Read Northern Rengma Naga EZEKIEL 27 Bible Online

EZEKIEL 27 - Northern Rengma Naga bible

EZEKIEL 27

¹Apvüwa na hi wi khi,

²“Keshü nyiwa, Tur ghena keshü khwi kesü salo.

³Anyunuti kesü atssükedone katen wi ngan nu atssükedone kemeggü wi hang ketenthu tsü ssinu asensa ketenwa tsü le. Apvüwa Kekhang na khi keben hapi ma kizalo: Tur, no atsimehai ntsa kesa ghena kapvü.

⁴Njjen na atssükedone. No kicüthu na no pi ahunjjen tsikemehai kesü ti sa cü.

⁵Mathu na Hermon Yikha wi asahong chan ti kesa pi kaha chan sa; Lebanon wi sedar chan kesü pi adonbvü sa.

⁶Bashan wi ayang chanthu pi ahunjjen kezung chan sa; Mathu na Sipra wi asahong chan pi no kekhu kedha sa cü, Nu asaketiwa yha pi ma non wi dha.

⁷Nhunjjen mo sen kewa ghena athsüthu tsüna linen pi sa, Ejipt wina yakekhu linen thsü, kelensie wina wan nu chüshiya kemehai sa. No keshonthsü na linen kemehai ntsa, Sipra yitssükevüthu wina nmiepheü kesa sen kewa thsü pi sa.

⁸Nhun kessithu na Sidon nu Arvad nyunuti wina gho. N-nyi sapichüthu na ahunjjen wi wa ketenthu tsü.

⁹Ahunjjen kicüthu na Biblo wi shüka kethengthu. Atssükedone wi wa keten ahunjjen tsüdi wi kekulithu na nsen kesathu wi asensa.

¹⁰“Persia, Lidia, nu Libia wi süpahithu na no süpahizi wi kekuli sa. Mathu na mathu tsonhithu, liwenthu pi süpahi jjen wi hagi. Tsüthu tsüna anyankethang melli pi no cü ketenthu.

¹¹Arvad wi süpahithu na nkhweti ghihie; mathu na atsonhithu pi nkhweti wi hagi. Tsüthu tsüna no sapi ntsimehai ketenthu.

¹²No Spain wi asensa nu no kekuli kemehai kejon kutimen sala rükatssü, amighe, tin nu shisha khuya.

¹³No Gris, Tubal, nu Meshak wi asensa nu ntsanqai kemehaithu pi nssümaghathu nu lezza tsanqaithu ketonli.

¹⁴No atsanqaithu pi Beth Togarma wi atsanqai kepvü gari, aghi kesa goru, nu gadathu shei.

¹⁵Rhode nyithu na no ssinu asensa; atssükedone kemeggü kejon wi anyithu na asaketiwa yha, nu achankhüthu pi ntsanqai tsü ketonli.

¹⁶Siriya nyi na ntsanqaithu nu no sashükeya kejon sheiya. Mathu na emerald, athsü nmiepheü, ayakekhu thsü, linen kemehai, asagü lon, nu rubithu pi ntsanqaithu ketonli.

¹⁷Judah nu Israel manyi na awhengsu anikholi, oliv deli, nu cüdemvuthu pi ntsanqai shei.

¹⁸Damaska nyithu na Hebron wi kisengtssü nu Sahar wi asassen pi nsenkesa tsanqai nu no sashükeyathu shei. Amighe kicü nu cüdemvuthu pi ntsanqai shei.

²⁰Dedan nyithu na goru miwi kedonkithsü pi ntsanqaithu kemili.

²¹Arabia nyithu Kedar yyi wi kekhang kesenthu na khaghaneni zzathu, khaghanenithu, nu aneni süponthu pi nsenkesa tsanqaithu shei.

²²Sheba nu Rama wi asenkesathu na alon menkedhu, suna, nu cüdemvu kemehai ntsathu pi ntsanqaithu tong.

²³Haran, Kanne nu Eden nyunutithu, Sheba wi asenkesathu, Asshur nu Khilmad nyunutithu, mathu tsüdila no ssinu asenli sa.

²⁴Mathu na keben-keyeng thsü, nmiepheü, nu ayakekhu thsü, ajjenkedha thsü, nu ali mehaitsü kemela ssülithu pi no wi jeü.

²⁵ Atsanqai kepvü hunjjenzi keti ntsathu wi ntsanqaithu pvü nu wa. “No atssükedone wi ahunjjen kesü ti atsanqai kekiyan pi akhhi sa pvüden.

²⁶No kessithu na no ssinu atssükedone wi kedu wi, Nishu wi ameghü na gho atssükedone non wina no yasa pia.

²⁷Nsenlikesa keben-keyeng tsüdi; Nhunjjen wi wa ketenthu, nhunjjen kicüthu nu nsenlikesathu, nhunjjen wi süpahithu tsüdi — Tsüdila atssükedone wi bhatagha le; nhunjjen keyasa tsü wi.

²⁸Nhunjjen wi kebenthu meyanthi wa keten kemagha hhai na atssükedone katen wila kehiki.

²⁹“Ahunjjen tsüdila teshia, nu ahunjjen wi wa ketenthu tsüdila aghüsa wi shüdha.

³⁰Mathu tsüdila nghena leben güccü, ayyinikhu pi mathu li wi chi pvü nu kuweng ben.

³¹Mathu na nthu ghena ali whia, nu alishithsü mphi, mathu na leben güccü nu qai.

³²Mathu na no pi kevhü khwisa; ‘Thowa pi Tur ghapeya mehai, khili atssükedone non wi ceen kebenwa Tur tsü ghapeya nu?’

³³Nsenkesa tsanqaithu atssükedone khhaka kewa wi no mizzatenti tsüdi nsenthu keyishü pong cü. No keben tsanqaithu pi kadimithu sapi benya thsü.

³⁴Khilitsü no atssükedone wi yasadha; No atssükedone keti kedhu wi dudha. Ntsanqai nu nghena kuli kethengthu tsüdila, no gweghe atssükedone wi bhataghadha.”

³⁵“Atssükedone katen wi hang ketenthu tsüdila ncüki chüya nu qhethidha. Mathu kadimithu lela messidha, nu mathu mmi wi kemessi mu wadha.

³⁶No nmidha, anuphanla nmidha, nu ayyi tsüdi wi asenkesathu na nmidha, mathu la no gweghe ketizen kesa ti saya nashe messi bendha.”