Read Northern Rengma Naga EZEKIEL 22 Bible Online

EZEKIEL 22 - Northern Rengma Naga bible

EZEKIEL 22

¹Apvüwa na hi kiza.

²“Keshü nyiwa, no anyi kepathi nyi pi pong keben nyunutiwa tsü jühkaghaten le kiden ben ma? Ma nan-kenontssü kekulithu tsüdi khimetha pi ma kizalo.

³Anyunutiwa wi hi Kemisintsa Apvüwa na ha khi benle kizalo; Kepaghenanye no n-nyithu ji ntsa pathi nu atsikezhüthu kekinyi wina no nakhidha, nu ntsüwa na gho tendha.

⁴No anyi kepathithu nu no atsikezhü kesathu tsüpi no kinakhi wina sazziben, tsalina atsathang na gho tendha; ntsüwa na cendha! Tsalina hi mizzatenti ya no nankeqhe nu diyyi tsüdila no nkhichi sa thsüdha.

⁵Diyyi kete wi nu kelensie wi kebenthu na no ayen nkenie ghena no nankeqhe.

⁶Israel ccülikesathu tsüdila mathu kezü nondi nu anyi pathi.

⁷ Anyunutiwa wi thola ma bajja nyuwakü nsa. No asangthu mechu nu denyilethu nu magha-maghangthu mechu dsaden.

⁸ No apen kemethathu kenyuwa nmi, nu no Sabbath yen nie nten.

⁹N-nyithu pahan na nyu pathi le kesa ghena kepathu cüki milikemesa khiden. Mathu pahan na ahhansha sapi atsikezhüthu kecü tsü dsaden. Pahan na keshüthangla mathu sajjü kenen sa nu anonkwen benden.

¹⁰ Mathu pahan na mathu bathu wubvü ssimehai den. Pahan na nzathu na asha kaghapeng nzayen sa keben wi lela mathu ssimehai den.

¹¹Pahan na shenpfü-nyibvü keqheza kekuli sa, nu mathu cünyithu nyelela mathu tsüggüthu tsü zanden.

¹² N-nyithu pahan na anyi kepathi ghena athün yaden. Anyi pahan na pisa pi mathu pvüshang Israel nyithu kenna thsü wi kekiyi ya, nu tsüti kesa ghena ben yaden. Mathu na hi malidha.” Kemisintsa Apvüwa na khidha.

¹³“Hi ikwenshen sennu no ketengdsa nu nyu kepathi miwi dugho den.

¹⁴No kemeshentsü hi no papia le kegho wi no kempvüza sa nyelela nhacü zankiya mehai benle saten kwe?

¹⁵Hi n-nyithu jügü zighe pi diyyi nu mizzatentithu tsüdi wi chi, nu no nkemehai kekulithu pi asakhen sa thsüaden .

¹⁶Tsüti sa nu mizzatentithu kepa na no nyuwakü nben, isala no tsü hi Apvüwa le kesa chüyaben.

¹⁷Apvüwa na hi wi khi,

¹⁸“Keshü nyiwa, Israel nyithu na ituwi nsenla kemehai sadha. Mathu na rükatssü pi anni wi mecang metha nu khushikeya sengwi amighe keku, khwisa mighe, tin, amighe, nu shisha ti le.

¹⁹Tsalina khili hi Kemisintsa Apvüwa na mathu wi kiza kebenwa lethu mathu na tsüti nsenla kemehai le. Hi mathu tsüdi ssi gho Jerusalem wi saghu yaden,

²⁰tsüti rükatssü tsen, khwesa mighe, amighe, shisha, nu tin pi anni wi mecang metha keten tsü makesü saaden. Ileben keminu nu ighekepvü na amighe tsen pi anni wi llecha keten tsüti mathu ghangcha piaden.

²¹Anle, hi mathu pi Jerusalem wi saghu nu ma cakhu wi anni sachi nu ileben minu pi mathu pacha cüden.

²²Rükatssü pi anni kisa miwi llecha keten tsüti Jerusalem wi mathu pacha cüden, tsasengwi mathu na mathu Apvüwa leben keminu pvüya benle kesa chüyaben.”

²³Apvüwa na hi wi kiza neng,

²⁴“Ma khi,” Keshü nyiwa, Israel nyithu wi mathu yyi na nmidha; tsalina ileben keminu wina kemeten pi mathu cü benle kizalo.

²⁵Accülikesathu na ssensitemithu na aghangsathu ghan pi ketheng miwi ghamo keben tsüti. Mathu na anyi pathi nu pisa nu keben tsüdi khuya kemehai chu khuya, nu mathu anyi kepathi ghena anyi kejon pi denyilethu sa thsüdha.

²⁶ Keqhaikedithu na ayen bheghe nu mangwa na metha khe tsü nyuwakü kesa nmidha. Mathu na kemetha nu nkemetha chü kepapa nsaladha. Mathu na kemetha nu nkemetha kepapa kesa pi nyu nsansiladha, nu mathu na Sabbath yen nkhichiladha. Tsüti kesalina Israel nyithu na hi nyuwakü nsaladha.

²⁷Kidhan wi kedithu na adennithu na mathu ghan ketheng aghangsathu mezüthi zighe keten ti le. Mathu na benyale kesa ghena nyu kepathi kekuli saden.

²⁸Atusenjüh-kechüthu na kesami hathu kuthi pila anyithu na kemiki pi ajjen-keshon nyenphon ketheng ti sadha. Mathu na kemanthi tsentsa nkenye mu nu atsentsa nkenye tucüki khi. Mathu na Kemisintsa Apvüwa jüh khi tenle saden, isala hi Apvüwa na mathu nkiza .

²⁹Kebanthu na nyu mechu nu nyu teng den. Mathu na ketha-uthu nkenen sa nu asangthu mechu dsaden.

³⁰Hi anyi kesü ya akhweti sa thsü nu bvüca keben penthu wi ngan nu hi ileben keminu pi ayyiwa yasa le kegho wi tsü khweya thsüale kesa bha, isala kesüla nmu.

³¹Tsalina hi ileben keminu meyisha pi mathu miwi chiaben, nu mathu kuli kethengwa tsü ghena anni ti mathu mecang shaben.” Kemisintsa Apvüwa na khidha.