Read Northern Rengma Naga EZEKIEL 1 Bible Online

EZEKIEL 1 - Northern Rengma Naga bible

EZEKIEL 1

¹ Amapi changhawa[1] asha mejü wi manga ghanan, hi Ezekiel, keqhaikedi sa kebenwa, Buzi tsawa na Babilon yyi Khebar Ghaku kete wi Judah kushinyithu gweghe hangden. Atssan na shachi, nu hi kemanthi wina Anyiza mu.

² (Tsüna kadimi Jehoiakhin ssinu kushiyyi wi kewa amapi mangawa wi.)

³Ciwi Babilon yyi Khebar Ghaku katen wi hi Apvüwa jüh kekhi zaya nu hi ma kekhang kidhenya.

⁴Hi yaki ghangchi nan caghamo aghawa na gho keten mu. Akulukeshü keti kesü wi atsancwe sachi, nu tsü kevü wi atsan na wegüben. Atsancwe sa kechi wi pala pahan na lezza ti wegüben.

⁵ Caghamo non witsü hi kahangli keben mejü anyi tsi ti kesa mu,

⁶Isala tsüthu tsüdila ammi mejüjü nu agisha mejüjü pvüden.

⁷Mathu ccüthu na meshonqhe, nu mathu ccümezen na amesü süpon ccü ti. Tsüthu na wegü pi lezza misi kethenG ti.

⁸Mathu mmi nu agisha mejüjü kesa miwi lela, mathu meshu kesüsü na anyi kwen mejüjü ben, nu kesü pi agisha kesüsü kekhu wi chi pvüden.

⁹Aghangsa kesüsü na agisha kenini zanshigü pi mathu gisha pang ketsükili kechi wi accügwen mejü saya. Mathu na khashi keshu wi agwo taghan pila akhang kesü sa nu waden.

¹⁰ Kahangli keben aghangsa kesüsü na ammi kepapa kesa mejüben: atu-uwa na anyi mmi, ajewa na ssensitemi mmi, tavüwa na amesü süpon mmi, nu asengwa na amumu mmi.

¹¹Aghangsa kesü na agisha kenini zanshigü pi ma kete wi kebenwa Aghangsa gishathu pang ketsükili, nu mathu gisha keni zansha pi mathu gwo meju pvüden.

¹²Aghangsa kesüsü na apen mejü wi jentanben, Isa nu ma khang na ntaghan phighela khiewa wa mvu khe waden.

¹³ Aghangsathu jawi annithegü ti kesa kesü na kuli keben anni na wegü kechi wi atsancwe na shhugho.

¹⁴Aghangsathu na atsancwe kembhi tsü gweghe lulu nu kuliden.

¹⁵ Hi Aghangsathu mejü tsü ghang keben wi pala accüqe mejü na mathu kesüsü kizanli dugho ayyi kidhen keben mu.

¹⁶Ma ccüqe mejü tsüdila makesü; kesüsü tsüdila alon menkedhu ti wegü, nu tsüthu tsüdila accüqe kepawa ma non non wi kehugili ben,

¹⁷nu accüqe mejüthu tsüna kejentan mejü wi khiewa wa mvu khe waden.

¹⁸ Ma ccüqethu pen kevü tsüdila anyon pi pong pvüden.

¹⁹Aghangsathu na kuli kechi wi accüqethu na mathu gweghe kevüliden, nu Aghangsathu na ayyi wina tang wi ki lethu, accüqethu la tsüti sa.

²⁰Aghangsathu na khiewa wa mvu khe wa, nu accüqethu na Aghangsathu ti sa, kepaghenanye Aghangsathu na tsüthu ghan senden.

²¹Tsalina Aghangsathu kuli nyelela ngan nyelela ameghü wi ki lethu accüqethu la tsü makesü sa.

²² Aghangsathu li miwi akhwetssü kemela pi tsankevü ti kesa na ben.

²³Ciwi tsankevü kekhu wi Aghangsathu na ngan nu agisha kenini pi ma shiwa kebenwa ketsüli nu agisha kenini pi mathu gwo wheng pvüben.

²⁴ Hi mathu gishathu pi kepighe hhai za; tsüna atssükedone hhai, süpahizi tenti hhai, kekhang ntsa Anyiza hhai ti. Mathu na npighe lathu mathu gisha zansha yaden,

²⁵isala tsankevü mi mathu li wina ahhai kesü na ghoben.

²⁶Tsankevü miwi safir pi sa ketheng kadipen kesü mu, nu kadipen miwi donki kebenwa na anyi kesü ti muben.

²⁷ Nu atsi tsüwa tsüna lezza pi anni non wi chi ketheng kewegü ti. Tsüna ma gwoben wegü pi

²⁸ccünieqho tsi kepapa mabenla ben. Kewegü tsüna Apvüwa keben pen tsütson kechiwa.