Read Northern Rengma Naga NONKEGÜ 5 Bible Online

NONKEGÜ 5 - Northern Rengma Naga bible

NONKEGÜ 5

¹O Apvüwa, ithu miwi mangwa sadha khe meshen chilo. Ithu kejügheya keben wi ha ithu ghangchilo.

²Ithu keben na kijünyi thu kwen wi bendha; asangthu na ithu yen wi hangben.

³Ghinyi na ithu bathu pathidha, nu ithu jjathu na denyilethu saben.

⁴Ithu na atssü kejjü men pi nchithu yishü; nu ithu na kecan chan nsheithu yishüben.

⁵Sunsiesa nyelela gadathu ti jügüthi pi ithu nchala lela mnan meya thsü.

⁶Hang benya kemehai kedsakejjü muyale kesalina ithu na kuwhe sennu Ejipt nu Assiriya wi wa.

⁷Ithu bamyithu na samia, isala mathu na khili nmiladha. nu ithu na mathu kesamithu ghena ketizen saben.

⁸Nssümaghathu miwi mehaiki nkesathu na ithu miwi kekhang senben, nu thola mathu kekhang wina ithu hangsha meya.

⁹Nyu kepathithu na ketekevü wi kegoe; ithu na ithu kahang khuchi nu kedsakejjü bha waden.

¹⁰Kaghama na ithu mecang pi muwhe thsü, ithu hyu na sa pi annibhon ti npi kesa chu.

¹¹Nyu na Zion Yikha miwi ithu wubvüthu messameshü; Judea nyu tsüdi wi ithu ngathu ghan pi mathu kenen sa.

¹²Ithu ccülikesathu ssi wa hanthia; ithu keqhaithu kenyuwakü pi ncü.

¹³Ithu kepvünyithu meten pi nssümaghathu ti asu nyeggü thsü; pvüzathu na achan kedhi kekiyan pvü nu kulukhukhu sa.

¹⁴Keqhaithu na anyunutiwa kaghapeng-jenka wi donki meya ladha, nu pvüzathu na akhwi nsa ladha.

¹⁵Ithu kahang wi anonkeghe na bvüdha; ithu na kenashü mithon wi ahathana wadha.

¹⁶Ithu na kapvükeya mangla nmidha. Ithu na sami nu khili dedia tendha.

¹⁷Ithu na leben naa ntsa nu anyontssü ghena pala muzzi wadha.

¹⁸Kepaghenanye Zion Yikha tsü yisha pi caghangca ben, nu whewhethu na ma keyasa wi tsü kegoeben.

¹⁹Isala O Apvüwa, no anuphan kadimiwa, nu kekhang sen wa asakhen cuden.

²⁰No mangkesa na matsü kesie ithu teshi nu? No ithu meshen nengchi ntendha kwe?

²¹Apvüwa, ithu ssinu no wi gho nenglo! Ithu ssi neng gholo! Kheni ithu nyankethang tsü sa neng cülo.

²²Ala, no anuphanla ithu teshidha nu? Nleben ketsu ma sakhen nmi kwe?