Read Northern Rengma Naga EZEKIEL 29 Bible Online

EZEKIEL 29 - Northern Rengma Naga bible

EZEKIEL 29

¹ Ithu na kushiyyi wi kewa amapi tagha wi asha taghawa ghanan taghakeni wi Apvüwa na hi wi khi,

²“Keshü nyiwa, Ejipt kadimiwa then chilo. Ma nu Ejipt yyi tsüdi khati kemeten saben khe pi ma kizalo.

³Hawa ha Kemisintsa Apvüwa na pi Ejipt kadimiwa kiza benle khilo. Hi nghinyi le, no aghangha ketiwa, aghaku wi jen ketenwa tsüle. No Nil ghaku tsüna nji nu no tsü sachile khiden.

⁴Hi amighe dhasü kesü pi no hakheng vüya nu nghaku wi angathu ya no hagi khvu ya thsüaden. Tsaseng wi hi Nil ghaku wi anga no wi kaki kebenthu tsüdi saghu zanshi yaden.

⁵Hi no nu anga tsüthu tsüdi pi ayyikeshü wi cüchiaben . Nkamang pi nvhüla teshiaben . Hi tsüpi awathu nu aghangsathu tsse sa thsüaden .

⁶ Tsaseng wi Ejipt wi anyithu tsüdila hi Apvüwa le kesa chüyaben.” Apvüwa na khi, “Israel nyithu na no, Ejipt nyithu kekiqa nondi, isala nthu na akhhatssü nkezü kesü miwi mehaiki nsa.

⁷Khathansha wi mathu na nthu wi keleki khe nthu na qanca nu mathu hhaku kecun, nu mathu geshi paphegheaben.

⁸Tsalina khili Kemisintsa Apvüwa, hi no kiza keben lethu, hi anyi njünnu kepithu ssigho no ssikaghashen den, nu tsüthu na n-nyithu nu nsahangthu pathiaben .

⁹Ejipt na dedi pi kaghacang kesü saaden. Tsaseng wi no hi Apvüwa le kesa chüyaben. “No Nil ghaku tsüna nji nu no tsü sa chile kekhi ghena,

¹⁰hi nghinyi nu nji Nil ghinyi le. Hi Ejipt na aghawa Migdol nyunuti wina wa acülawa Aswan nyunuti kecu, wala Sudan ggü kecu tsüdi yasa pi kaghacang saaden.

¹¹Anyi nyelela asahang kesüla ciwi pvüdhi waya nben. Amapi jügha mangla ciwi hang nben.

¹²Hi Ejipt pi ayyi yishatha kesa diyyi kesü sa thsüaden . Amapi jügha Ejipt wi anyunutithu na dedi pi anyunuti kepathu miwi dediki thsüaden . Hi Ejipt nyithu ya kushinyithu sa thsüaden, Mathu na diyyi wi bvü wa nu anyi kepapathu jawi hang wa thsüaden .”

¹³Kemisintsa Apvüwa na khi, “Amapi jügha seng wi hi Ejipt nyithu jügü pi chi ketheng mizzatentithu wina ssi neng ghoaben .

¹⁴nu hi mathu ya mathu yyi tsentsawa Ejipt cülawa wi hang thsüaden . Ciwi mathu na kadiyyi nkekhang kesü saaben,

¹⁵tsüdi jawi kadimi nkekhangwa sa, nu mathu na khiela mizzatenti kepathu miwi kekhang sen neng nbendha. Hi mathu khupi anyan nkethang ntsa kesü sa thsü nu mathu ya mizzatenti kesüla pi mathu kemeshen sa meya thsüladen.

¹⁶Israel na khiela mathu kekiqa n-nondidha. Ejipt cüki meshen keya wi Israel na ma mathu nondi kegho tsüna khatila sazzinu kesa chüyaben. Tsaseng wi Israel na hi Kemisintsa Apvüwa le kesa chüyaben.”

¹⁷Ithu na kushiyyi wi kewa amapi nkwe nu tagü asha atuwa wi ghanan atuwa wi Apvüwa na hi ccüneng.

¹⁸Ma khi, “Keshü nyiwa, Babilon Kadimi Nebukhadnezzar na Tur ssikaghashen le kesa lentsen chidha. Ma ma süpahithu ya akhhi kekiyan pvü pi mathu lissen kizza pi metha, nu mathu depfü censhu khia, isala kadimi nyelela ma süpahizi lela mathu ketizenkesa ghena mangla mu meya.

¹⁹Tsalina khili hi Kemisintsa Apvüwa na ha khiben: Hi Ejipt yyi pi Kadimi Nebukhadnezzar cüaden . Ma tsü peghe nu shuya nu Ejipt keben-keyeng tsüdi pvü nu pi ma süpahithu thün sala bvüaden .

²⁰Hi Ejipt pi ma kekuli thün sala cüaden, kepaghenanye ma süpahizi na ighena kuli. Hi Kemisintsa Apvüwa na khidha.

²¹“Tsüti kesa wi hi Israel nyithu sapi khang cü nu anyi tsüdi ya hi Apvüwa le kesa chüya thsüle kesalina, nu no, Ezekiel ya anyi tsüdi njüh zaya kemehai pen wina ajüh ha khi thsüden.”