Read Northern Rengma Naga EZEKIEL 31 Bible Online

EZEKIEL 31 - Northern Rengma Naga bible

EZEKIEL 31

¹Ithu na kushiyyi wi kewa mapi taghakhen asha kecheng ghanan atuwa wi Apvüwa na hi ccüneng.

²Ma khi, “Keshü nyiwa, Ejipt nu ma nyithu tsüdi wi kizalo; No khatila khang nu? Hi mangwa pi no ghapeya mehai nu?

³No Lebanon wi Sedar chan kesü ti, ncünathu na atsimehai nu akekhwen ben; Achanton kesü na sie pi akulukeshü cu keben ti.

⁴Ciwi atssü na tsü ten pi shigü thsü, nu ayyi non wi ghaku na tsü tenki ben. Tsüthu na achanton shigü keben pen tsü tecca ben. Nu akuzathu ya ayinong wi achantonthu tsüdi wi wa thsü.

⁵Tsüna atssü mehaitsü tenya kesalina, tsü shigü pi achanton tsüdi miwi sieya. Ma cünathu na shigü pi tisieya.

⁶Awa lentagha na ma cünathu wi aghacen sa; Aghangsathu na ma cünathu kekhwen wi mathu zza caya; Ayyi wi mizzatentithu na ma kekhwen wi mnanya.

⁷Achanton tsüna khatila atsimehai kesa nu sie ntsa kesalina ma cünathu tsüdila sie. Ma ghazanthu na cha du atssü lle wa keben kuzathu cu.

⁸Anyiza sanku wi sedar chan kesüla pi tsü ghape meya. Asahong chanton ti kesa kesüla ma cüna tsüti kesa nmi.

⁹Hi ma cünathu sapi don zighe pi tsüti atsimehaitsü sa thsü. Tsüna Anyiza sanku Eden wi achanton tsüdila ghang pi anonkeyengwa tsü.

¹⁰“Tsalina hi Kemisintsa Apvüwa khili achantonthu akulukeshü npi kecu chu shigü kesawa tsüna khati saben khe no kizaben. Ma sie pfü shigü chu ammisa kayi,

¹¹tsalina hi tsü meya ladha, nu asang kekhang kesenwa kesü ya tsü yaya thsüaden . Ma achanton tsüwa ma gheshighena ghena mangwa muya qo khe pi cüaden .

¹²Nanketizen nkemi asangthu na tsü shüchi nu teshiaben . Ma cüna nu kaghabi ccü kesathu tsüna qanca sennu diyyiwa wi ayikha nu yyiketijü tsüdi miwi duaben. Ma kekhwen wi hang keben mizzatentithu tsüdila bvüaben.

¹³Awathu na gho ccü kesawa chan miwi ka, nu aghangsathu na ma cüna kiccüthu tsü meghe den.

¹⁴Tsalina khili nten na atssü na ten kemehai saben le khi lela achanton kesüla sie pi tsüthu ti sa neng nyelela ma mili na ki akulukeshü cu nu tsü kemisithu cuya nben. Mathu tsüdila keshü nyithu ti shülo sadha, keshü yyi wi wa kesathu gweghe walo sadha.”

¹⁵Hawa ha Kemisintsa Apvüwa na khiben, “Khathansha wi achantonwa tsüna keshü yyi wi wa khe tsü ghanan wi hi hathakina zensu ayyi non wi atssü ya ma llebhon thsüaden . Achantonwa tsü shü kesalina hi kejang ssigho Lebanon yikhathu miwi chi, nu ayinong tsüwa wi achantonthu tsüdila jü wa thsüaden .

¹⁶Hi khathansha wi tsü kesun pi keshü yyi wi chi khe ma kiccü hhai na mizzatentithu pvü kedheggü den. Eden wi achanton tsüdi nu kemehai ntsathu, Lebanon wi atssü na ten kemehai kesathu ayyi cakhu wi du kesathu tsüdila ma kiccü ghena mathu nen ben.

¹⁷Mathu na tsüwa gweghe keshü yyi wi bvü kesathu saghu wa ben. Nu ma kekhwen wi hang keten mizzatentithu jawi bvüzighe wa ben.

¹⁸“Achantonwa tsüna Ejipt kadimi nu ma nyithu tsüdi, Eden wi achantonthu lela tsüthu ti sie nu mehai nsa. Isala khilitsü Eden wi achantonthu ti tsüna keshü yyi wi du nu Anyiza nkechü nu aghi wi pathi kesathu saghu wa tendha. Hi Kemisintsa Apvüwa na khidha.”