Read Northern Rengma Naga EZEKIEL 24 Bible Online

EZEKIEL 24 - Northern Rengma Naga bible

EZEKIEL 24

¹Ithu na kushinyi sa kewa mapi tugu asha tagha ghanan tagha wi Apvüwa na hi ccüneng.

² Ma khi, “Keshü nyiwa, nansü tsathang ha zhüya, kepaghenanye nansü tsathang hana Babilon kadimiwa na Jerusalem nka le kiden shagha ben.

³Inyi nyu matang ketenthu wi hi Kemisintsa Apvüwa, mathu ghena ajühkaghape kebenwa ha pi kizalo: Awwenpfüwa tsüpi anni miwi qhan nu atssü pi tsü pongya.

⁴Asa kemehai ntsathu — ma hah nu ma ccüthu, nu ma gü kemehaithu kessishi pi tsü pongya.

⁵Khaghaneni kemehai ntsa sa pi chi; achan pi awwenpfü chakhu wi nbonkiya. Atssü ya gilli thsü; ma gü nu ma züthu wwen thsü.”

⁶Hawa ha hi Kemisintsa Apvüwa na khiben, “Anyi kepathithu nyunutiwa na dedidha! Tsüna apfü kekika khiela methaya nketen tsüti. Asakü kesüsü na khushiya nu kesütanla teshi nten.

⁷Anyunutiwa wi anyi kepathithu na ben, isala ajjü pi ayyinikhu miwi keji chi nu kejüphonya kemehai pen wi nchila alon kemetha miwi keji chilo.

⁸Hi kuthi nkeya pen wi ajjü pi ciwi teshidha, tsüna aleben keminu nu ajukhiya keten pen wi.”

⁹Hawa ha Kemisintsa Apvüwa na khiben; “Anyi kepathithu nyunutiwa na dedidha! Hi ketanla kican chan saghuya den.

¹⁰Achan pvü neng gholo! Anni kewheng chilo! Asa shvuya. Shvu teqha pia. Ma güthu kika thsülo!

¹¹Nu lezza pfü kaghacangwa tsüpi anni mihi miwi qhan nu nmieya thsü. Tsaseng wi apfüwa tsü mugho ccüla methayaben.

¹²Ma kekika maben pi anni wi mecangkhi meyala lela.

¹³Jerusalem, no nketsatan kekulithu tsüna no nakhidha. Hi no sametha le kiden lela no kinakhi pvü nu ben. No ileben keminu tsüdi npi pvükeya tsü metha nengya nbendha.

¹⁴Hi Apvüwa, hi khidha. Hi kuli keten tsüwa na wadha. Hi no kesamithu nkechü ghe sa nyelela no nantizen nyelela ghaliya ntendha. No kuli kethengwa tsü ghena kemeten pvüden.” Kemisintsa Apvüwa na khidha.

¹⁵Apvüwa na hi ccüneng.

¹⁶Ma khi, “Keshü nyiwa, hi kutitan shon kechi wi anyi no kaghali ntsawa tsü sen bvüaden . No nleben magha nsala, nqaila nyelela n-nyontssü nllela.

¹⁷No kekishi hhai nza thsüla. No nleben gükeccü zensu wi nli kivü pvü nyelela nccü kivü alen ntsenla. Ammi nshangla nyelela keshü nüntsse ndsala.”

¹⁸Tsü ghanan wi mitu hi anyithu ssi keccünengli ben. Tsü minulen wi iwubvü na shü, nu tsü dhitsüwa wi Apvüwa na hi kekiza ti sa.

¹⁹Anyithu na hi keü, “No mangkesa na tsüti saben nu?”

²⁰Hi mathu wi khi, “Apvüwa na hi ccüneng nu hi kizala

²¹ketsijüh hapi Israel nyithu cülo khi. Nthu na Kekinyijjen kizüwa tsü ghena ammisa ben. Nthu na tsü ghang nu hhainan mvuben, isala Apvüwa na tsü nakhia le bendha. Nu nthu theghi ghanyiwa shüshathu pi Jerusalem wi kethengthu aghi wi pathiaben.

²²Tsaseng wi nthu na hi kesa ti saaben. Nthu na nthu mmi shang nben nyelela keshü nüntsse dsa nben.

²³Nthu na nthu li kivü pvü nthu ccü kivü, ahathana nyelela qai nben. Nthu na nthu kesami ghena dediden, nu nthu na khokho tuwi ghadhiben.

²⁴Tsaseng wi hi nthu wi azensu kesü saaden, nu nthu na hi kesa tsüdila saaden. Apvüwa kekhi na ha sa kegho wi nthu na ma Kemisintsa Apvüwa le kesa chüyaben le khiben.”

²⁵Apvüwa na khi, “Keshü nyiwa, khili hi mathu wina mathu ammisa nu anonghe keten nu mathu na ghang nu hhainan mvu keten Kekijjenwa tsü sen bvüaden . Nu hi mathu tsathu nu mathu ngathu ssi bvüaden .

²⁶Hi ha kesa ghanan wi kededi ghü keyathu pahan na gho nu tsü cüki pi nthu kizaben.

²⁷Tsü ghanan wi tsü bhataghakea ajüh kekhi kekhangwa tsü mu neng yaden, nu nthu na ma ssinu keccünengli den. Tsüti nu ma anyithu tuwi azensu kesü saaden, nu mathu na hi Apvüwa le kesa chüyaben.”