Read Northern Rengma Naga EZEKIEL 32 Bible Online

EZEKIEL 32 - Northern Rengma Naga bible

EZEKIEL 32

¹Ithu na kushiyyi wi kewa mapi taghakeni asha taghakeni ghanan atuwa wi Apvüwa na hi ccüneng.

²Ma khi, “Keshü nyiwa, kekitsan keti kesü pi Ejipt kadimiwa cülo. Hi wi ketsijüh hapi ma cülo: No mizzatentithu jawi ssensitemi kesü. Hi kuliden, isala no aghangha ti sala aghaku kesü niela atssü ketheng zighe tenle. No nccü pi atssü pa nkhwen nu aghakuthu papi nmetha thsüladen.

³Khathansha wi mizzatentithu kejon saghuya khe hi hi kaghanthsü wina no ghanya nu mathu ya no zanshi pi aghüsa wi chiaben .

⁴Hi no pi ayyi wi khala nu ayyi wi awathu nu aghangsathu tsüdi ssigho no pi mathu pvü saya thsüaden .

⁵Hi nkamang kebighe pi ayikhathu nu ayyi ketijüthu tsüdi pong den.

⁶Hi njjü keji pi ayikhathu wi keghüki nu akuzathu npi pongkeya chu tsüti saaden.

⁷ Hi khathansha wi no yasa khe, hi atssan pabhon nu ghotsithu na jang aghani na akulu seng wi kuthi waden, nu asha na nwegü laden.

⁸Hi tang wi kewegü tsüdi patenen nu n-yyi pi kejang wi khala chiaben . Hi Kemisintsa Apvüwa na khidha.

⁹“Hi no keyasa jühtheü pi no za nketen diyyithu wi thang zighe kechi wi mizzatenti kejon na leben ketizen saben.

¹⁰Hi no wi sa kechi tsü mizzatenti kejon na qhethiaben. Hi hi njünnu pi sü kechi wi kadimithu na messi pi kedheggü ntsa saaben. No kekhuli ghanan wi mathu tsüdi keshü messi nu kedheggü ben.

¹¹Kemisintsa Apvüwa na Ejipt wi kadimiwa wi kiza, “No Babilon kadimiwa njünnu tsü metuden.

¹²Hi mizzatenti kedaggüthu wi süpahi ya mathu njünnu hhanshiya nu n-nyithu tsüdi süthi thsüaden . N-nyithu tsüdi nu no n-mmisa keten tsanqaithu tsüdi yasa thsüaden .

¹³Hi atssükebvüpen tsüdi wi nmesüsithu süthiaben . Ciwi amesüsi kesüla atssü pa nkhwen neng kesa nmiladen.

¹⁴Hi atssü ya ceen nu methasi sa nu n-ghakuthu ya mehaitsü lle wa thsüaden . Hi Kemisintsa Apvüwa na khidha.

¹⁵Hi Ejipt pi keyisha yyi kesü sa nu ciwi kahangthu yasa kesa wi, mathu na hi Apvüwa le kesa chüyaden.

¹⁶Kekitsan keti hawa ha keshü kesaki khwi kesü sa waden. Mizzatenti wi kinyibvüthu na Ejipt nu ma nyithu tsüdi ghena anonkegü khwi saaden. Hi Kemisintsa Apvüwa na khidha.”

¹⁷Ithu na kushiyyi wi kewa mapi taghakeni asha atuwa taghamanga ghanan wi Apvüwa na hi ccüneng.

¹⁸Ma khi, “Keshü nyiwa, Ejipt nyithu kejon keben ha maben ghena lebengüccü yalo. Mathu pi kepa wi mizzatenti kekhangthu gweghe kesun pi keshü yyi wi chilo.

¹⁹Mathu wi khilo: “Nthu kemeshentsü nthu na anyi tsüdi miwi atsimehai le ben kwe? Nthu na keshü yyi wi du, ciwi Anyiza nkechüthu jawi jen waben.

²⁰“Ejipt nyithu na aghi wi pathi kesa nyithu gweghe khuli ben. Njünnu kesü na mathu pathia le kiden ben.

²¹Aghi wi kekhang ntsathu nu Ejipt nyi wiwa bennu kesali kesathu na Ejipt nyithu nu keshü yyiwa wi ghaya mehai le ciben. Mathu na jisha ben, Anyiza nkechüthu aghi wi pathi kesathu na he wi dugho, mathu na hewi jenben!

²²“Assiriya na ciwi ma süpahithu shüjjen pi ma vü sen ben. Mathu tsüdila aghi wi shüa,

²³nu mathu shüjjen pi no keshü yyi kedhu ntsa wi ben. No süpahithu tsüdila aghi wi khulia, nu mathu shüjjenthu na ma shüjjen vüben. Isala mathu na kuti hang kebenthu yyi pateqhe chi.

²⁴“Elam na ciwi ma süpahithu shüjjen pi ma vüben. Mathu tsüdila aghi wi shü, nu mathu na ayhu nhanla keshü yyi wi dua. Hang keben wi mathu na kemessi pi vvü zighe, isala khilitsü mathu na shü nu kejügheya bendha.

²⁵Elam na ma süpahi aghi wi pathi kesathu jawi jen wadha. Nu ma süpahi shüjjenthu tsüdi ma vüben. Mathu tsüdila ahyu nhanla aghi wi pathi kesa nyithu. Hang keben wi tsü mathu na kemessi pi vvü zighe, isala khilitsü mathu na shü nu kejüghe yala aghi wi keshüthu gweghe ben wadha.

²⁶“Meshak nu Tubal manyi na ciwi manyi süpahithu shüjjen pi manyi vü keculi senben. Mathu tsüdila ayhu nkehanthu nu aghi wi tsüdi pathia.

²⁷Mathu na kheni aghi kekhangthu, aghi tsanqai kecenkeli pvü, mathu njünnu pi mathu li kekhu wi, nu mathu tsonhithu pi mathu gwo miwi chi nu keshü yyi wi kewathu ti mathu nyuwakü nu pi vhü. Aghi kekhang hathu ha kuti wi khan ntsa nu kahangthu pateqhe.

²⁸Tsüti nu Ejipt nyithu na ahyu nkahanthu aghi wi pathi kesathu jawi mathu pacha.

²⁹“Elam na ciwi ma kadimithu nu ma kekhang kesenthu gweghe ben. Mathu na süpahi kizüthu, isala mathu na khilitsü keshü yyi wi ayhu nkehanthu aghi wi pathi kesathu gweghe jen wadha.

³⁰“Aghawa kaditsathu tsüdi ciwi ben, nu Sidom nyithu la tsüdi ben. Mathu kekhang na kuti witsü kemessi pi vvü zighe, isala khilitsü kejüghe yala du ayhu nkahan aghi wi pathi nu ngan wa kesathu gweghe ben. Mathu na keshü yyi wi du kesathu gweghe kejügheya bendha.

³¹“Aghi wi shü kesa hathu tsüdi kemu ghena Ejipt kadimi nu ma süpahithu na lebenkagha sayaben.” Kemisintsa Apvüwa na khiben.

³²“Hi Ejipt kadimiwa ya kahangthu pateqhe thsü, isala ma nu ma süpahithu tsüdi pathia nu pi ayhu nkahanthu aghi wi pathi kesathu gweghe jen wa thsüaden .” Kemisintsa Apvüwa na khidha.