Read Northern Rengma Naga EZEKIEL 13 Bible Online

EZEKIEL 13 - Northern Rengma Naga bible

EZEKIEL 13

¹Apvüwa na hi kiza,

²“Keshü nyiwa, Israel nyithu wi atusenjüh-kechüthu mathu ketanla meshen nu atusenjüh-khi ketenthu tsü khimeshü cülo. Mathu ya Apvüwa jühkinalo kiza lo.”

³Hawa ha Kemisintsa Apvüwa na khi, “Atusenjüh-kechü kejüphonthu na dedi tendha le! Mathu na mathu ketanla meshenshiya nu pi mathu kemanthi le khiden.

⁴Israel nyithu nthu tusenjüh-kechüthu na ma men nmi pi whewhethu na anyunuti keyasa kesü wi hang keten tile.

⁵Mathu na akhweti kebvücapenthu tsü hie nten, nyelela akhweti jüpfü nten, tsalina Apvüwa tsathang wi aghi na kegho wi Israel khweya ntendha.

⁶Mathu kemanthithu tsüna milikemesa, nu mathu matsü ssan pi kethengthu tsüna milikemesa le. Mathu na hi ketsijüh khiten le khiden, isala hi mathu kesun nchi. isala mathu na mathu jühthu tsü sacen kegho ghangten le!

⁷Hi mathu wi kizaden: Nthu na muketen kemanthithu tsüna atsentsa nye, nu nthu na ssan ketheng tsüwa la milikemesa. Nthu na tsüthu tsüna ijüh le khiden, isala hi nthu nkiza le!”

⁸Tsalina Kemisintsa Apvüwa na mathu wi kiza ben, “Nthu jühthu na atsentsa nkenye, nu nthu kemanthithu na milikemesa. Hi nthu shunden.

⁹Nthu atusenjüh-kechüthu na atsentsa nkenye kemanthi sen, ssan pi ketheng pi nyu len tsütsonsa ketenthu, hi kemeten pi nthu cüale bendha. Inyithu na ajjügi südhele saghu keya wi nthu na ciwi ben nten; nthu nyan pi Israel nyithu nyan kezhü wi saghu nten; nthu na khiela nthu yyi wi kheneng ghoya nben. Tsaseng wi nthu na hi Kemisintsa Apvüwa le kesa chüyaben.

¹⁰ “Atusenjüh-kechüthu na pala tsüdila mehaiben le isakhi nu inyithu len tsütsonsa den. Pala tsüdila ntsakhiwa nmehai le! Inyithu na alon kenkuwa pi akhweti jü nu atusenjüh-kechüthu na kemiki pi nyen dha.

¹¹Atusenjüh-kechüthu wi mathu khweti na qanca wa tendha le kiza lo. Hi atsan shathi kesun chiden. Aghayi na tsü miwi dugho den, nu ameghü kekhang na gho tsü moben.

¹²Akhweti na qancaden, nu anyi tsüdila nthu wi keü, kemiki pi kenyen tsüna mangwa kemehai sayanu isa khiden.”

¹³Hawa ha Kemisintsa Apvüwa na khiben, “Ileben keminu wina hi ameghü kekhang, atsan keshathi, nu aghayi kesun pi akhweti yasa thsüaden .

¹⁴Hi aghandu akhweti, mathu na kemiki pi nyen ketheng tsü pakhhi, nu tsü pachazighe, nu alentontithu katen wi ben thsüaden . Tsüna bvüca pi nthu tsüdila kecenthiaben . Ciwi ccüna anyi tsüdila hi Apvüwa le kesa chüyaden.”

¹⁵“Akhweti nu kemiki pi tsü kenyenthu ya ileben keminu kekhang chüyaden. Tsaseng wi hi nthu wi akhweti nu kemiki pi tsü kenyenthu na nmidha le kiza den —

¹⁶tsüthu tsüna atusenjüh- kechüthu na Jerusalem tsüdi mehai nkeben wi lela tsüdila mehai ben le khi ketenthu le.” Kemisi ntsa Apvüwa na khidha.

¹⁷Apvüwa na khi, “Tsalina keshü nyiwa, nthu jawi nzathu npi wina khi kethengthu tsü ghangchilo. Mathu khimeshülo,

¹⁸nu Kemisintsa Apvüwa na mathu wi kiza keben jüh hapi mathu kiza lo:” “No nzathu dedi tendha! Nthu na anyi tsüdi ghena chuchüthu kwenkeqhan tegü, nu chuchüthu likeshonthsü sa, isanu mathu ya nyu kepa miwi kekhang benya le saden. Nthu na inyithu miwi kahang nu keshü kekhang benya nu tsü sennu nthu kekiyi sale saden.

¹⁹Nthu na achentha kewha kesü nu amesa keu yale kesalina inyithu tuwi hi nyuwakü nsaladha. Nthu na anyi nkeshü qo nyi pathi, nu nkahang qothu ya hangya thsüden. Tsüti nthu na milimesa nu inyithu na nthu nondiden.”

²⁰Hawa ha Kemisintsa Apvüwa na khiben, “Hi nthu na akwenkeqhan pvü nu anyi kahang nu keshü kekhang senya le ketenwa tsü hi nanmeghüden. Hi nthu kwen wina tsüthu khupi nu nthu na mathu miwi kekhang sen ketenthu tsü bvü thsüaden .

²¹Hi nthu likeshonthsüthu khupi nu inyithu ya nthu kekhang wina kutitan na anuphan ghena shagha bvü thsüaden . Tsaseng wi nthu na hi Apvüwa le kesa chüyaden.

²²“Nthu milikemesa wina hi patena mvu nketenthu anyi kemehaithu pathidha. Nthu na anyi nkemehaithu ya mathu nkemehai teshi nu mathu kahang hangshaya kemehai len khenden.

²³Tsalina khili nthu atsentsa nkenye kemanthi nu nyu len tsütsonsa keten khipi ketheng tsüna nmidha. Hi nthu kekhang wina anyithu kekashaden, nthu ya hi Apvüwa le kesa chüya thsüale kesalina.’ ”