Read Northern Rengma Naga EZEKIEL 12 Bible Online

EZEKIEL 12 - Northern Rengma Naga bible

EZEKIEL 12

¹Apvüwa na hi ccüneng.

² “Keshü nyiwa, no kahhaghethu jawi hangben. Mathu nyon na ben, isala tsüthu pi mangla mu nten; mathu khuna na ben, isala tsüthu pi mangla zaya nten; kepaghenanye mathu na kahhaghe nyithu.

³“Tsalina keshü nyiwa, kushinyi kesü ti ntsanqai bhenya, nu aghaja tsü npi kegho wi alentsen chilo. Nu anyi tsüdila no apen kepa wi bvü tendha le kesa muya thsülo. Kahhaghe nyi tsüthu na no chüshiya mehaile.

⁴Atsathang keben jüwi kushinyi sala ntsanqai bhenya, nu mathu na no muya kemehai salo, nu minulen wi no kushinyi sa sen nu bvü keten ti mathu ya no ghang thsülo.

⁵Mathu ghang keben wi, njjenkeshon pabhi nu ciwi na nkhhi tsü khushi yalo.

⁶Mathu ya no akhhi pi ndepfü wi kelepi nu n-nyon shanbhon pvü nu khiewa waten khe nmula kejang wi du keten muya thsülo. No sa kechiwa tsüna Israel nyithu ghena kekitsan kesü saaden.”

⁷Hi Apvüwa na hi salo kekhi tsü sa. Tsü ghanan wi hi kushinyi kesü ti ikhhi bhenya, nu hi minulen wi atsanjang wa keten wi ikwen pi ijjenkeshon pabhi nu ciwi na shuya. Anyi tsüdi ghang keben wi hi akhhi tsüpi idepfü wi chipi nu bvüa.

⁸Ghanenwa wi Apvüwa na hi kiza .

⁹“Keshü nyiwa, khili Israel nyi kahhaghethu na no mangwa sabendha nu kesa keübendha.”

¹⁰Hi Kemisintsa Apvüwa na mangwa pi mathu kiza ben khe hapi mathu kiza lo. Ketsijüh hawa hana Jerusalem wi kaditsawa nu ciwi hang keben anyithu tsüdi ghena la le.

¹¹No sa kechiwa tsüna mathu miwi sagho keten zensu kesü, nu mathu na kushinyithu nu atssüzü sa ben le kiza lo.

¹²Mathu miwi kekhang sen keben kaditsawa na ma khhi pi ma depfü wi chipi nu atsankejang wi mathu na ma ghena ajjen-keshon wi aku pabhi ketheng wi tsüna shagha bvüaden . Ma ma nyon qhanbhonya nu khiewa waten khe mu nben.

¹³ Isala hi kaghanthsü zanshigü pi ma ghong yaden. Tsaseng wi hi ma ssi Babilon nyunutiwa wi wa nu ciwi ma apen tsü nmula shüaben.

¹⁴Hi ma kadijjen wi kebenthu, ma kesansithu, nu ma ghikehiethu tsüdi jügüzighe pi alen tsüdi wi chi, nu anyithu na mathu pathiale bhaben.

¹⁵“Hi mathu jügüzighe pi mizzatentithu kepa wi nu asang diyyithu wi kechi wi mathu na hi Apvüwa le kesa chüyaden.

¹⁶Hi mathu jawi anyi kezeng-u ketan aghi, azeng, nu kesakinaa wi hang yathsü, isanu ciwi mizzatentithu jawi na mathu khatila nankenontssü kekulithu sadhanu kesa meshenshiya nu hi Apvüwa le kesa chüyaden.”

¹⁷Apvüwa na hi kiza .

¹⁸“Keshü nyiwa, no dsathu kenenkhukhu salo, nu no jjüthu messi pi kedheggülo.

¹⁹Mizzatentiwa tsüdi wi hawa hana Kemisintsa Apvüwa na ketsijüh pi Jerusalem nyithu khilila mathu yyi wi hang kebenthu kecüle kiza lo: Mathu na kedsa wi kenenkhukhu saaben, nu kejjü wi messi nu kedheggüten. Mathu yyi na kaghacang sa thsüaden, kepaghenanye ciwi hang ketenthu tsüdila ayen nkenie nyithu.

²⁰Anyunutithu khili anyi na pong kebenthu tsü yasaben, nu diyyiwa pi aghansha kesü saaden. Tsaseng wi mathu na hi Apvüwa le kesa chüyaden.”

²¹Apvüwa na hi kiza,

²²“Keshü nyiwa, mangkesa na Israel nyithu na jühbvü hawa ha khineng neng benten nu? ‘Matsü na waden, isala matsü khipi kethengthu tsüna mangla nkenye saden.’

²³‘Tsalina hi Kemisintsa Apvüwa na tsü jjügi tsüna mangwa khile ben khe khili pi mathu kiza lo. Hi jühbvü tsüwa ya asakhen sa thsüaden . Israel nyi jawi tsü khineng nbendha. Tsü mithon wi mathu wi kiza lo: “Matsüwa na ghodha, nu matsü khipi kethengthu tsüna atsentsa gho tendha le!

²⁴“Israel nyithu jawi kemanthi milikemesa nyelela atusenjüh atsentsa nkenye kekhithu na ben ntendha.

²⁵Hi Apvüwa, mathu ccüneng, nu hi mangwa khi khe tsü saaden. Minu nbendha, nthu kahhaghethu, nthu kahang tsüwi hi sale nthu kitsan kechithu tsü hi saaden. Hi khidha.” Kemisintsa Apvüwa na khiben.

²⁶Apvüwa na hi wi khi,

²⁷“Keshü nyiwa, Israel nyithu na no kemanthithu nu atusenjüh-kekhithu tsüna haseng wi gho keten kesie wi cüki le meshenden.

²⁸Tsalina Kemisintsa Apvüwa hi khiben le kesa pi mathu kiza lo: Minu ntendha. Hi mangwa khidha khe saaden. Hi Kemisintsa Apvüwa, hi khidha!”