Read Northern Rengma Naga EZEKIEL 14 Bible Online

EZEKIEL 14 - Northern Rengma Naga bible

EZEKIEL 14

¹Israel nyi ccülikesathu pahan na gho hi wi Apvüwa kemeshen keü.

²Isala Apvüwa na hi kiza,

³“Keshü nyiwa, anyi hathu na mathu leben pi atsikezhüthu cü nu atsikezhüthu ya mathu len tsütson pi kesami wi chiden. Mathu na hi mathu jüh luneng chi benle meshenten kwe?

⁴“Khili mathu ccüneng nu Kemisintsa Apvüwa, hi mangwa pi mathu kiza ben khe pi mathu kiza lo: Anyiza na Israel nyi tsüdila ma leben pi atsikezhüthu cü nu tsüthu ya mathu len tsütson pi sami thsü nu gho atusenjüh-kechü kesü wi kecenkinali ketenwa tsüna hi wi keluneng kesü muyaden — keluneng tsüna mathu ji atsikezhüthu na keya qowa tsü.

⁵Atsikezhüthu tsüdi Israel nyithu yala hi wina kheneng bvü thsüdha, isala hi luneng kechiwa tsüna mathu jüh keyawa tsü mu nengya benle ghangben.

⁶“Tsalina khili Kemisintsa Apvüwa, hi khi keben hapi mathu kiza lo: Kheneng gho nu nthu atsikezhü nankenontssüthu tsü teshilo.”

⁷Khathansha wi Israel nyi kesü nyelela asangthu Israel nyithu jawi kahang kesü na hi wina kheneng wa nu atsikezhüthu kinyi, nu wa atusenjüh-kechü kesü wi kecenkinali wa khe, hi Apvüwa, ma keluneng khu chiden le!

⁸Hi ma matangden. Hi ma pi tsütsonca kesü sa cüden. Hi anyithu jawi na ma khuaden, isanu nthu na hi Apvüwa le kesa chüyaden.

⁹“Keujüla atusenjüh-kechü meshu kesü mechu pi atsentsa nkenye keluneng khuchi thsü lethu, tsüna hi Apvüwa ma mechu kesalina. Hi Israel nyithu jawi na ma khuaden.

¹⁰Atusenjüh-kechüwa nu anyi ma ssinu kecenkinali kesawa manyi qho kemeten makesü muyaden.

¹¹Hi hati kesa wina Israel nyithu hi teshi wa keten wina mathu kesamithu pi mathu nakhiya kemehai wina mathu cüsha yaden. Mathu na inyithu saaben, nu hi mathu Nyiza sayaden.” Kemisintsa Apvüwa na khidha.

¹²Apvüwa na hi kiza,

¹³“Keshü nyiwa, keujüla diyyi kesü na kesami sa nu ituwi ajüh tsentsa nsala lethu, hi ikwen chang chi nu ma kedsakejjü kegho len khen cüden. Hi azeng kesü kesun chi nu anyi nu asahangthu la shü thsüaden .

¹⁴Keujüla Noah, Daniel, nu Job ma kecheng na ciwi hang keben sa lela, mathu kemehai na mathu kahang ketan hangshaya kesale.” Kemisintsa Apvüwa na khidha.

¹⁵“Nyelela hi aghangsathu kesun chi nu anyithu ghan, nu ayyiwa ya messi ntsa sa thsü nu thola tsü pvüdhi sen kijünyi nwa thsüla

¹⁶nu keujüla meshu kecheng tsüna ciwi hangben lela, Kemisintsa Apvüwa, hi hangben keten Nyiza tsentsa kesalina mathu na mathu tsangathu lela hangshaya nkesa, mathu ketanla mathu kahangli hangshaya, nu ayyiwa na aghansha ceng kesa.

¹⁷“Nyelela hi aghi ssigho diyyi tsüwa miwi chi, nu kededi aghi tsanqaithu sengho anyi nu aghangsathu lela pathi khi thsü,

¹⁸nu keujüla meshu kecheng tsüna hang keben sa lela hi Kemisintsa Apvüwa, hangben keten Nyiza tsentsa kesalina mathu na mathu tsangathu lela hangshaya nkesa, isala mathu ketanla mathu kahang ketan hangshaya kesa.

¹⁹“Keujüla hi adhagha kesun pi diyyi tsüwa miwi chi, nu ileben keminu wina kahangli kejon khuya nu anyi nu aghangsathu kejon na shü,

²⁰nu keujüla Noah, Daniel, nu Job hathu na ciwi hang keben sa lela, hi Kemisintsa Apvüwa, hangben keten Nyiza tsentsa kesalina, mathu na mathu tsangathu lela hangshaya nkesa. Mathu kemehaiwa na mathu kahangli ketan hangshaya kesa le.”

²¹ Kemisintsa Apvüwa na ha khiben: “Hi kemeten keteshü ntsa mejü — aghi, kepica, aghangsathu, nu kesakinaa ghei hathu ha kesun pi Jerusalem miwi chi nu anyi nu aghangsathu la dedi thsüaden .

²²Keujüla anyi kesü na hangya nu ma tsangathu hangshaya lethu mathu na no wi kegho wi mathu ghang chinanlo. Mathu na khatila nmehai khe ghangchi, nu hi kemeten sengho Jerusalem miwi chi kebenwa tsüna meshon le kesa chüti yaden;

²³Tsasengwi no hi kekuli tsüdi wi majjügi kemehai benle kesa chüyaden.” Kemisintsa Apvüwa na khidha.