Read Northern Rengma Naga EZEKIEL 25 Bible Online

EZEKIEL 25 - Northern Rengma Naga bible

EZEKIEL 25

¹ Apvüwa na hi ccüneng.

²“Keshü nyiwa, Ammon diyyiwa khimeshü chilo.

³Mathu ya Kemisintsa Apvüwa hi khi keben ha kinalo kizalo: Nthu hi Kekinyijjen nakhi, Israel yyi keyasa nu Judah nyithu kushinyi sa kewa ghang pi nthu nen.

⁴Nthu na nthu nonghe kesalina, hi nishuwa yyikeshü wi mizzatentithu ya nthu yaya thsüaden . Mathu na nthu diyyiwa wi mathu kemnanpenthu sa nu ciwi hang den. Mathu na nthu ji kesau kedsau dsa nu tsenitssü jjü waden.

⁵Hi Rabbah nyunutiwa kemili pi sunsiesa kenoncca pen sa, nu Ammon diyyiwa maben pi khaghaneni kekicen pen kesü sa nu nthu ya hi Apvüwa le kesa chüya thsüaden .

⁶Hawa ha Kemisintsa Apvüwa na khiben: Nthu na nthu kwencen nu anonghe nu kephenki. Nthu na Israel yyi nkhichi sa.

⁷Nthu na tsüti kesa wina hi nthu khupi mizzatenti kepathu na nthu ji peghe nu shupvü bvüa ketenthu kwen wi chiaben . Hi nthu yasatha pi nu nthu ya mizzatenti kesü sa neng meya thsüla nyelela nthu ji diyyiwa ben meya thsü laden. Tsaseng wi nthu na hi Apvüwa le kesa chüyaben.”

⁸ Kemisintsa Apvüwa na khi, Moab na Judah tsüna mizzatenti kepathu ti makesü le kekhi ghena.

⁹Hi Moab ggü vü keben nyunutithu pi anyunuti kemehai ntsa Beth Jeshimoth, Baal Meon, nu Keriathaim hathu ha nyu ya gho mathu ssikaghashen thsü den.

¹⁰Hi nishuwa yyikeshü wi mizzatentithu ya Moab pi Ammon wwala yaya thsüaden . Nu Moab ya mizzatenti kesü nsa thsü laden.

¹¹Hi kemeten pi Moab cüaden, nu mathu na hi Apvüwa le chüyaben.”

¹² Kemisintsa Apvüwa na khi, “Edom nyithu na Judah miwi aghe nmehai jukhiya, nu ajukhi keya tsüwa tsüna bhatagha nkeya kesazzi sengho Edom miwi chidha.

¹³Hi khili pi thangchi kebenwa lethu hi kemeten pi Edom cü, nu anyi tsüdi nu aghangsathu tsüdila pathiaben . Hi Teman nyunutiwa na wa Dedan nyunuti kecu tsüpi keyasa yyi kesü saaden, nu aghi wi anyithu yathiaben .

¹⁴Inyi Israel na ighena Edom miwi ajukhi yaden, nu mathu na Edom ya ileben keminu kedhuwa tsü kidhenya thsüden. Edom na ileben keminu kemtsüwa tsüna mangwa khe chüyaben.” Kemisintsa Apvüwa na khidha.

¹⁵ Kemisintsa Apvüwa na khi, “Filistia nyithu na mathu kahang chu ghinyi sa keghothu miwi aghe nkemehai jukhiya nu mathu nyu nankemeghü wina tsüthu yasadha.

¹⁶Tsalina hi Filisti nyithu ssikaghashen nu mathu jjüpia le kesa pi thang chiben. Hi Filistia yyiketijü wi teshi kethengthu tsüdila yasaden.

¹⁷Hi kemeten pi mathu cü ntsa sa nu mathu miwi ajukhi maben yaben. Mathu na ileben keminu kidhenyaden. Tsaseng wi mathu na hi Apvüwa le kesa chüyaden.”