Read Northern Rengma Naga EZEKIEL 16 Bible Online

EZEKIEL 16 - Northern Rengma Naga bible

EZEKIEL 16

²“Keshü nyiwa, Jerusalem na nan-kenontssü kekuli khatila sa khe tsütson pi ma kizalo.

³Jerusalem wi Kemisintsa Apvüwa na ma wi khi keben pi kizalo: “Kanaan yyi wi na no pvüghaya. Nba na Amor nyi, nu njja na Hitti nyi kesü.

⁴No kepvügha wi thola npvüli nhan nyelela no sa nmetha, nyelela amcü pi no n-nyen, nyelela athsü pi no nmeju.

⁵Thola no nantizen ntsa nu hathu ha mangla sale nsa. No kepvügha wi thola no nantizen nsa. No pie pi akhemi wi khala.

⁶“Tsaseng wi hi pvüdhi wa keten wi no njjü wi kuweng keben mu. No ajjü pi ngwoben pong pvü benla, isala hi no ya shü nsa thsü mvula.

⁷Hi no ya aghanglani cüki kemehai kesü ti shagha thsü. No sie nu zü shaghala ghala kemehai kesü saya, ntseni shhugho ya, nu nlissen na shigüya, isala no kemessü le.

⁸“Hi pvüdhi wa neng nan, no nyu ssinu kinansuliwa kesa tsü cu kebenla hi muya. Hi agwomejuwa ameiwa pi no kemessü tsü whengbhonya nu no ssinu kenenli le khishichi. Anle, hi no ssinu keshanyi jüh cenya, nu no iji saya.” Hawa ha Kemisintsa Apvüwa na khi.

⁹“Isanu hi atssü pi ngwo wi ajjü tsü bhu pia. Hi oliv deli pi no nyen cüa.

¹⁰Hi ayakekhu gwokemejuwa kaghazu pi no pvü thsü nu asahyu kemehai ntsa pi accüguwen kesa, linenthsü likeshang, nu akemezithsü pi no cü.

¹¹Hi alon menkedhu akhwe nu ayanthu pi no pvü thsü.

¹²Hi amitsan nu akhuna thighi pi no cü, nu kadiliwen kemehai ntsa kesü pi no pvü thsü.

¹³No suna nu rükatssü pi ntsi sa pvü nu keshüthangla linen nu akemezi pi ayakekhu thsüthu mphi. No awhengsu kemehai ntsa pi kegü mesa dsa, nu anikholi nu oliv delithu dsa. Ntsikemehai na wegüchang sa, nu no kadijja kesü sa.

¹⁴No ntsimehaicen kesa ghena mizzatenti tsüdi wi n-nyanthang ntsa sa, kepaghenanye ntsi sapi mehai ntsa kecüwa tsüna hi.” Hawa ha Kemisintsa Apvüwa na khiben.

¹⁵“Isala no ntsikemehai nu inyankethang pvü nu anyi no wi keghothu tsüdi ssijen wa.

¹⁶No nthsümeni pahan pi no kekinyipenthu keji sa, nu keqheza menkedsa kesü ti ngwo pi anyi tsüdila cüa.

¹⁷No hi suna nu rükatssü pi no kecü khupi npvüza tsithu zhü, nu tsüthu ssinu keqheza kekuli sa.

¹⁸No ayakekhu thsüthu hi pi no kecü tsüpi atsikezhüthu miwi chi, nu oliv deli nu hankedemvuthu hi pi no kecü tsüpi atsikezhüthu tsü cü.

¹⁹Hi atsse, awhengsu kemehai, oliv deli, nu anikholi pi no cü, isala no tsüthu tsüpi atsikezhüthu kenen sale kesa ghena pi ahhansha kekinyi sa.” Hawa ha Kemisintsa Apvüwa na khiben.

²⁰“Tsaseng wi no pvügha pi hi kecü tsathu nu angathu tsü khupi ahhansha sapi atsikezhüthu cüa. No ituwi ajühtsentsa nkesen tsü ketanla nmehai mtsü kesa miwi,

²¹no itsangathu khupi ahhansha sapi atsikezhüthu cüdha kwe?

²²No keqheza menkedsa kesü sala nan-kenontssü kahang tsüwi kutitanla no ghanyi wi kemessü nu no ketanla njjü wi kuweng keben tsü khiela meshenchi n-nan.”

