Read Northern Rengma Naga EZEKIEL 20 Bible Online

EZEKIEL 20 - Northern Rengma Naga bible

EZEKIEL 20

¹Tsüna ithu na kushiyyi wi kewa mapi tagü asha mangawa tagha ghanan. Israel nyi zitenti ccülikesathu pahan na gho hi wi Apvüwa kemeshen keü le ituwi donkiya.

²Tsaseng wi Apvüwa na hi kiza.

³Keshü nyiwa, anyi hathu ccüneng nu Kemisintsa Apvüwa na khi keben jüh hapi mathu kizalo: Nthu na hi kemeshen keü gho benla? Hi hangben keten Nyiza tsentsa kesalina hi nthu ya hi wi mangla keü thsü nten. Hi kemisintsa Apvüwa na khidha.

⁴“No mathu miwi kemeten khishi chile kiden bendha ma, keshü nyiwa? Isathu tsüti salo. Mathu bamyithu na nan-kenontssü kekuli kesa tsüpi mathu kiza neng chilo.

⁵ Hi khi kebenwa hapi mathu kizalo. Hi Israel kessikeya wi hi mathu wi ajüh khishichi. Hi Ejipt wi hi pi mathu ccüca nu mathu kiza: Hi Apvüwa nthu Nyiza le.

⁶Tsaseng wi tsü hi Ejipt wina mathu ssishhu nu mathu ssisen wa hi mathu ghena ayyi kesü kessikeya, ayyi kemehai kenyan, ayyi tsüdi wi kemehai ntsawa wi tsü chi cüle khishichi.

⁷Hi mathu ya mathu na nen keten nan-kenontssü tsikezhüthu tsüpi khala nu Ejipt cenpvü milikemesathu tsüpi mathu kenenkagha nsa lalo kiza, kepaghenanye hi Apvüwa mathu Nyiza.

⁸Isala mathu na ijüh hhaghe nu nkina mvula. Mathu na nan-kenontssü tsikezhüthu tsüpi nkhala nyelela Ejipt cenpvüthu tsü nteshila. Hi Ejipt wi tsü mathu pi ileben keminu kekhang tsüdi chü thsüle kidenya.

⁹Isala hi tsü nsala, tsüti sathu inyan kenyen keben ghena, kepaghenanye mathu gweghe hang keten nyithu jawi na hi Israel nyithu wi hi mathu ssinu Ejipt wina shhua tendha le jisha chitheng.

¹⁰“Tsüti hi Ejipt wina mathu ssi shhugho ayyikeshü wi chia.

¹¹ Hi anyi thowa na nieya khe kahang muya keten ijühkhukechi pi mathu cü nu iyenthu pi mathu sansi.

¹² Hi Apvüwa, mathu sametha cü ketenwa le kesa pi mathu ya chü nengya thsüle kesalina Sabbath yen kenie pi ithu jüwi ajüh kecen zensu kesü saya.

¹³Isala ayyi keshü wi keben wi lela mathu na ijüh meya mvu. Mathu na thowa na nieya khe kahang muya keten iyenthu bheghe, nu ijühkhukechi meya mvu. Mathu na Sabbath nakhi ntsa sa. Hi ciwi ayyikeshü wina mathu ya ileben keminu maben chüya thsü nu mathu dedia le kidenya.

¹⁴Isala hi tsüti nsa, kepaghenanye tsüti sa lethu hi Ejipt yyi wina Israel ssi keshhugho kemu mizzatentithu jawi inyankenyen ben.

¹⁵ Tsalina hi mathu ssinu hi ayyi pi mathu kecü ayyi kenyan nu kemehai, ayyi tsüdi jawi kemehai ntsa wi tsü nwale kesa ayyikeshü wina kishen.

¹⁶Hi kishen kepaghenanye mathu na ijühkhukechi tsü meya mvu nu iyenthu bheghe, nu Sabbath nakhi mathu ji atsikezhüthu tsü kinyi mvu wa.

