Read Northern Rengma Naga EZEKIEL 3 Bible Online

EZEKIEL 3 - Northern Rengma Naga bible

EZEKIEL 3

¹ “Keshü nyiwa, kezhüllu ha dsalo; tsaseng wi wa nu Israel nyithu wi khilo.”

²Tsalina hi ipang kachi nu ma kezhüwa tsü dsalo pi hi cü.

³Ma khi, “Keshü nyiwa, hi pi no kecü kezhülluwa tsü dsalo; tsüpi npvü nma yalo.” Hi tsü dsaya nan tsüna anikholi keminnun ti.

⁴Tsaseng wi Anyiza na khi, “Keshü nyiwa, Israel nyithu wi wa nu hi no mangwa khilo khi khe tsüpi mathu kiza lo.

⁵Hi no kesun pi asang mizzatenti kesü ajüh kedhu khi ketenthu wi nyela Israel nyithu wi chiben.

⁶Keujüla hi no kesun pi ajüh kedhu no nkechü khi keten mizzatentithu wi chi lethu, mathu na njüh kina kesa.

⁷Isala Israel nyithu kesütanla kina mvu nben; mathu na ijüh lela kina nben. Mathu tsüdila leben-dhu nu njüh matangden.

⁸Hi no pi mathu lebenkedhu nu kekhang ti sa thsüden.

⁹Hi no pi alonshi kezü ti, nu diamond kekhang ti saaden; hhaghe ketenthu tsü nmessi lalo.”

¹⁰Anyiza na khineng, “Keshü nyiwa, tetsaki gho nu hi pi no kiza keben tsüdi meshen yalo.

¹¹Tsaseng wi no diyyi nyithu kushinyi sa kebenthu wi wa nu Kemisintsa Apvüwa, hi pi mathu kiza keben ha kinale nkina lela pi mathu kiza lo.”

¹²Tsaseng wi Anyiza ghamu na hi pieki chi, nu hi isengwa ahhai misi ntsa nu khi keben za, “Tang wi keben Apvüwa nyankethangwa tsü senglo!”

¹³Hi kahangli kebenthu na gweghe ameghü wi mathu gisha kebhagha keben, nu accüqethu hhai, ameghükuju hhai kemessi kesü ti za.

¹⁴Apvüwa kekhangwa na zü ntsa nu imiwi gho, nu ma ghamu na hi pvü nu bvü keten wi, hi ileben teggü nu ighepvüya.

¹⁵Tsalina hi Khebar Ghaku kete Tel Abib wi kushinyithu na hang keten pen witsü gho, nu hi kemu nu kizathu tsü ghena hi keqhethi pi imansala ciwi ghanan tagü ngan wa.

¹⁶Ghanan tsü kewa sengwi Apvüwa na hi ccüneng,

¹⁷“Keshü nyiwa, hi no pi Israel nyithu ghena ghikehie kesü sale ben. Hi kekitsan jühthu pi no kecü tsü no ketsi pi mathu kiza den.

¹⁸Keujüla hi anyi nkemehai kesü na shü tendha le khi, isala no ma ya nkemehai lenwi kemili nu ma kahang hangshaya kemehai ma kitsan nchilathu ma kesami nyi kesü sala shüaben, isathu hi ma keshü khhiwa tsüpi no pvü thsüden.

¹⁹Keujüla no anyi nkemehai kesü kitsan chi nu ma ma kesami nteshi lethu, ma kesami nyi kesü sala shüaben, isala no kahang heiyaden.

²⁰“Keujüla anyi kemehai kesü na nkemehai kuli wa nu hi ma pi kemessi sakeyishü kesü sa thsüa, nu no ma kitsan nchi lethu ma shüaben. Ma ma kesamithu ghena shüaben. — Ma kekuli kemehai sa kethengthu tsü hi meshen nben — nu hi ma keshü khhi pi no pvü thsüaben.

²¹Keujüla no anyi kemehai kesü kesami nsa lalo kitsan chi nu ma njüh kina nu nsamila lethu, ma hang yaden, nu no kahang la hangsha yaben.”

²²Hi Apvüwa na keten kekhang kidhenya, nu ma hi wi kekhi zaya, “Shagha nu ayyiketijü witsü cülo. Hi ciwi no ccüneng ten na.”

²³Tsalina hi ayyiketijü witsü cü, nu hi ciwi Apvüwa nyankethang, Khebar Ghaku kete wi kemu tsüti kesa mu. Hi ayyi wi qancadu nkhwen wa,

²⁴isala Anyiza ghamu na imiwi gho nu hi pieki pi nganya thsüa. Apvüwa na hi wi khi, “Ajjen wi wha nu no ketanla ajjen non wi no khenten yalo.

²⁵Keshü nyiwa, no ciwi ali pi no bhen pvü nu nyu jawi wa meya laben.

²⁶Hi nmili ya shü thsü nu no ya kahhaghe nyithu ha kitsan meyala thsüaden .

²⁷Tsaseng wi hi no ccüneng nengchi nu ajühkhiya kemehai kekhang pi no ccüneng lethu, no Kemisintsa Apvüwa, hi mangwa khiben khe pi mathu kiza ya mehai. Mathu pahan na kinaben, isala pahan na no khichi nben, kepaghenanye mathu na kahhaghe mizzatenti kesü le.”