Read Northern Rengma Naga EZEKIEL 23 Bible Online

EZEKIEL 23 - Northern Rengma Naga bible

EZEKIEL 23

²“Keshü nyiwa, kuti tsü wi pvünan nyi na ben.

³Manyi ghanyi Ejipt wi hang keten wi manyi pvünyimetha wi hang meyala keqheza menkedsa sa wa.

⁴Keqhaiwa nyan na Oholah (ma pi Samaria mithon sa), nu ghanyiwa nyan na Oholibah (ma pi Jerusalem mithon sa) isa ci. Hi manyi qho yaya, nu manyi na atsangathu pvügha pi hi cü.

⁵Oholah na iwubvü sa lela keqheza menkedsa kesü saben nu Assiriya wi ma ssinu kinansuli ketenthu ghena asajjü kenen pi ma pong pvü.

⁶Tsüthu tsüna nmiepheü kesa tsikesüthsü kepvü süpahithu, keben kemehaithu, nu kedi kemisithu; mathu tsüdila pvüza atsikemehai nu goru süpahi kedithu ketan.

⁷Ma Assiriya kedithu tsüdi ghena qhezabvüwa tsü, nu ma sajjü kenen kesawa tsüna ma ssi wa Assiriya tsikezhüthu kekinyi pi ma nakhia.

⁸Ma Ejipt wi ma pvünyimetha bhataghakea tsü wi keqheza menkedsa sa keshagha kekuli tsü nteshi. Ma kaghala tsü wi nyu ma ssimehai nu ma pi keqheza menkedsa ti sa.

⁹Tsalina hi ma khupi ma ssinu kinansuli keten Assiriya nyi, ma nmvu ntsa ketenthu kwen wi chia.

¹⁰Mathu ma kemissü sa thsü nu ma tsathu nu ma ngathu ghanya, nu njünnu pi ma süthia. Kahe wi lela nzathu na ma cüki khi.

¹¹“Ma pvünanwa Oholibah na ha mu lela ma nmehai pfü nu Oholah kekuli miwi lela keqheza menkedsa kekuli sa.

¹²Ma la Assiriya keben kedi nu kemehaithu ghena ma sajjü kenen sa ntsa — süpahi tsikesüthsü kewegü kepvüthu, goru süpahi kedithu, nu kepvüza — atsikemehaithu tsüdi.

¹³Hi ma ntsatantha sakea nu pvünan keniwa na atuwa ti nmehai kesa mu.

¹⁴“Ma ma nketsatan wi dhu pfüpfü dua. Ma Babilon kedi kemisithu tsizhü pi ajjen-keshon miwi hoki nu nmiepheü kesa pi nyenya, ageshi keqhanthsü pi ageshi qhan nu alikeqhanthsü pi qhan pvü kesa tsüthu ghang pi ma nen ntsa sa.

¹⁵

¹⁶Ma tsüthu muchi meyi asajjü nmvu ntsa sa nu nyilothu kesun pi Babilon wi tsüthu wi chia.

¹⁷Babilon nyithu na ma ssimehai le gho. Mathu na ma ssimehai. Mathu na ssimehai nu ma nakhi ntsa sa nu ma mathu nan-nontssü ntsa sa.

¹⁸Ma nyu nkuthila nu anyi tsüdila ma keqheza nyi kesü le kesa chüya. Hi ma pvünanwa nan-nontssü kesa ti ma la nan-nontssü wa.

¹⁹Ma kaghala tsü Ejipt wi keqheza menkedsa kesü kesa tsüti keqheza menkedsa sa kayi wa.

²⁰Ma npvüzathu asajjü kenen pi pong pvü nu gada nyelela goru kejigü ji ti kesa tsü nmvu pongca wa.”

²¹(Oholibah, no kaghala kesü sa nu Ejipt wi sazzi keten tsü wi npvüzathu na ntseni meghe nu no pvünyimetha bhataghakea tsüti no nketsatan kekuli sa neng mvu ben.)

²²“Tsalina Oholibah, hawa ha hi Kemisintsa Apvüwa na no wi kiza ben. No no kinansuli ketenthu miwi nlidhamangdha, isala hi mathu ya nmiwi aleben minu thsü nu mathu ssigho no vü thsüden.

²³Hi Babilon nyithu nu Khaldia nyithu tsüdi, Pekod, Shoa, nu Koa wi anyithu nu Assiriya nyithu tsüdila ssigho den. Hi kepvüza tsikemehai, keben kemehaithu nu kedithu, kedi kemechan nu goru süpahi kedithu tsüdi ssigho den.

²⁴Mathu na aghawa süpahizi goru gari nu atsanqai kepvü garithu ssigho no ssikaghashen den. Mathu na atsonhithu nu aliwenthu pvüya nu no vüden. Hi no pi mathu kwen wi chiaben, nu mathu yen wina njüh kaghaten den.

²⁵Hi nmiwi leben minu keben ghena, hi mathu yala leben minu nu nmiwi kuli thsüaden . Mathu na nmitsan nu nkuna handhi nu ntsangathu pathi thsüaden . Anle, mathu na na wina atsathu nu angathu zanya nu mathu kahang na pi mecang shaden.