¹⁷“Isala hi mathu nantizenya. Hi ciwi ayyikeshü wina mathu npathi le südheya.

¹⁸Tsü mithon wi hi mathu jawi anyi kepvünyithu kitsan chi: Nthu baqhaithu yenthu tsü n-niela; mathu sa keten yenthu n-niela; nyelela mathu na nan-kenontssü tsikezhüthu tsüpi nthu nakhi nsala.

¹⁹Hi Apvüwa nthu Nyiza, iyen nu ijühkhukechithu nielo.

²⁰Sabbath pi atsathang kemetha kesü saya, isa lethu tsüna ithu na sa ketheng cenkethenjüh zensu kesü, nu hi Apvüwa nthu Nyiza le kesa meshenya benle kiza.

²¹“Isala ashüsha tsüwa la ijüh nkinala. Mathu na iyen nu ijühkhukechithu nie keyawa kahang muya keten tsü bheghe nu n-niela. Mathu na Sabbath nakhia. Hi ayyikeshü wi mathu ya ileben keminu tsüdi chü thsü nu mathu tsüdi pathia le kidenya.

²²Isala hi tsüti nsa, kepaghenanye tsüti sa lethu, hi Ejipt wina Israel ssi keshhugho kemu mizzatentithu jawi inyankenyen keben ghena.

²³ Tsalina hi ayyikeshü wi kekishen kepa wi kesü sa. Hi mathu gishü zighe pi ayyi tsüdi wi chia le kishen

²⁴Hi tsü sa, kepaghenanye mathu na ijühkhukechi tsü meya mvu, iyenthu bheghe, Sabbath yen nakhi nu mathu bamyithu na kinyi kegho atsikezhüthu tsü kinyi.

²⁵“Tsaseng wi hi nkemehai yenthu nu kahang sengho nketen jühkhukechi pi mathu cüa.

²⁶Hi mathu ketanla mathu pala khukechi pi mathu nakhi thsü, nu hi mathu ya mathu tsa tssütsewa pi ahhansha sa thsü. Hawa lethu kemeten pi mathu cü nu mathu ya hi Apvüwa le kesa chüya thsüle kesalina.

²⁷“Tsalina keshü nyiwa, khili Israel nyithu wi hi Kemisintsa Apvüwa na mangwa pi mathu kiza ben khe pi kizalo. Hawa ha mathu bamyithu na hi wi ajühtsentsa nkesa ghena hi kekimenni len kesü.

²⁸Hi mathu ssi shhugho hi ayyi pi mathu cüle khishi ketheng wi tsü chi cü. Mathu na ayyishiphon kemisi nu achanton kemejjüthu kemu wi mathu na tsüthu cakhu wi ahhansha sa. Mathu na ahhansha kesathu kemecang wi nu kisengtssü sengho kekinyi wina hi ya ilebenminu thsüa.

²⁹Hi mathu keü: Nthu na wa keten apen kemisithu tsüna mangwa nu? Tsalina hi tsü nten na tsüthu tsüpi ‘Apen kemisithu’ isa ci wa.

³⁰Tsalina Israel nyithu wi Kemisintsa Apvüwa na khi keben jüh ha pi mathu kizalo: Nthu na mangsa le nthu bamyithu kesami tsüti sa, mathu tsikezhüthu tsü kinyile ben nu?

³¹Nansü lela nthu na aju tsüti kesathu pi kinyi nu nthu tsangathu pi anni wi ahhansha kesa wina atsikezhüthu pi nthu nakhi den. Isathu nthu Israel nyithu na khili la gho hi wi hi kemeshen keü tenle! Hi Kemisintsa Apvüwa, hangben keten Nyiza tsentsa kesalina, hi nthu ya hi wi mangla keü thsü nten.

³²Nthu na nthu leben wi mizzatenti kepathu ti sa, diyyithu kepa wi hang nu achanton nu alonthu kinyi ketenthu ti sale meshen den. Isala khili la tsüti saya nben.

