nu hanglo isathu pala tsüdi wi mathu ghena mehai ben na kiza.

²⁴Isala mathu na nkina nu nmeshen chitha sa. Tsüti kesawa nye, mathu na mathu leben-dhu nu nkemehai na mathu kekiza ti sa, isala mehai kayi kesawa nyela nmehai pfüpfü wa.

²⁵Nthu bamyithu na Ejipt wina keshhugho ghanan wina gho nansü kecu hi imagha atusen- jühkechüthu kesun pi nthu wi chi ghoben.

²⁶Isala thola nkina nu meshen nchi. Tsüti kesawa nye, nthu na nthu bamyithu miwi la leben-dhu nu hhagheben.

²⁷“Tsalina Jeremiya, no ajüh hathu tsüdi pi inyithu kizaben, isala mathu na njüh kinachi nben; no mathu ciben, isala mathu no nusha nben.

²⁸No mathu wi mathu mizzatenti na Apvüwa, mathu Nyizawa ijüh nkina nyelela mathu kemeten wi mangla chü meyale kizaben. Jühtsentsa kesawa tsüna shüdha. Tsü cüki nkeccünengli ladha.”

²⁹Anongülo, Jerusalem nyithu; nthu lissen ca pi khalalo. yyishiphon shoni wi keshü khwi salo, kepaghenanye hi Apvüwa, hi aghepvü nu inyithu meya mvuladha.

³⁰Judah nyithu na nkemehai kekuli sadha. Mathu na hi n-nanmvu keten tsikezhüthu pi hi Kekinyijjen wi chi nu tsü nakhidha.

³¹ Mathu na Hinnom Yyiketijü wi Tofeth le kesa kekinyipen kesü satheng, tsüna mathu tsangathu pi anni wi ahhansha sale kesalina. Hi mathu na ha salo nkhi, tsüna ileben wi lela ndugho le.

³²Tsalina tsüpi Tofeth nyelela Hinnom Yyiketijü le ncila nu pi Kesüthi Yyiketijü le ci wa keten matsü na ghoden. Mathu na anyithu pi khiewi la vhü meyala kesalina pi ciwi vhüben.

³³Akamangthu tsüna awathu nu aghangsathu na dsaben, nu thola tsüthu jügü pi bvü thsü nben.

³⁴Ayyiwa tsüna keshü saaben. Judah nyunutithu nu Jerusalem lentontithu wi tsü hi mathu nonkeghe nu kenong hhai nu keshanyi kemishu nonkeghe la pi asakhen sa cüden.