Read Northern Rengma Naga EZEKIEL 19 Bible Online

EZEKIEL 19 - Northern Rengma Naga bible

EZEKIEL 19

¹Apvüwa no hi ya Israel kaditsa keni ghena aleben gükeccü khwi ha salo kiza;

²Nshinyi jja na ssensitemi bvü, khati kesa kesü sadha nu! Ma ssensitemi npvüzawa aghe-nkemehaithu jawi ma zzathu noncca.

³Ma ma zza noncca pi asa kejügü pi sansi, ma anyi keghan dsa yen chüya.

⁴Mizzatentithu na ma cüki zaya, nu ayyi ku kesü wi ma dieya. Mathu na adhasü pi ma vüya, nu ssisen Ejipt wi bvüa.

⁵Ma ma kaghang bhataghatha npi kesa chu hie. Tsaseng wi ma azza kepa wi ssi neng, nu ma ssensitemi kedaggü kesü sa shagha.

⁶Ma zügükeya seng wi, ma ssensitemi kepathu ssinu kekicenli, nu ma la asa ghan chüya, nu anyi keghan dsawa saya.

⁷Ma akhwetithu pasa, anyutithu yasa, Ayyi wi anyithu na ma magha kechi wi tsüdila qhethiketen sa.

⁸Mizzatentithu na saghu sennu ma ssisale sa, kahe wi tsüdila anyithu na gho. Mathu na mathu sa kaghanthsü zanshigüya, nu mathu ca wi ma ghongya.

⁹Mathu na ma khupi amighe khang kesü wi chi sennu Babilon kadimiwa wi wa. Mathu na ma hieya, ma kaghamo hhai na Israel yyishiphon thu wi nza nengla

¹⁰Nshinyi jja na kemeshentsse ton kesü pi akuza kesü kete wi sheng ketheng ti kesa. Kepaghenanye ciwi atssü na meshumena ben, nu kemeshentsse tonwa tsüna ma wa nu ma bi na kepong saben.

¹¹Ma cünathu na zü nu shigü shagha nu pi kadi-khhatsüthu sa. Kemeshentsse tonwa tsüna sie pi akulu lela cu; tsüdila ma wa popo nu ma kesie tsü mu.

¹²Isala alenben ketsuthu kwen na ma ghazan wina pfü pia nu pi ayyi wi khala chia. Nishuwa meghü na ma bi mo teqha, ma cünathu pashüa; tsüthu na qha nu pi mecang!

¹³Khilitsü tsüpi ayyi keshü wi shengdha, qhayi atssü nkemi ben kesü wi;

¹⁴anni na kemeshentsse ton wi mecangkiya; anni na ma cünathu nu ma bi mecang. Ma cünathu mangla sa nu zü neng nbendha. Hawa ha aleben gükeccü khwi kesü; ha saneng-saja sa.