²³Kemisintsa Apvüwa na khiben, “No dedidha le! Dedidha le! No nkemehai tsüthu tsüdi sa, nu pala

²⁴alen katen tsüdi wi atsikezhüthu kekinyipen sa nu keqheza menkedsa kekuli sa.

²⁵No ntsikemehai pvüdu anisha wi chia. No ketanla no pi no wi keghothu tsüdi cü, nu no atsathang wila keqheza menkedsa kesü miwi lela pongca.

²⁶No nmvu keten, njenphon Ejipt nyithu ya no ssinu awe wi du, nu no no keqheza menkedsa tsü sa nu hi ya ilebenminu thsüa.

²⁷“Khilitsü hi kemeten pi no cü nu hi kesawegü nshei tsü khuya le ikwen changyadha. Hi no khupi Filistinthu, no nanmeghü nu no nketsatan kekuli nan-nontssü ketenthu kwen wi chidha.

²⁸“Kepaghenanye no bvü sen jügü kewa Assiriya nyithu wi nleben kagha mu meya. No mathu ghena keqheza menkedsa sa gho, isala tsüthu lela nleben kagha sa meya.

²⁹No Babilon nyithu asenlikesa mizzatenti ghena la keqheza menkedsa sa, isala mathu la nleben kagha sa ncü.”

³⁰Hawa ha Kemisintsa Apvüwa na khiben: “No nkemejüghe keqheza menkedsa kesü ti kekuli hathu ha sadha.

³¹Alentonti tsüdi wi no atsikezhüthu kekinyipen sa nu keqheza menkedsa kekuli sa. Isala no keqheza menkedsa kepathu ti apisa ghena nwa.

³²Isala no nza kesü ma wuba kenen kesa mithon wi anyi kepathu ssinu shenpfü-nyibvü keqheza kesa nyi ti le.

³³Keqheza menkedsa kesü na nyu ma kutimen pi cüden, isala no tsü alaa pi no kenenthu cü, nu kahe wi tsüdila melli sengho no ssijen thsüden.

³⁴No keqheza menkedsa miwi ma kepa kesa kesü le. Thola no meten pi tsüti salo nkhi. No akutimen meya; no pi mathu cü le! Anle, no ma kiqa le.”

³⁵Tsalina Jerusalem keqhezawa! Apvüwa na mangwa khiben khe kinalo.

³⁶Hawa ha Kemisintsa Apvüwa na khiben, “No keqheza menkedsa ti nthsümeni bhu nu ngwo pi no kenenthu, nu nan-kenontssü tsikezhüthu tsüdila cü, nu no ntsangathu pathi pi ahhansha sapi atsikezhüthu cü.

³⁷Hawa ha ghena hi hatu wi no ssinu kinansuli ketenthu, no mathu nen ketenthu nu mathu n-nanmvu ketenthu tsüdi gweghe ssighoaden. Hi mathu gweghe ssigho no vüya, nu tsaseng wi hi nthsümeni bhu nu mathu ya no kemessü tsü mu thsüaden .

³⁸Hi no keqheza nu anyi kepathi ghena no meshensa den, nu ileben-keminu nu lebenketsu wina keshü pi no meten cüaden .

³⁹Hi no pi mathu kekhang kekhu wi chi, nu mathu na no apen khiewi pi keqheza menkedsa nu atsikezhü kekinyipenthu satheng khe zansha piaden. Mathu na nthsümenithu nu alon menkedhu tsanqaithu khuya nu no kemessütha teshiaben .

⁴⁰“Mathu na anyi khang kesü kechü chi nu alon pi no kecen thsüden; nu mathu na mathu njünnu pi no südhesügheaben.

⁴¹Mathu na njjenthu mecang nu kinyibvü tentithu ya no kemeten muya thsüden. Hi no ya keqheza menkedsa nsala nu no ya aju pi kenenthu ncü thsü laden.

⁴²Tsaseng wi ileben keminu cen yaben, nu hi ceen saaben.

⁴³No acali tsüwi hi khati nmiwi kuli khe malia, nu no kekuli tsüdi sapi hi ya ilebenminu thsüa. Tsalina hi no ya tsüthu tsüdi dhi thsüden. No mangkesa na nketsatan sapi nan-kenontssü kekulithu wwaten nu? Kemisintsa Apvüwa na khidha.

