Read Northern Rengma Naga EZEKIEL 28 Bible Online

EZEKIEL 28 - Northern Rengma Naga bible

EZEKIEL 28

¹Apvüwa na hi wi khi,

²Ma khi, “Keshü nyiwa, Tur wi kekhang kesenwa wi hi Kemisintsa Apvüwa na ma wi kiza keben jüh hapi kizalo: No kapvüla awisa nu no acenpvü kesü le khi. No acenpvü kesü ti atssükedonethu vü keben kadipen kesü miwi donki benle khi. No acenpvü kesü ghe saya mehai, isala nye, no keshü nyi khe Anyiza nye.

³No kemeshentsü no Daniel miwi metsaki nu kekuthi mangla ntuwi benya nben le khiden.

⁴No kemetsa nu sapichü na no sapi suna nu rükatssü keben pi no keben saya thsüdha.

⁵No metsa-mena pi asenli sa nu kiyi gho ben. No no keben-keyeng ghena khatila kapvü ten nu!

⁶Tsalina khili hi Kemisintsa Apvüwa na ha khiben: No no meshen pi acenpvü kesü kemetsa tile sa keten ghena,

⁷hi nyu nantizen nketen ghinyithu kesun pi no ssikaghashen thsüden. Mathu na no sapichü nu kemetsa wi mukeya tsikemehai tsüdi yasa den.

⁸Mathu na no pathi nu no kesun pi ashüjjen keca kesü wi chiaben .

⁹Mathu na no pathia le kegho wi no ciwi la no acenpvü kesü tile khiben tenla? No no kepathithu ssinu kemetuli keya wi no keshü nyi ti saben khe acenpvü kesü ti saya nben.

¹⁰No asang Anyiza nkechüthu kwen wi affü kesü ti shüaben. Hi Kemisintsa Apvüwa na ajüh ha khichidha.

¹¹Apvüwa na hi wi khineng.

¹²Ma khi, “Keshü nyiwa, Tur Kadimi na metuketen hie keben tsü ghena leben güccüyalo, hi Kemisintsa Apvüwa na khi kebenwa hapi ma kizalo. No kuti witsü no cencu kesa tsütsonca kesü sa. No khatila metsa nu akhüton mehai kesa nu?

¹³No Anyiza sanku Eden wi hang, nu alon menkedhu tsüdila pvü; Tsüthu tsüna diamond, topaz, beril, karnelian nu jasper, safir, emerald nu garnet. No suna ghe keben. Tsüthu tsüna no sahang kechi tsathang wi no ghena sa theng.

¹⁴Hi nyilo qhethiketen kesü pi no hie thsü. No iyikha kemetha miwi hang nu alon menkedhu kizali kesa jawi lentsen.

¹⁵No sahang kechi ghanan wi no wa no kekuli nkemehai npi sa keshagha kecu chu n-yencüki na cencu.

¹⁶No asenlikesa kedhamangwa tsüna no ssisen wa yasayala nu kesami wi chia. Tsalina hi no matang nu no ya iyikha kemetha teshilo sa, nu no hie keten nyilowa tsüna alon menkedhu kizali kesathu wina no jügüshi pia.

¹⁷No akhüton kemehai ghena awisa nu n-nyankethang na no sa pi kejüphon ti kuli thsüa. Hawa ha ghena hi no jügü pi ayyi wi chia, nu no teshi pi kadimi kepathu kekitsan sa.

¹⁸No pala keshei nu kejeü wi kekuli nkemehai tsüti sa nu no kekinyipenthu nmethala. Tsalina hi anni pi anyunutiwa miwi chi nu tsü mecang pi ayyi wi chia. No ghang ketenthu tsüdi khilitsü no kemecang annikhala ceng kesa mudha.

¹⁹No nmiladha, anuphanla nmiladha, nu mizzatentithu na no chuya le kewathu na qhethiketen nu mathu la no ti sayathu keyishü ghena messi bendha.”

²⁰ Apvüwa na hi wi khi,

²¹“Keshü nyiwa, Sidon nyithu then chilo.

²²Ciwi anyithu wi Kemisintsa Apvüwa, hi mathu cüki khi keben hapi mathu kizalo: Hi nthu ghinyile, Sidon; hi nthu miwi mangwa sa khe anyithu na hi seng den. Hi metha le kesa kemeten pi no wi kahangthu keccüca wi anyithu na hi Apvüwa le kesa chüyaden.

²³Hi kesakinaa ghei kesun pi nmiwi chi nu ajjü ya nlentontithu wi lle wa thsüden. No kevü wi tsüdi no ssikaghashen den, nu n-nyithu pathiaben . Tsaseng wi no hi Apvüwa le kesa chüyaben.”

²⁴Apvüwa na khi, “Mizzatenti Israel nankeqhe ketenthu kesüla aghazü nu ateqaethu ti Israel patena nbendha. Nu mathu na hi Kemisintsa Apvüwa le kesa chüyaben.”

²⁵Kemisintsa Apvüwa na khi, “Hi Israel nyithu jügüzighe pi mizzatentithu wi chi ketheng penthu wina mathu ssineng ghoaben, nu mizzatentithu tsüdila hi metha le kesa chüyaben. Israel nyithu na hi ayyi pi imaghawa Jakob kecü mathu yyi wi tsü hang yaben.

²⁶Mathu na ciwi yazishu hang yaben. Mathu na ajjenthu sa nu kemeshentsse lithu caden. Hi kemeten pi mathu jenphon mathu nankeqhe ketenthu tsüdi cüa, nu Israel na yazishu sayaden. Tsaseng wi na hi Apvüwa mathu Nyiza.