Read Northern Rengma Naga EZEKIEL 10 Bible Online

EZEKIEL 10 - Northern Rengma Naga bible

EZEKIEL 10

¹ Hi tsankevü na Cherubim miwi keben tsü ghangchi nan tsüthu miwi pala kesü safir pi kadipen kesa kesü ti mu.

² Anyiza na linenthsü mphi ketenwa wi khi, “Cherubim cakhu wi accüqethu jüwi tsü wa nu anni mihi pi nkwen pongyalo. Isa nu anni mihi tsüpi anyunutiwa miwi vvüzighe chilo.” Hi ma wa keten ghangben.

³Ma kedu wi Cherubim tsüna Kekinyijjen acülawa nu akulukeshü na anonwa ccühha tsü pongya.

⁴Apvüwa keten wegüthsü kesawa tsüna cherubim wina shagha nu kitsen sen Kekinyijjen kedulen wi wha. Tsaseng wi akulukeshü na Kekinyijjen pong, nu accühha na wegüthsü sa.

⁵Cherubim gisha kebhagha hhai na ameiwa ccühha wi lela zaya. Tsüna Apvüwa Kekhang ntsawa hhai ti sachi.

⁶Apvüwa na anyi linenthsü mphi ketenwa ya Cherubim cakhu wi kebenthu ccüqethu jüwi anni pahan khuyalo kekiza wi, anyiwa tsüna ciwi du nu accüqe kesü kete wi nganya.

⁷Cherubim kesü na ma kwen pi mathu jüwi keben anni non witsü chang chi nu anni mihi pahan khushiya, nu pi linenthsü mphi keten anyiwa tsü kwen wi chicü. Anyiwa na anni mihi khuya nu bvüa.

⁸Hi Cherubim kesüsü agisha kekhu wi anyi kwen ti kesa pvü keten mu.

⁹ Hi accüqe mejü keben mu, tsüdi makesü, kesüsü na Cherubim kesüsü kete wi ben. Accüqethu na alon menkedhu ti wegüben, nu kesüsü tsüdila accüqe kepawa manon wi kahagiliben.

¹¹Cherubim na kuli keshagha wi khapeghe-khaja nsala kejentan tsüdi wi waya. Mathu tsüdila khiewa wa mvu khe nkhapeghela gweghe waya den.

¹² Mathu gwo, mathu ghatsü, mathu kwen, mathu gisha, nu mathu ccüqethu na anyon pi pong pvüden.

¹³Accüqe hathu hana hi kemanthi atuwa wi kemuthu tsüti kesa.

¹⁴ Cherubim tsüdila ammi mejüjü na ben. Atuwa na amesü süpon mmi, keniwa na anyi mmi, kechengwa na ssensitemi mmi, nu mejüwa na amaghang mmi.

¹⁵(Tsüthu tsüna hi Khebar Ghaku kete wi kemuthu tsü makesü.) Cherubim na tang ameghü wi ki,

¹⁶nu kulithu accüqethu na mathu gweghe wa. Mathu na pighe le agisha zanshigü chithu, accüqethu na ciwi la mathu gwegheden.

¹⁷Cherubim na ngan wathu, accüqethu la ngan wa; nu Cherubim na pighe wa lethu, accüqethu na mathu nie wa, kepaghenanye Cherubim na tsüthu senden.

¹⁸Tsaseng wi Apvüwa keten wegüthsü kesawa tsüna Kekinyijjen kedulenwa tsü teshi nu ketsen sen Cherubim miwi kia.

¹⁹Hi ghang keben wi mathu na mathu gisha zanshigüya nu ayyi wina pigheki, nu accüqethu na mathu gweghe bvüa. Mathu na Kekinyijjen nishuwa kaghapeng-jenka wi ngan, nu wegüthsü kesa tsüna mathu miwi ben.

²⁰Tsüthu tsüna Khebar Ghaku wi kemu Israel Nyiza kekhu wi keben Cherubim tsi le kesa chüya.

²¹Mathu kesüsü tsüdi ammi mejüjü, agisha mejüjü, nu anyi kwen kesü ti kesa na agisha kesüsü kekhu wi ben.

²²Mathu mmi na hi Khebar Ghaku wi kemu mmithu cheng ntsawa. Cherubim kesüsü na meshonqhe wa.