Read Northern Rengma Naga NONKEGÜ 2 Bible Online

NONKEGÜ 2 - Northern Rengma Naga bible

NONKEGÜ 2

¹Apvüwa na ma lebenketsu wina kejang pi Zion whengbhondha. Ma tang tsikemehai tsü kemili pi keyasa sadha. Ma lebenketsu tsathang wi ma Kekinyijjen lela teshia.

²Apvüwa na nanketizen nmila Judah wi anyu tsüdila yasa. Nu akhwetithu na ayyiwa khwesen keben tsü pashadha. Ma kekimenni sengho kadinyuwa, nu ma kekhang kesenthu miwi chidha.

³Ma lebenketsu wi Israel kezü tsü pachazighe; Ghinyi na kegho wi ma ithu nkiqa mvula. Ma lebenkeminu na anni ti ithu shun, pala tsüdi yasa.

⁴Ma ma lakusüthu pi aghinyi kesü ti ithu mitsü; Ma ithu nonkeghe nu nen ketenthu tsüdila pathia. He Jerusalem wi ithu na ma lebenketsu wi mecangben.

⁵Aghinyi kesü ti Apvüwa na Israel yasa; Ma akhwetithu nu kadijjenthu yasa pi theng. Ma ahathakina kenten nkemi sengho Judah nyithu miwi chidha.

⁶Ma ithu na ma kinyiketen pen Kekinyijjenwa tsü whengcha zighedha; Ma Sabbath nu kemetha tsathangthu pi asakhen sadha. Kadimiwa nu keqhaikedithu makesü ma lebenketsu kekhang tsü pvüya.

⁷Apvüwa na ma kekinyipen meya mvu, nu ma Kekinyijjen kemethawa tsü yisha. Ma ghinyi yala ma wikeshonthu tsü whengsha thsüa. Ithu na kuti tsüwi anonkeghe wina kinyi keten pen witsü mathu na khangkeya wina jisha.

⁸Apvüwa na Zion khwetithu qanca thsüale kesa meshenya; Ma tsüthu yasa thsükhia le kesa ghena kitegüyadha. Aducükezhü nu awikeshonthu na khili gweghe yasa pi theng.

⁹Kaghapeng-jenkathu na kenenkagha jawi dudha, ma kekhenthu na pashü zighedha. Kadimiwa nu kaditsathu na khili tsü kushiyyi wi ben wadha. Ayenwa pi nsansila, nu atusenjüh-kechüthu na Apvüwa wi kemanthithu nmuladha.

¹⁰Jerusalem wi keqhaithu na ayyi wi ccen donkiben, Aleshithsü mphi nu ayyinikhu pi mathu li wi chipvü. Ghala tegüthu na mathu mmi nkhwenca sa.

¹¹Hi qai pi inyon nküchala; ighamu na ketizenkesa wi ben. Inyithu keyasa ghena lebengüccü pi hi nchaladha. Ghanyi nu memethu na anyunutiwa lentonti wi shücaben.

¹²Ghama nu dighela mathu jjathu wi qaiben; Mathu na mesa-mena kesa ti alentonti wi khuliben, Mathu jjathu kwen wi ashina shü waden.

¹³O Jerusalem, ketizenwa Jerusalem, hi mangwa le khiya nu? Hi khati nleben satecca cü nu? Thola hati ketizen npi sa. No ketizenkesawa tsüna atssükedone kenten nkemi ti sa; ciwi saya kemehai kaghang nmidha.

¹⁴Nthu tusenjüh-kechüthu na milikemesa khe mangla pi nthu kiza keya nmi; Mathu kesansi na khiela nthu kesami nkhüshila nthu mechu. Mathu na nthu sapi nthu leben nkhapeghela mehaile meshen thsüden.

¹⁵Anyi anyunutiwa pvüdhi kewathu na nankeqhe nu nthu ghangben. Mathu li pvükejen nu Jerusalem keyasa tsü nankeqhela: “Ha anyunuti tsikemehaiwa tsü kwe? Ha ghena ayyi ammisa ketenwa tsü kwe?”

¹⁶Nghinyithu tsüdila no nankeqhe, nu nanmeghüthi no ghangben. Mathu na mathu milissi nu nankeqhela, “Ithu na ha yasa cüdha! Ithu na atsathang hawa ha hie keben!

¹⁷Apvüwa na ma mangwa sale pateqhetheng khe ma asakhen wi tsü sadha: Ma kheni ithu kitsan kechi ti nanketizen nmila ithu yasadha. Ma khangkeya pi ithu ghinyithu cü, ithu keqanca ghena anonkeghe pi mathu cüdha.

¹⁸O Jerusalem, nwikeshon ya qai nu Apvüwa wi khie thsülo! N-nyontssü ya ghaja ghanan aghakutssü ti lle thsülo; No ketanla qai nu hathana pi pong yalo!

¹⁹Aghaja thangthang shaghala shagha neng, nu Apvüwa wi khielo; Nlebenchi nu ma wi ntsangathu ghena nanketizen khielo— Ghanyithu na alentonti ccükwen tsüdi wi khhwenthiben!

²⁰O Apvüwa, ghangchilo! No pi ketizen sa thsü kesathu tsü! Kinyibvüthu na mathu ghali keten tsangathu sa dsabendha! Keqhaikedithu nu atusenjüh-kechüthu pi Kekinyijjen wi pathi bendha!

²¹Ghanyi nu keqhaithu makesü alentonti wi shü pi khuli zigheben, Aghinyi njünnuthu na npvüza, nu nza cahlithu süthidha. No nlebenketsu tsathang wi nanketizen nmila mathu süthidha

²²No ighinyithu ci pi qhethiketen kemishu kesü sapi hi vü thsü, Nu thola nlebenketsu tsathang witsü bvüya nben. Mathu na itsanga hi noncca keshagha hi kaghalithu tsü pathia.