Read Northern Rengma Naga EZEKIEL 26 Bible Online

EZEKIEL 26 - Northern Rengma Naga bible

EZEKIEL 26

¹ Ithu na kushinyi sa kewa taghakhen mapi asha tsüwa ghanan atuwa wi Apvüwa na hi ccüneng.

²Ma khi, “Keshü nyiwa, Tur nyunuti wi anyithu na hati khipi anonghe ben. Mathu jisha ben: ‘Jerusalem tsü pacha zighedha le! Ma senlikesa kezüwa tsüna bvüdha! Ma ithu kematang sa nengya ntendha.’

³“Tsalina Kemisintsa Apvüwa hi ha khi theng: Hi nghinyi le, Tur nyunutiwa. Hi mizzatenti kejon ssigho nthu ssi kaghashen le bendha, nu mathu na atssü kedone kullu ti ghoaben .

⁴Mathu na anyunutiwa khweti yasa nu ma ducü kezhüthu phegheaben. Tsaseng wi hi ayyinikhu tsüdi jjü nu alonshi ketan teshiaben .

⁵Ma ciwi atssükedone non wi ben nu anga kicüthu na mathu nga kaghanthsü pi tsü miwi thsüden. Hi Kemisintsa Apvüwa na khidha. Mizzatentithu na Tur shu yaden,

⁶nu mathu na njünnu pi mathu yyi tonwa wi anyutithu wi hang kebenthu süthiaben . Tsaseng wi Tur na hi Apvüwa le kesa chüyaben.”

⁷Kemisintsa Apvüwa na khi, “Hi tsüdi jawi Kadimi kadi ntsa Babilon Kadimiwa Nebukhadnezzar ssigho Tur ssikaghashen den. Ma aghawa na süpahizi tenti kesü pi goruthu nu goru süpahithu gweghe ssigho den.

⁸Mathu diyyi tonwa nyunutithu wi hang kebenthu na aghikesa witsü mathu pathiaben . Aghinyithu na kekuthi penthu chhü, aghi kehie penthu sa nu akhweti kesha zhüpi atsonhi sala no ssi kaghashen ben.

⁹Mathu na akhweti kedonji pi akhweti donsha nu amighe choghon pi aducüthu pasha ben.

¹⁰Mathu goru nikhu kekithong na no kejibhon yaben. Mathu goruthu na atsanqai kepvü garithu nu goruthu zan sennu anyunuti keyasa khweti-jenka wi pvüdhi kewa hhai na nkhweti pvükuli ben.

¹¹Mathu kessithu na alentonti wi caghamo ssila mathu njünnu pi n-nyithu pathi sennu wadha. Nthu lonkesheng ketithu tsüpi ayyi wi khala chiaben .

¹²Nthu ghinyithu nu nthu keben-keyeng nu nthu senlikesa tsanqaithu pi mathu ji saya den. Mathu na nthu khwetithu zansha nu nthu jjen keti kemehaithu tsü pacha zigheaben. Mathu na alon nu achanthu nu ma qanthu tsüdila khuya nu pi atssükedone wi cüchiaben .

¹³Hi nthu khwi tsüdi khen nu hi nthu harp kekhou tsüdi yangyi sa thsüaden .

¹⁴Hi alonshi ketan teshi pi anga kicüthu ya mathu nga kaghanthsü kethsü pen sa thsüaden . Anyunutiwa tsüna khiela sanengya nbendha. Kemisintsa Apvüwa hi khidha.”

¹⁵Kemisintsa Apvüwa na hati Tur nyunuti kekizau na ben, “Nyu no nka keben wi tssükedone kemeggü wi kahangthu na anyi kesüthi kemagha hhai zapi keqhethiaben .

¹⁶ Atssükedone kete wi mizzatenti Kadimithu nu mathu kadipen wina dughoaben . Mathu na agwomejuwa kaghazu nu mathu yakekhuthsüthu khushi nu ayyi wi donkila kedheggü wa ben. Mathu na nthu miwi kuli kechi tsü mu pi qhethi pia nu mathu na kedheggü kekheneng meya laben.

¹⁷Mathu na nthu ghena keshü khwi ha saaben: Anyankethang nyunutiwa na dedidha! Ma hunjjenthu tsü atssükedonethu na llepi bvüdha. Anyunuti hawa ha nyithu na atssükedone miwi kekhang sen. Tssükedone kemeggü wi kahangthu tsüdi pateqhe gho.

¹⁸Khilitsü tsüna khuli kesa ghanan wi atssümangkehithu na kedheggü ben. Nu ma nyithu na kededi tsüti kesa tsü ghang pi mathu mansadha.”

¹⁹Kemisintsa Apvüwa na khi, “Hi no pi anyunutithu keyasa keyisha wi thola hang nketen penthu ti saaden. Hi atssükedone keti kedhu tssü pi no mejenbhon shaden.

²⁰Hi no kesun pi keshü yyi wi chi nu kheni kahangthu gweghe thsüaden . Hi no ya ayyi cakhu yyi wi anuphan kededi jawi ben thsü nu keshüthu gweghe ben neng wa thsüaden . Tsüti nyu ya khiela nmiwi hang thsü nten nu kahang yyi wi npen nben thsü laden.

²¹Hi no pi qhethiketen tsütsonca kesü saaden, nu no kahang sakhen saaben. Anyithu na no bha ben, isala khiela no muya nben.” Kemisintsa Apvüwa na khidha.