Read Northern Rengma Naga EZEKIEL 11 Bible Online

EZEKIEL 11 - Northern Rengma Naga bible

EZEKIEL 11

¹Anyiza ghamu na hi piekiya nu ssi wa Kekinyijjen kaghapeng-jenka na nishuwa chi. Ciwi kaghapeng- jenka wi Azzur tsa Jaazaniya, nu Benaiya tsa Pelatiya, nu mizzatentiwa ccülikesa meshu keni pi wwala npvüza meshu nkwe nu manga keben hi mu.

²Anyiza na hi wi khi, “Keshü nyiwa, anyi hathu hana acho nkemehai kiden nu sansi-sangwe nkemehai pi anyunutiwa cüden.

³Mathu na khiden, ‘Ithu na wan ajjenthu saneng yaben. Anyunutiwa na awwenpfü kesü ti, nu ithu na tsü non wi asa ti kesa, isala tsüna anni wi ketanla ithu khwe cüden.’

⁴Tsalina khili mathu khimeshü cülo, keshü nyiwa.”

⁵Apvüwa ghamu na hi ssisenya, nu Apvüwa na ajüh hapi anyithu cülo kiza : “Israel nyithu, nthu na mangwa khi nu mangwa kidenben khe hi chüben.

⁶Nthu na he anyunutiwa wi anyi ji ntsa pathi nu alentontithu wi akamangthu na kepong sadha.

⁷“Tsalina Kemisintsa Apvüwa, hi hawa hapi nthu kiza ben. Anyunuti hawa ha ntsakhiwa awwenpfü kesüle, isala asawa tsüna mangwa nu?

⁸Nthu na pathi kesa akamangthu tsü le! Nthu na hewi ben nten, hi anyunutiwa wina nthu pi khala ben le. Nthu na njünnu messi benla? Hi anyi njünnu kepiethu ssigho nthu kaghasheden.

⁹Hi anyunutiwa wina nthu khushi nu pi asangthu cüaden . Hi nthu pi shü thsüale cenyadha.

¹⁰Nu nthu na nthu diyyiwa wi aghi wina nthu pathiaben . Tsaseng wi anyi tsüdila hi Apvüwa le kesa chüyaden.

¹¹Anyunuti hawa ha awwenpfü kesü na manon wi asa keben khwekeya ti nthu khweya nben. Nthu na Israel yyi kahe wi ten lela hi kemeten pi nthu cüaden .

¹²Nthu na hi Apvüwa le kesa chüyaden, nu nthu na nthu jenphon mizzatentithu yen nie keten wi nthu na iyen bheghe nu ijüh khukechithu nkina le kesa chüyaden.”

¹³Hi atusenjüh-khi keben wi, Pelatiya na qancadu shüa. Hi ayyi wi nkhwendu jisha nu, “Nyele, Kemisintsa Apvüwa! No Israel wi anyi tsüdi pathiale ben kwe?”

¹⁴Apvüwa na hi kiza .

¹⁵“Keshü nyiwa, Jerusalem wi hangkeben anyithu na no nu kushiyyi wi keben npvüshangthu cüki keccünengli ben le. Mathu na khiden, ‘Kushinyithu na Apvüwa kinyi le kesa temeja mtsü le. Ma ithu ya ayyiwa ghongya thsüdha.

¹⁶“Tsalina npvüshang kushinyithu wi hi khi keben hapi kiza lo. Mathu kesun pi mizzatenti kelensie wi chi nu mathu jügüzighe pi diyyithu kepa wi wa thsü kesawa tsüna hi le. Isala khilila, matsü keu jüwi hi mathu na wakea yyithu witsü mathu gweghe benladen.

¹⁷“Tsalina hi Kemisintsa Apvüwa, hi mangwa khiben khe pi mathu kiza lo. Hi mathu jügüzighe pi chi ketheng diyyithu wina saghuya, nu Israel yyi pi mathu cü neng shaden.

¹⁸Mathu na kheneng kegho wi, nkemetha, nankenontssü tsikezhü mathu na muya ketenthu tsü teshi nsathu yishü.

¹⁹ Hi aleben ketheü nu kemeshen ketheü pi mathu cüden. Hi mathu lebenkedhu lonwa tsü khupi nu ajühkeya leben pi mathu cüaden .

²⁰Tsaseng wi mathu na mathu leben tsentsa sa nu iyenthu nie, nu ijüh khukechi tsüdila nieyaden. Mathu na inyi sa, nu hi mathu Nyiza saaden.

²¹Isala hi anyi thowa na nkemetha nu nankenontssü tsikezhüthu kinyi mvuten khe tsüthu pathiaben . Mathu na kuli kethengwa ghena hi kemeten pi mathu cüaden . Kemisintsa Apvüwa na khidha.”

²² Cherubim na pighe shagha, nu accüqethu na mathu gweghe bvüa. Israel Nyiza keten wegüthsü kesawa tsüna mathu miwi ben.

²³Tsaseng wi wegüthsü kesawa tsüna anyunutiwa teshi nu kitsen sen nishuwa ayikha wi wa.

²⁴Kemanthi tsüwa wina Anyiza ghamu na hi piekiya nu hi ssi neng gho Babylonia wi kushinyithu wi chi cü. Tsaseng wi kemanthi tsüna cen,

²⁵nu hi Apvüwa na pi hi ccüca kechi tsüdi pi kushinyithu kiza .