³³“Hi Kemisintsa Apvüwa, hi hangben keten Nyiza tsentsa kesalina, hi ileben keminu wi hi kizü nu kekhang tsüdi sennu nthu miwi kekhang sen tenle kesa nthu kitsan ben.

³⁴Hi nthu na bvüzighe sennu diyyithu tsüdi wi ben wakea wina nthu ssighu sen kegho wi hi kekhang nu ileben keminu pi nthu ccüca den.

³⁵Hi nthu ssigho mizzatentithu yyikeshü wi chiaben, nu ciwi tsü hi nthu mmi ghangtanla nthu meshensa den.

³⁶Hi Sinai yyikeshü wi nthu bamyithu meshensa kesa tsüti khili nthu la meshensa den.” Kemisintsa Apvüwa na khiben.

³⁷“Hi zükeqhe nu nthu ghan senya nu nthu ya hi cenkethenjüh tsü nie thsüden .

³⁸Hi nthu jawi hhaghe keten nu sami ntsa ketenthu khusen bvüaden . Mathu na khili hang keben yyithu wi tsüna mathu khushiya den, isala hi mathu ya Israel yyiwi ghoneng thsü nten. Tsaseng wi nthu na hi Apvüwa le kesa chüya ben.”

³⁹Kemisintsa Apvüwa na khi, “Khilitsü Israel nyithu, nthu tsüdila nthu kenen saya yilo! Nthu na atsikezhüthu tsü kinyi benlo! Isala haseng witsü nthu na ijühkina nu ajuthu pi atsikezhüthu kinyi nu inyan kemetha kinakhiwa tsü nsa lalo kesa nthu kitsan ben.

⁴⁰Ciwi ayyiwa wi iyikha kemetha Israel yikha kemisiwa witsü nthu Israel nyithu tsüdila hi kinyiden. Hi nthu miwi hi nen nu nthu ya ahhansha kesathu, nthu pala khukechi kemehai ntsathu nu kemetha juthu sen nu hi kegho tsü ghang benden.

⁴¹Nthu diyyithu wina bvüzighe sen nu keben wi hi nthu ssigho saghukeya seng wi hi njthu na ahhansha kesathu kemecang tsü yacüaden, nu mizzatentithu na hi metha le kesa muya den.

⁴²Hi nthu ssineng gho hi ayyi pi nthu bamyithu cüle khishi ketheng Israel yyi witsü nthu na hi Apvüwa le kesa chüyaden.

⁴³Tsasengwi nthu na kejüghe kekulithu kesa tsüdi nu nthu ketanla nthu nakhi kesa meshen yaden. Nthu kekuli nkemehai kesa tsüthu tsüdi ghena nthu ketanla nthu sa nontssü aden.

⁴⁴Hi hi kenyuwakü tsü khweyale kuli keshagha wi nthu Israel nyithu na hi Apvüwa le kesa chüyaben, kepaghenanye hi nthu ketesüketehu nu gheshighena kekulithu ghena kemu qo pi nthu miwi nkuli.” Kemisintsa Apvüwa na khidha.

⁴⁵Apvüwa na hi kiza:

⁴⁶Ma khi, “Keshü nyiwa, acülawa na anni chilo. Ajühkhi pi acülawa matang, nu atusenjüh khipi acülawa ayinong shun chilo.

⁴⁷Acülawa ayinong wi Kemisintsa Apvüwa na mangwa khiben khe kinalo kizalo: Ghangchilo! Hi anni pi chi bendha, nu tsüna no wi achan tsüdi kahang le keshü lela mecang shaben. Mangla tsü patenenya nben . Tsüna acülawa na bvüzighe sennu aghawa shun ben, nu anyi tsüdila annikeqhe kisawa tsü ghong yaben.

⁴⁸Mathu tsüdila hi Apvüwa, anni pi tsü mecang chi nu thola tsü patenenya nben kesa muyaben.”

⁴⁹Isala hi luneng, “Kemisintsa Apvüwa, hi ya tsü nsa thsü lalo! Anyi tsüdila hi keshüthang ajjügi kedhu khi mvu tenle sala lebenmagha bendha.”