Read Northern Rengma Naga EZEKIEL 21 Bible Online

EZEKIEL 21 - Northern Rengma Naga bible

EZEKIEL 21

¹Apvüwa na hi kiza,

²“Keshü nyiwa, Jerusalem khimeshü chilo. Anyithu na kinyi keten penthu tsü khimeshü chilo. Israel yyi kitsan chilo,

³hi Apvüwa, hi khiben: Hi nthu ghinyiwa. Hi hi njünnu hanshi pi nthu nyi kemehai le nkemehai lela tsüdi süthiaben

⁴Hi hi njünnu sennu aghawa na cü acülawa kecu anyu tsüdi kaghanie den.

⁵Anyi kesüsü tsüdila hi Apvüwa, hi njünnu hanshi yadha nu pi theng neng ntenle kesa chüben.

⁶“Keshü nyiwa, no ntuketeshi nu nleben qangkhi wa keten ti ghadhilo. Anyi tsüdila no muya kemehai pen wi ben nu nleben güccüla ghadhilo.

⁷Mathu na no wi mangkesa na ghadhi bennu kesa keü lethu, mathu wi jühtheü gho ketenwa tsü ghena le kizalo. Tsüna ghothu kemessi na mathu leben pong shaden, mathu kwen na keyha waden, mathu na kempvüza nmila, nu mathu khu na khukhu waben. Matsü na ghodha, tsüna hewi bendha.” Kemisintsa Apvüwa na khidha.

⁸Apvüwa na hi wi khi,

⁹“Keshü nyiwa, atusenjüh-khilo. Anyithu wi hi Apvüwa na khi keben hapi kizalo: Annu kesü, njünnu yiyha saya nu misiyadha.

¹⁰Tsüpi süthi le kesa ghena ma yiyha sayadha, misi pi atsancwe ti phüphü sadha. Ciwi anonghethi kesa na ben ntendha, kepaghenanye inyithu na ketsatan nu kemeten tsüdi nmeshen chiladha.

¹¹Njünnu misi bendha, senle kesa ghena kiden theng. Tsüna ma yiyha sa nu misidha, pi nyu kepathi kwen wi chile kesalina.

¹²Leben ketizensa nu ghadhilo, keshü nyiwa; njünnu hawa ha inyithu ghena, nu Israel ccülikesathu tsüdi ghena la le. Mathu pi inyithu kepa wi wwala pathiaben . nu atu-nkemi sa aleben whenglo!

¹³Hi inyithu kemehai keteshi ghang ben, nu keujüla mathu na leben khapeghe meya mvu lethu, hathu ha tsüdila mathu miwi sa ghoaben .

¹⁴Keshü nyiwa, khili atusenjüh-khichilo, nkwencen, isalethu njünnuwa na süju süju saden. Tsüna nyu süthi keten njünnu kesü, pateqhe nu süthi keten njünnu kesü.

¹⁵Tsüna inyithu sapi ccükwenshü nu accümeshü den. Hi njünnu atsancwe ti cwencwe kesa kesü pi mathu nyunutiwa pateqhe nu süthi le kesa kidenyadha.

¹⁶Ajewa nu tavüwa sü walo, njünnu ketiwa! No khiewa peghe wa khe sülo.

¹⁷Hi la ikwencen, nu ileben keminuwa tsüna cen ben. Hi Apvüwa hi khidha.”

¹⁸Apvüwa na hi kiza.

¹⁹Keshü nyiwa, Babilon kadimiwa na ma njünnu ghoya kemehai alen keni mechan chilo. Tsü keni qho diyyi kesü wina ketegü shhugho ben. Alen lonpighe wi ketsütson zensu kesü pi chi.

²⁰Kesü lethu Ammon nyunuti Rabbah wi kewa len pi kadimiwa ccüca den, kepawa lethu Judah nyunuti khweti ketheng Jerusalem wi kewa len.

²¹Babilon kadimiwa na alen lonpighe wi ketsütson zensu pi chi ketheng kete wi ngan den. Ma alen khiewa kewa-u khe chüyale kesalina ma ma lakusü pi kejen nan; [5] ma atsikezhüthu wi kecenkinali; ma asahang pi ahhanshakesa michen tsü ghang nan.

²²Khili ma kwen ajewa pi alakusü ‘Jerusalem’ zensu sa kethengwa tsü ghan senyadha! Tsüna ma ya wa nu akhweti ketonji sa, aghi jisha, akhweti ketonji tsüpi kaghapeng-jenkathu wi chi, ayyi chhü pi akhweti zhü nu kekuthipen chhülo kiza ben.

²³Jerusalem nyithu na ha nondiya nben, mathu na ponghu kethengwa tsü ghena. Isala tucüki khi kethengwa ha mathu kesamithu tsü meshenya thsü, nu mathu ghanya benle kesa mathu kitsan kechi.

²⁴Tsalina hi Kemisintsa Apvüwa, hi ha khiben; No kesamithu tsü kilishi tendha. Anyi tsüdila no khati sazzi khe chüyaden. No no kekuli tsüdi wi no kesami pi ccücaden. No kemeshensa wi bendha, tsalina hi no pi nghinyithu kwen wi chiaben .

²⁵“No gheshighena, Israel kekhang kesen nkemehaiwa, ntsathang na no kemeten sakhen sa gho tendha.

²⁶Hi Kemisintsa Apvüwa, hi khidha. No kadiliwen nu alikemeju khupi yilo. Mangla makesü saneng ntendha. Ketha-u pieki pi kekhang sen thsülo! Kekhang sen kebenthu zanshalo!

²⁷Yasalo, yasa! Anle, hi anyunutiwa pi keyasa kesü sa thsüaden . Isala hi kemeten pi anyunuti hawa ha cü thsüle kessi kethengwa tsü npi kegho chu ha sa nben. Tsaseng wi hi tsüpi ma cüaben.

²⁸ “Keshü nyiwa, atusenjüh-khilo, Hi Kemisintsa Apvüwa na khi benle kesa hapi Ammon nyi Israel kimenni kebenthu tsü kizalo: Mathu wi khilo: Njünnu kesü pi yasa cüle kidenyadha; tsüpi nyu pathi; Atsancwe ti phüphü misiyadha.

²⁹No kemanthi kemuthu tsüna atsentsa nye, nu no tucüki kekhithu tsüna milikemesa le. No gheshighena nu nmehai, nu ntsathang na gho tendha, tsüwa tsüna no kemeten sakhenwa. Njünnuwa tsüna nsun wi qanca dughoa le bendha.

³⁰“Njünnu pi chiyalo! Hi khiewa no sahang chi, nu no ayyi khiewa pvüghaya khe ciwi njüh kaghaten den.

³¹Hi ileben keminu na annikeqhe ti teshi pi nmiwi kechi wi no tsü chüyaden. Hi no pi anyi pala keyasa chü ntsa, nu kedaggü kwen wi chiaben .

³²Anni pi no yasa den. Njjü na no diyyiwa wi kejiden, nu thola no nmeshen neng laden.” Apvüwa na khidha.