Read Northern Rengma Naga NONKEGÜ 4 Bible Online

NONKEGÜ 4 - Northern Rengma Naga bible

NONKEGÜ 4

¹Ithu suna kewegü na jangdha; Kekinyijjen wi alonthu na alentonti wi khuli zighedha.

²Zion wi kepvünyithu na ithu ghena suna menkedhu ti kesa nan, isala khili pi ayyipfü jümuthu ti sadha.

³Adenni bvü lela ma zzathu ghanjaden, isala inyithu na awaketiwa ti mathu tsangathu tuwi daggüden.

⁴Mathu na memethu ya ghama nu dighethi shü thsüden; ghanyithu na thola pi mathu cü nketen tsse tsü khieben.

⁵Anyithu kuti tsüwi atsse kinyan ntsa dsa ketenthu na alentonti wi khhwenthiben; meshumenna ntsa hang keshaghathu na bhanieku jjü nu atsse bha wadha.

⁶ Inyithu na Sodom wi kahangthu zulila Anyiza kwen wi keqanca metukeyathu miwi la kemeten muyadha.

⁷Ithu kaditsathu na meyasa nu metha pi aghola ti khang nu zü, agwo mehai pi wegüchang kesa.

⁸Khilitsü alentonti wi nyu nchüla khuliben, mathu mmi na mankade shüben; mathu hyu na qha pi achan ti cügho pi mathu gü mejudha.

⁹Aghi wi keshüthu tsüna hasenkhen wi keshüthu miwi mehaiki, mathu na khhwenthi nu ashina shü, atsse na mathu sapi hang meyala.

¹⁰ Ketizenkesa na qhethiketen kesa sengho inyithu miwi chi; ajjathu na mathu ghali keten tsangathu pi wen pi atsse mithon sa dsa.

¹¹Apvüwa na ma lebenketsu maben lishachi; ma Zion wi anni canki nu tsü mecang pi ayyi wi chia.

¹²Khiewila anyi kesüla, asang mizzatenti kekhang kesenthu lela nmi, nkaketenthu na Jerusalem kaghapeng-jenka wi duyaben kesa n-nondisha.

¹³Isala ma tusenjüh-kechüthu na sami, nu ma keqhaikedithu na nkesazzithu pi shü thsü kesalina hati sa.

¹⁴Ma ccülikesathu na anyon nkemu nyithu ti alentonti wi kegoe deja, isanu ajjü pi nyen pvü nu thola mathu kidhen nben.

¹⁵“Anyithu na jisha. Bvülo! Nthu nakhidha! Hi nkidhenla!” Tsalina mathu na kegoe sennu mizzatenti kesü wina kepa wi wa lela thola mathu ssi meya.

¹⁶Apvüwa na mathu ghena kemeshen mangla nmidha; ma mathu jügü zighedha. Ma ithu keqhaikedithu nu accülikesathu cüki kemeshen pi nccüca.

¹⁷Ithu na kekiqa khiewila gho nketen tsü nkaghangcha chu ghangden. Ithu na mizzatenti kesü mangla khuchiya nkesawa wi kekiqa tsü hie gho.

¹⁸Ghinyiwa na ithu cwen ben; ithu na lentonti wi lela lentsen meyala. Ithu tsathangthu na cendha; asakhen na ghodha.

¹⁹Amumuthu na tangwi na ju dugho keten miwi mbhiki, mathu na ithu jügü dugho. Mathu na yyishiphon thu wi ithu zanshaya; ithu meshen nkeben wi mathu na ayyikeshü wi ithu ghanya.

²⁰Mathu na ithu kahang bvüwa, Apvüwa na kessikeya kadimiwa, nkakeghothu tsüdi wi ithu khweya benle kesa ithu na nondi ketenwa tsü ghanya.

²¹Edom nu Uz nyithu, keqhelo; nthu na saya kemehai keben wi nongya. Nthu ghena ketizenkesa la gho tendha; nthu la kejüghekeya wi kemissü kulukhukhu saben.

²²Zion na ma kesami ghena muyadha; Apvüwa na ithu pi kushiyyi wi pen neng thsü nbendha. Isala Edom, Apvüwa na no meten cüaben.