Read Northern Rengma Naga EZEKIEL 17 Bible Online

EZEKIEL 17 - Northern Rengma Naga bible

EZEKIEL 17

¹Apvüwa na hi kiza,

²“Keshü nyiwa, ajühkaghape kesü pi Israel nyithu kiza

³nu mathu ya Kemisintsa Apvüwa, hi mangwa khiben khe chüya thsülo: Ciwi amumu keti kesü na ma gisha kenyen mehai ntsa kesa tsü zanshigü ben. Tsüna pighe sen Lebanon yikhathu wi wa sedar chanton shoni kesü kashüa,

⁴nu ma tsü sen asenlikesa yyi kesü wi wa tsüpi asenlikesathu nyunuti kesü wi chia.

⁵Tsaseng wi ma Israel yyi wi aghang kaghani kesü khuya nu tsüpi ayyi kecca keshüthangla atssü na tsü ten pi shigüya kemehai wi sheng chia.

⁶Aghang tsüna shigü shagha kemeshentsse ton sala mnete chang zighe wa. Ma cünathu na shigü sennu amumu tsüwa kejentan wi ki, nu ma ghazanthu dhukegü cha dua. Kemeshentsse ton tsüna ma cünathu nu mawathu na pongya.

⁷Amumu keti kepa wi kesü ma gisha keti nu ma kenyen sha ntsa ben. Kemeshentsse tonwa tsüna khili tsü asanku wi shigü keben pen miwi lela atssü jiki pi ma cü benshe kesa kaghang wina ma ghazan nu mawathu chang sennu amumu wiwa ki.

⁸Isala Kemeshentsse tonwa tsüna pi ayyi kemehai, atssü keten pen wi sheng chi kesalina mawa shigü nu ma bi bün pi kemeshentsse ton kemehai keti kesü sa wa.

⁹“Tsalina hi Kemisintsa Apvüwa na keü chi,” Kemeshentsse tonwa ha hang nu shigüya ben kwe? Amumu atuwa tsüna tsü ghanzan pfü, ma bi mahansha, nu ma cünathu pashü sen bvü nu tsüthu tsü yala jü wa thsüa nben kwe? Tsüna mizzatenti kekhang nyelela kezü sa nu tsü pfü nben.

¹⁰Anle, tsüna pi sheng theng, isala tsüna hang nu shigüya mehai kwe? Nishuwa meghü na gho tsü mo chithu jü wa nben kwe? Tsüna ma shigü keben pen wi shü wa nben kwe?”

¹¹Apvüwa na hi wi kiza.

¹² Anyi kahhaghethu wi ajühkaghape ha jjügi mangwa khe chübenla nye khe keü nanlo. Mathu wi Babilon kadimiwa na Jerusalem wi gho nu Kadimi nu ma kekhu wi kedithu ssinu Babylonia wi wa neng ben le kizalo.

¹³Ma Kadimi theghi meshu kesü ssiya nu ajüh kecen kesü sa, nu ma ya ajühkeyawa salo kesa ghena kekishen kesü sa thsü. Ma anyi kemechanthu ssi bvüa,

¹⁴mizzatentiwa ya nshagha neng thsüle kesa nu keponghu tsü nie thsüle kesalina.

¹⁵Isala Judah Kadimiwa na hhaghe nu ketsikinathu kesun pi Ejipt wi goru nu süpahithu khie wa thsü. Ma haicenya ben kwe? Ma tsü sennu bvüya mehai kwe? Ma keponghu tsü bheghe nu kemeten mu meyala bvüya nbenle!

¹⁶Kemisintsa Apvüwa na khi, “Hangben keten Nyiza tsentsa kesalina kadimi hawa na Babilon wi shüaben, kepaghenanye ma ma kekishen nu ma khu pi kadipen wi chi kecüwa Babilon kadimiwa ssinu keponghu tsü bheghe kesalina.

¹⁷Ejipt süpahizi kekhang lela Babilon nyithu na ayyi chhüki nu kekuthi ku chhü nu anyi kejon pathiale keshagha wi mathu kiqa pi ssikesaliya nbendha.

¹⁸Ma ma kekishen nu ma nyu ssinu keponghu tsü bheghedha. Ma hathu tsüdi sadha, nu ma khili bvüya ntendha.”

¹⁹Kemisintsa Apvüwa na khi, “Hi hangben keten Nyiza tsentsa kesalina, ma keponghu niele nu inyan wina kishen ketheng bheghe kesalina hi kemeten pi ma cüaden .

²⁰Hi asa kaghanthsü zanshigü pi ma ghong yaden. Hi ma ssinu Babilon wi wa nu ciwi kemeten pi ma cüaden, kepaghenanye ma itu wi jühtsentsa nsenla.

²¹Ma süpahi kemehai ntsathu ya aghi wi shü thsü nu hang kebenthu jügüzighe pi apen tsüdi wi chiaben . Tsaseng wi no hi Apvüwa na khidha le kesa chüya den.”

²²Hawa ha Kemisintsa Apvüwa na khiben: “Hi sedarton kesüsü mili paya, nu ma connie keshigü kesü pashiya; nu tsüpi ayikha kemisi kesü wi sheng den,

²³Israel yikha kemisi ntsa miwi. Tsüna ma cünathu shigü nu ma bi bün, nu Sedarton keti kemehai kesü sayaden. Awa lenkepapa tsüdi ciwi hang, nu mawathu chakhu wi n-nieden.

²⁴Ayyi wi achantonthu tsü la hi Apvüwa le kesa chüyaden. Hi achanton kesiethu shüchi nu kemeluthu ya sieya thsüaden . Hi achanton kemejjüthu ya jü wa thsüa, nu jü kewathu ya mejjüya thsüaden . Hi Apvüwa, hi khidha. Hi sale khi kesawa tsü saaden.”