Read Northern Rengma Naga JEREMIYA 9 Bible Online

JEREMIYA 9 - Northern Rengma Naga bible

JEREMIYA 9

¹Hi ili ya atssükhang kesü sa, nu inyon na anyontssü kebvüpen sa, nu hi inyi pathi kesathu ghena tsü ghaja ghanan qaiyalo kheshülan.

²Ayyikeshü wi hi keben pen kesü ben, nu inyithu wina bvüthu mehai kesa nan. Mathu tsüdila ajühtsentsa nkesen, nu nyu kematsathu le.

³Mathu na keshüthangla milikemesa khile kidenden; atsentsawa nyela atsentsa nkenye pi ayyiwa senden. Apvüwa na khiben. “Inyithu na nkemehai sa kayiden, nu hi pi mathu Nyiza le sa nten.”

⁴Anyi tsüdila ma pvüshang ghena meghe-metsa meyathu yishü, nu kesüla ma cünyuwa nondiya nten; kepaghenanye acünyu tsüdila Jakob ti nyu mechuden, nu tsüdila ma pvüshangthu khisaden.

⁵Mathu tsüdila mathu pvüshangthu len tsütson dejaden, nu thola atsentsa khi nten; mathu na mathu mili pi milikemesa khichü, nu mathu kesami kesa zan nengya nben. Mathu na keyasa kekuli saneng den, nu kemechu kekuli sapi wwaneng den. Apvüwa na ma nyithu na ma teshile khiben.

⁷Ha ghena Apvüwa Kekhangwa na khiben, “Hi inyithu pi amighe ti sametha, nu mathu ghan-nan den. Inyithu na nkemehai sadha— hi mathu ssinu mangwa saya mehai nu?

⁸Mathu mili na alakusü nyu ghonthi keten ti, mathu keshüthangla milimesaden. Tsüdila meza-megüshu ma jenphon ccüneng den, isala ntsakhiwa aca pi ma dieben.

⁹Hi hathu ghena mathu meten ncüla kwe? Hi mizzatenti hati kesa kesü miwi ajukhi meyala kwe? Hi Apvüwa, hi khidha.”

¹⁰Hi khi, “Hi ayikhathu ghena anongü, nu tsüthu ghena qaiden, kepaghenanye tsüthu na qha wadha, nu thola ciwi nwa ladha. Ciwi asahangthu hhai mangla nza neng; awa nu aghangsathu na bvüdha.”

¹¹Apvüwa na khiben, “Hi Jerusalem pi keyasa mang kesü sa, whewhethu kahang pen kesü sa thsüaden; Judah nyunutithu na ayyikeshü kesü sa, nu thola nkahang pen kesü saaben.”

¹²Hi keü, “Mangkesa ayyiwa yisha nu qha pi ayyikeshü kesü ti sa nu thola ciwi nwa ladha nu? Thowa na metsa nu ha meshenshiya mehai nu? No thowa ya hapi kepa wi kiza thsüle khimetha chi nu?”

¹³Apvüwa na luneng, “Hati sakea ha inyithu na hi kesansijüh pi mathu kecü tsü teshikea ghena le. Mathu na ijüh n-nie nyelela hi mathu kekiza tsü nsa.

¹⁴Tsüti kesawa nye, mathu na leben-dhu nu mathu bathu na mathu sansi kecü ti Baal tsikezhüthu kinyi ghoben.

¹⁵Tsalina hi Apvüwa Kekhang ntsawa, Israel Nyizawa na mangwa sale ben khe kinalo: Hi aghang kekha pi inyithu dsa thsü nu aji pi mathu jjü thsüaden .

¹⁶Hi mathu jügüzighe pi mizzatentithu mathu nu mathu bamyithu la za nketen yyi wi chiaben, nu hi mathu npi keyasakhi chu süpahizi kesun pi mathu shun thsüden.”

¹⁷Apvüwa Kekhang ntsawa na khi, “Mangwa saben khe meshenchi nanlo! Keshü qaiki keten nyi cichi, Keshü pi kevhü khwisa keten nzathu cichilo.”

¹⁸Anyithu na khi, “Mathu kiza nu wan ithu ghena keshü pi kevhü khwisa thsülo, anyontssü pi ithu nyon npi pongkeya chu, nu ithu na qai pi anyontssü npi llekeya chu.”

¹⁹Zion wi kiqai hhai kina chilo: “Ithu na dedidha! Ithu na kejügheya ntsa sadha! Ithu na ithu yyi nteshithu yishü; ithu jjenthu pheghetha sadha.”

²⁰Hi khi, “Nthu nzathu, Apvüwa hhai kinalo, nu ma jühthu wi kekaketsü sa chilo. khatinu anongü ten khe pi nthu ngathu, nu khatinu pi kevhü khwisa ten khe pi apvüshangthu sansi cülo,

²¹Keshüwa na ithu jjenkubhi wina dugho, nu ithu kadijjenthu wi dughodha; tsüna alentonti wi atsangathu, nu asenkesapen wi acalithu pathidha.

²²Apen kahe wi keshü kamang na vvüzighe ben, allithu wi ayyi kenyan pi abhon sa ketheng ti, alli kewwithu na wwi pi teshi nu thola tsü saghu nkeya ti. Hawa ha Apvüwa na hi khilo pi hi kiza.”

²³Apvüwa na khiben, “Kemetsathu na mathu kemetsa, nyelela kezüthu na mathu kezü, nu kebanthu na mathu keben ghena kapvü yishü.

²⁴ Keujüla anyi pahan na kapvü mvu lethu, ma hi chü nu mesheshikeya ghena nkapvüthu yishü, kepaghenanye hi ghaliki kesa ben, nu atsentsa kemeshon tsü saden. Ha kesathu hi nenden, Hi Apvüwa, hi khidha.

²⁵Apvüwa na khiben, “Hi Ejipt, Judah, Edom, Ammon, nu Moab nyithu nu ayyikeshü wi keben nyi alica pi milute ”[3] sapvü keten nyithu tsü meten cü keten matsüwa na gho tendha. Anyi hathu tsüdila ahyuhandha, isala cenkethenjüh zensuthu tsü nie nten. Anyi hathu nu Israel nyithu kesüla hi cenkethenjüh tsü nie nten.”