²⁶Mathu na nthsümeni zanqhe nu nghe alon menkedhu ccenya den.

²⁷Hi no Ejipt wi ben keten wina kuli kegho asajjü kenen nu nkemehai kekuli tsüdi pi asakhen saaden. No atsikezhüthu tsü ghang neng nyelela Ejipt cüki nmeshen neng laden.”

²⁸Hawa ha Kemisintsa Apvüwa na khiben: “Hi no pi no nanmeghü keten nu no mathu nan-nontssü ketenthu kwen wi chiaben .

²⁹Mathu na no nanmeghü kesalina mathu na no kuli ketheng tsüdi khusen bvü nu no kemissü teshi pi keqheza menkedsa kesü ti theng shaden. Nsajjü kenen nu no keqheza menkedsa kekuli

³⁰ha sengho nmiwi chidha. No mizzatentithu ghena keqheza menkedsawa sa, nu mathu tsikezhüthu pi no nakhidha.

³¹No npvünanwa cükha nne, tsalina hi hi kemeten hyi makesü kesa pi no jjü thsüaden .”

³²Kemisintsa Apvüwa na khi: “No npvünanwa hyi wi jjüden, tsüna di nu dhukegü. Anyi tsüdi no nkhichila nankeqhe den; ahyi tsüna pong ben.

³³Tsüna no sapi adina ketizensa thsüden, kemessi nu keyasa hyi, tsüna npvünonwa Samaria hyi.

³⁴No tsü jjü nu qha thsüaden, nu tsü kepakhhi qan pi nleben pvüqhe ben. Hi Kemisintsa Apvüwa, hi khidha.”

³⁵Hawa ha Kemisintsa Apvüwa na khiben; “No hi mali nu hi wina khapeghe bvü kesalina, nsajjü kenen nu no keqheza menkedsa kekuli ghena agüccüben.”

³⁶Apvüwa na hi wi khi, “Keshü nyiwa, no Oholah nu Oholibah manyi jühkaghaten le kiden ben ma? Manyi na nan-kenontssü kekulithu kesa tsüpi manyi kimenni cülo.

³⁷Manyi na shenpfü-nyibvü qheza kuli nu anyi pathi — shenpfü-nyibvü keqheza lethu atsikezhüthu ssinu nkemetha kesa, nu manyi pvügha pi hi kecü tsathu tsü kepathi. Manyi na itsathu pi ahhansha sapi atsikezhüthu cü.

³⁸Isala manyi kekuli na tsü ketan nye. Manyi hi kekinyijjen nakhi nu hi sa kechi Sabbath yen bheghe.

³⁹Manyi na itsangathu pathi pi ahhansha sapi atsikezhüthu kecü ghanan wi manyi na hi kekinyijjen wi gho nu tsü nakhia!

⁴⁰“Manyi na nyilothu kesun neng neng pi kelensie wi anyithu na gholo ci thsü, nu anyithu na gho. Ma pvünan na atssü kizü nu anyon kenyenji pi nyen, nu aghe men kedhu pvüya.

⁴¹Manyi na awe kemehai kesü miwi donki, nu manyi tuwi miz kesü pi ton nu pala kemehaithu, hi pi manyi kecü hankedemvu nu oliv deli wwala pi pong theng.

⁴²Kemeshen sala hang keten nyitenti kesü hhai zaya, ayyikeshü wina anyi khang kesü ssigho. Mathu na akhwesathu sengho ma pvünan kwen qhan nu kadiliwen kemehai pi manyi li wen cü.

⁴³Nu hi ketanla hi ccünengla mathu na nza kesü shenpfü-nyibvü keqheza kesa wi anonhi kesa kinyibvü pi keqheza menkedsa kesü ti ssi benden.

⁴⁴Mathu na keqheza menkedsa ha keni wi wa neng neng saden. Mathu na Oholah nu Oholibah nketsatan nza ha keni wi wa neng.

⁴⁵Methameshon ketenthu na manyi shenpfü-nyibvü keqheza kesa nu anyi kepathi ghena manyi meshensa den, kepaghenanye manyi na shenpfü-nyibvü keqheza kuli nu ajjü pi manyi kwen metsidha.”

⁴⁶Hawa ha Kemisintsa Apvüwa na khiben, “Anyi khang kesü ssigho manyi patemessi nu manyi tsanqai shuyalo.

⁴⁷Anyitentiwa tsü ya alon pi manyi kicen nu njünnu pi manyi ssikaghashen; manyi tsangathu pathi, nu manyi jjen mecang thsülo.

⁴⁸Hi ayyiwa maben wi nketsatan khen nu nza thola manyi kesa ti shenpfü-nyibvü keqheza tsü nsa lalo kesa kitsan chiden.

⁴⁹Nu no pvünan keni hi nshinyi nketsatan, atsikezhü kekinyi kesamithu tsü ghena kemeten pi nshinyi cüden. Tsaseng wi nshinyi na hi Kemisintsa Apvüwa le kesa chüyaben.”