⁴⁴Apvüwa na khi, “Jerusalem, anyithu na ajühbvü hawa ha pi no ghena khiben; ‘Ajja cheng, anga cheng,’

⁴⁵No ntsakhiwa njja nga. Ma ma wuba nu ma tsangathu nanmeghü. No npvünonthu, mathu wubathu nu mathu tsangathu n-nanmvu kesathu tsüti sadha le! No nu npvünon nyunutithu na Hitti nyi ajja kesü nu Amor nyi aba kesü ben.

⁴⁶“Nbi nu ma nyuthu tsüna Samaria, ma aghawa wi ben.

⁴⁷No mathu cükha nie nu mathu nan-kenontssü kekulithu tsü sa mvu ben kwe? Nyele, matsü keusha jü ketan na no kekuli tsüdi wila mathu miwi nmehaila le.

⁴⁸Kemisintsa Apvüwa na khi, ‘Hi hang keben Nyiza tsentsa, npvünonwa Sodom nu ma nyuthu na no nu n-nyuthu ti kekuli nkemehai khiela nsa.’

⁴⁹Ma nu ma ngathu na kedsakejjü meshumena, kecca nu ceen kesa wi hang keya ghena kapvü, isala mathu na ketha-uthu nu kemeshon khi nkeyathu shei meshen nchi.

⁵⁰Mathu na kapvü nu aleben-dhu nu hi n-nanmvu ketenthu tsü sa, tsalina hi mathu yasa le kesa no chüthaben.

⁵¹Samaria na no kesami kesa pahan ketanla nsa. No ma miwi lela nan-kenontssü kekuli sa. No nketsatan nkemejüghe pi ghapechi lethu npvünonwa tsü ghang pi nkesami ti le!

⁵²Tsalina no kejüghekeya ha npvüthu yishü. No kesamithu na npvünonthu miwi la nmehai ntsa kesalina nkete wi mathu ghang pi kesami nyi ti nsa le! Tsalina n-mmi nkhwenca nu kejüghe pvüyalo, kepaghenanye no ghena npvünonwa tsü ghang pi metha ben.”

⁵³Apvüwa na Jerusalem wi khi, “Hi Sodom nu ma nyuthu, Samaria nu ma nyuthu, sapi mehai neng ya thsüaden . Anle, hi no la mehai neng ya thsüaden .

⁵⁴No no ketanla nghena kejüghe yaben, nu no kejüghekeya tsüna npvünonthu na khatila mehai kayinu kesa pi ccücaden.

⁵⁵Mathu na mehai neng yaden, no nu n-nyuthu la mehai neng yaden.

⁵⁶No kapvü keten jüwi Sodom nankeqhe

⁵⁷nu nkemehai npi khushi kechi wi tsüti sa kwe? Khilitsü no ma ti — Edom nyithu, Filistin nyithu, nu no nanmeghü keten njjenphon kepathu na no nankeqhe wadha.

⁵⁸No no nketsatan nu nan-kenontssü kekuli kesathu ghena agükeccü nsathu yishü.” Apvüwa na khidha.

⁵⁹Kemisintsa Apvüwa na khi, “Hi no kepvü qo pi nmiwi kuli chiaben, kepaghenanye no no khishi kechi tsü tsü nchüla nu cenkethenjühwa tsü bheghedha.

⁶⁰Isala hi tsü no ghanyi keben wi no ssinu cenkethenjüh sa ketheng tsü nyuwaküden, nu hi no ssinu anuphanla benketen cenkethenjüh kesü saaden.

⁶¹No nbi nu npvünonwa manyi mu nengkeya wi no khati kuli khe meshenya nu jügheden. Hi manyi ya n-ngathu ti sa thsüaden, hana hi no ssinu cenkethenjüh kesa wi nmi lela.

⁶²Hi no ssinu cenkethenjüh kesa tsü sapfüaden, nu no hi Apvüwa le kesa chüyaden.

⁶³No sazzi kesathu tsüdila teshi pi no cüaden, isala no tsüthu tsü meshenya nu npang kale kesa jüghe mtsü shaben.” Kemisintsa Apvüwa na khidha.