Read Northern Rengma Naga EZEKIEL 30 Bible Online

EZEKIEL 30 - Northern Rengma Naga bible

EZEKIEL 30

¹Apvüwa na hi wi khineng,

²“Keshü nyiwa, hi Kemisintsa Apvüwa na khi keben hapi atusenjüh-khi nu then chilo. No ajüh ha pi jisha chiden: Keqhethiketen tsathang kesü na gho tendha!

³Atsathangwa tsüna tetsakidha, Apvüwa na kuli keten tsathangwa tsü, Mizzatentithu ghena kulukeshü nu ketizenkesa tsathang kesü.

⁴Ciwi Ejipt wi aghi na benden, nu Sudan wi ketizenkesa keti na benden. Ejipt wi kejon pathiaben; diyyiwa tsüna shupvü bvü nu yasa pi theng ben.”

⁵“Aghi tsüwa tsüna Sudan, Lidia, Libia, Arabia, Kush wi Süpahi melli sen keghothu nu inyithu jawi lela pathiaben .”

⁶Apvüwa na khi, “Aghawa Migdol na wala acülawa Aswan kecu, Ejipt shei kepithu tsüdila aghi wi pathiaben . Ejipt süpahizi kekapvüthu yasa den. Hi Kemisintsa Apvüwa na khidha.

⁷Ayikha tsüna ayyi wi yishatha kesa kesü saaden, nu anyunutithu yasatha pi teshiaben .

⁸Hi anni pi Ejipt mecang nu ma shei kepithu tsüdi pathi kesa wi, mathu na hi Apvüwa le kesa chüyaden.

⁹“Atsathang tsüwa na gho nu Ejipt yasa kesa wi hi ahunjjenthu wina nyilothu kesun pi meshensa nkeben Sudan nyithu pamechü chiden, nu mathu na qhethiketen saaden! Tsü tsathang na gho tendha.”

¹⁰Kemisintsa Apvüwa na khi, “Hi Babilon kadimi Nebukhadnezzar sennu Ejipt keben-keyeng tsüdi pi asakhen sa thsüaden .

¹¹Ma nu nanketizen nkemi ma süpahithu na gho Ejipt yasatha saaden. Nu njünnu sennu Ejipt ssikaghashen den, nu akamang na ayyiwa tsü pong shaben.

¹²Hi Nil ghaku ya keqha thsüa nu Ejipt pi anyi nkemehaithu kekhang kekhu wi chiaben, Asangthu na diyyiwa tsü maben yasatha saaden. Hi Apvüwa na khidha.”

¹³Kemisintsa Apvüwa na khi, “Hi Memphi wi atsikezhüthu atsentsa nkenye cenpvüthu tsü yasaden. Thola Ejipt wi kekhang kesen nmila nu hi anyi tsüdi pi keqhethi sa thsüaden .

¹⁴Hi Ejipt cülawa tsü yisha nu anni pi aghawa Zoan nyunuti mecang chiaben . Hi kemeten pi Thebe ghazen nyunutiwa cüaden .

¹⁵Hi Ejipt khweti kezüwa Pelusium nyunuti ya ileben keminu chü thsüden. Hi Thebe keben-keyeng tsü yasaden.

¹⁶Hi anni pi Ejipt mecang chi, isathu Pelusium na aleben ketizenkesa wi benden. Thebe khwetithu na bvüca, nu anyunutiwa wi atssüdan saben.

¹⁷Heliopoli nu Babasti nyunuti wi npvüza cahlithu na aghi wi shüaben, nu anyi kepathu ssinu atssüzüsa bvüaden .

¹⁸Hi Ejipt kekhan pakhia nu mathu na ammisa keten kezüthu tsüpi asakhen sa kesa wi kejang na Tahpanhe miwi ghoaben . Akulukeshü na Ejipt shangbhon nu ma nyunutithu tsüdi wi anyithu ghan sennu atssüzüsa waben.

¹⁹Hi hatinu kemeten pi Ejipt kecü wi mathu na hi Apvüwa le kesa chüyaben.”

²⁰Ithu na kushiyyi wi kewa mapi taghakhen asha atuwa tagü ghanan wi Apvüwa na hi ccüneng.

²¹Ma khi, “Keshü nyiwa, Hi Ejipt kadimiwa hacü pashüdha. Thola tsü nqhan cü nyelela hugi pi mehaiya nu njünnu ghantenya kemehai nsa thsü.

²²Tsalina hawa ha hi Kemisintsa Apvüwa na khiben, hi Ejipt kadimiwa ghinyi le! Hi ma hacü keni qho pashüa le saben — mehai kebenwa nu pashü kethengwa tsü la — nu njünnu ya ma kwen wina qanca thsüaden .

²³Hi Ejipt nyithu jügüzighe pi ayyi tsüdi wi chia le saben.

²⁴Tsaseng wi hi Babilon kadimiwa hacü satezü cü nu hi njünnu pi ma kwen wi chi cüden. Isala hi Ejipt kadimiwa hacü keni pashüaden, ma ma ghinyiwa tuwi ghadhi nu shü waden.

²⁵Anle, hi no ya nkhang thsüla nu Babilon kadimiwa satezü cüaden . Hi hi njünnu pi ma cü nu ma tsüpi Ejipt kejentan wi tsütson kechi wi anyi tsüdila hi Apvüwa le kesa chüyaden.

²⁶Hi Ejipt nyithu jügüzighe pi ayyi tsüdi wi chiaben . Tsaseng wi mathu na hi Apvüwa le kesa chüyaden.”