Read Northern Rengma Naga NONKEGÜ 1 Bible Online

NONKEGÜ 1 - Northern Rengma Naga bible

NONKEGÜ 1

¹Jerusalem na khatila caghangca ben, kuti tsüwi anyi na pong ben keten! Kuti tsüwi ayyi na tsü nyuwakü keten, ma khili tsü denyile kesü ti sadha; Anyunutithu wi kedikemehaithu na nyu nssümagha sa wadha.

²Ma ghaja thangthang qai; ma nyontssü na ma depi miwi lle dugho. Ma pvüshang kaghawenthu tsüdi jawi thola ma leben satecca kecü nmidha. Ma ssinu ashusa ketenthu na ma matsa, nu khili tsüdila ma shunben.

³Judah nyithu na mangla sameyala nssümaghathu sa, ajjen wina mathu jügüshi pia. Mathu na nyu yyi wi hang, nu pi mathu jile khikeya ben nmi— Ghinyithu na vüshakhi nu bvükeya len mangla nmi.

⁴Khili tsü thola kemetha tsathangthu wi Kekinyijjen wi kinyile ngholadha. Ghala ciwi akhwisa ketenthu na ketizensa, nu keqhaikedithu na kaghadhi ketan sadha. Anyunutiwa khwetithu na ghacang, nu Zion na agüccü wadha.

⁵Ma ghinyithu na haicenya; mathu kekhang wi ma ghanden. Apvüwa na ma kesami kejon ghena ma pi agüccü thsüdha; Ma tsangathu ghanya nu ssi bvüdha.

⁶Jerusalem tsikemehai na wakea tsanqai kesü sadha. Ma ccülikesathu na ameshü na ghama pi keyha kesa ti sadha, Jügü ketenthu tukebvü ghena ma kezü nmila wa tendha.

⁷Jerusalem na khili tsü yasa pi kecaghang pen kesü saben, ma kheni tsikemehai tsü meshenben. Ma ghinyithu kwen wi du kesa wi thola ma kiqa kecü nmi; Ma miwi khangkeyathu na ma keqanca tsü nankeqhe.

⁸Ma kenyuwakü na bvüdha; ma kemissü sapi kejüghekeya wi ben. Ma ghadhi nu kejüghe wina ma mmi pi kuthi wadha. Jerusalem na kesami qhethiketen sapi ma ketanla ma nakhidha.

⁹Ma nkemethawa tsüna lekete mushiya, isala ma metuketen tsü nmeshenchi. Ma keqanca tsüna qhethiketen; thola ma leben sateccaya nben. Ma ghinyithu na khangyadha, nu ma maghala Apvüwa wi nanketizen khie.

¹⁰Ghinyithu na ma nu ma keben-keyeng tsüdi tengyadha. Ma mathu na Kekinyijjen wi duketen mu, Ciwi Apvüwa na Anyiza nkechüthu ya du thsü nten.

¹¹Ma nyithu na pala pahan dsale bha nu ghadhiben; Mathu na hangben yale kesalina mathu keben-keyeng pi kedsakejjü kemiliya. Anyunutiwa na maghaben, “Apvüwa, hi ghangchilo, igükeccü wi hi ghangchilo.”

¹²Ma pvüdhiwa ketenthu tsüdi wi khi, “Hi ghangchilo! Anyi thola hi kinaa ti npi sa, Apvüwa na ma lebentsu keben wi kina sengho imiwi kechi tsü.

¹³‘Ma tang wina anni kesun kechiwa tsüna igwo non wi hi mecang. Ma aca kesü pi die nu hi zansha pi ayyi wi cü chia. Tsasengwi ma hi yisha nu teshi pi agüccüki ben wa thsüa.

¹⁴“Ma hi kesami tsüdila chüya, nu tsüthu tsüdi bhenghudha; Ma tsüthu pi isun wi hugi cü, nu hi tsü kekiyan pvü nu nchala. Apvüwa na hi pi nankemeghüthu cü, nu hi mathu matangkeya nmila.

¹⁵‘Apvüwa na isüpahi kekhang ntsathu tsü nankeqhe; Ma süpahizi kesü kesunchi pi inyi kepvünyithu yasa thsüa. Ma inyi pacha pi kisengtssü kenyeggüpen wi kemeshentsse bithu ti sa.

¹⁶“Tsalina inyontssü na llepongca ben le. thola ileben satecca kecü nmi; thola hi satezü kecü nmidha. Ghinyithu na imiwi khangya; inyithu na mangla nmidha.

¹⁷‘Hi ikwen changben isala thola hi kiqa cü nten. Apvüwa na apen tsüdi wi ghinyithu cichi pi hi shunben; Mathu na hi pi kenenkagha ti saben.

¹⁸“Isala Apvüwa na meshon, kepaghenanye hi ma jüh nkinala. Kahe wi anyi tsüdila ijüh kinalo; hi agükeccü wi keben ha ghangchilo. Inyi pvünyi npvüza nu nza tsüdila ssi nu atssüzü sa bvüdha.

¹⁹Hi ishusa ketenthu cichi, isala mathu na hi nkiqa mvula. Keqhaikedithu nu accülikesathu na anyunutiwa alentonti wi shüdha, Mathu na hangyale kesa ghena kedsakejjü bha kewa wi.

²⁰‘O Apvüwa, ihathakina ha ghangchi, ighamu ketizenkesa ha! Hi kesami ghena leben ketizensa pi ileben qankhhidha. Alentontithu wi nyu kepathithu na ben; ajjen non wila keshü na bendha.

²¹“Hi kaghadhi ha kina cülo; Ciwi thola ileben satecca kecü nmi. No kededi sengho imiwi kechi ghena ighinyithu na kenong saben. No khishi ketheng tsathangwa tsü sengho; ighinyithu la hi ti ketizen sa thsülo.

²²‘Mathu gheshighena tsüdi ghena meshensa; No hi kesami ghena meten kecü ti mathu la meten cülo. Hi ketizenkesa wi ghadhiben— hi kaghang tsüdi bhataghadha.